ގދ. ނަޑެއްލާގެ ބަނދަރު ތަރައްޤީކުރުމަށް ޝައުގުވެރިވާ ފަރާތްތައް ހޯދުމަށް ހުޅުވާލައިފި

ގދ. ނަޑެއްލާގެ ބަނދަރު ތަރައްޤީކުރުމަށް ޝައުގުވެރިވާ ފަރާތްތަކުން އެކަމަށް އެދި ބިޑު ހުށައެޅުމުގެ ފުރުސަތު މާލީ ކަންކަމާއި ތަރައްޤީގެ ރޭވުންތެރިކަމާބެހޭ ވުޒާރާއިން ހުޅުވާލައްވާފިއެވެ. މި މަޝްރޫޢާއި ގުޅޭ ބިޑު ހުށައަޅަންޖެހޭނީ ބީލަން ޕޯޓަލް މެދުވެރިކޮށް މި މަހުގެ 25 ވަނަ ދުވަހުގެ 13:00ގެ ކުރިންނެވެ. އަދި ބިޑު ހުޅުވުން އޮންނާނީ މި މަހުގެ 26 ވަނަ ދުވަހުގެ 13:00ގައިކަމަށް މާލީ ވުޒާރާއިން ވިދާޅުވެއެވެ.

މާލީ ކަންކަމާއި ތަރައްޤީގެ ރޭވުންތެރިކަމާބެހޭ ވުޒާރާއިން ވިދާޅުވީ، މި ފުރުސަތު ހުޅުވާލާފައިވަނީ އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާގެ އެދުމުގެ މަތިން ކަމަށެވެ. އަދި މި މަސައްކަތަށް ޝަރުތުހަމަވާ ފަރާތެއް ހޯދުމުގެ ކަންތައްތައް ކުރިއަށް ގެންދެވޭނީ އިންޓަނޭޝަނަލް ކޮމްޕެޓިޓިވް ބިޑިންގ، އައި.ސީ.ބީ ގެ އުސޫލުންކަމަށް އެ ވުޒާރާއިން ވިދާޅުވިއެވެ. ހަމަ އެހެންމެ، މި ބީލަމުގައި ބައިވެރިވުމަށް 1500 ރުފިޔާގެ ނޮން-ރިފަންޑަބަލް ފީއެއް ދައްކަންޖެހޭނެކަމަށް އެ ވުޒާރާއިން ވަނީ މަޢުލޫމާތުދެއްވާފައެވެ. މީގެ އިތުރުން، ބީލަމަށް ރަޖިސްޓްރީވާ ފަރާތުގެ އެޑްރެހާއި، ގުޅޭނެ ނަންބަރުގެ އިތުރުން އެ ފަރާތުގެ އީމެއިލް އެޑްރެސް ފޮނުވަން ޖެހޭނެއެވެ. އަދި ރަޖިސްޓްރޭޝަން ފައިސާ ދެއްކި ރަޝީދުގެ ކޮޕީއެއް ވެސް ފޮނުވަންޖެހޭނެކަމަށް މާލީ ވުޒާރާއިން ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިދިޔަ މަހުގެ ތެރޭގައި ގދ. ނަޑެއްލާއަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވާފައެވެ. އަދި އެ ރަށުގެ ރައްޔިތުންނަށް ދިމާވެފައިވާ ދަތިތައް ސަރުކާރުން ހައްލުކޮށްދެއްވާނެކަމުގެ ޔަޤީންކަން ރައީސް ވަނީ އެ ރަށުގެ ރައްޔިތުންނަށް ދެއްވާފައެވެ. އޭގެ ތެރޭގައި، ނަޑެއްލާ ބަނދަރު ހެދުމަށް ކޮންޓްރެކްޓަރެއް ހޯދުމަށް ވަރަށް އަވަހަށް އިއުލާންކުރައްވާނެކަމަށް އެމަނިކުފާނު ވިދާޅުވިއެވެ. އަދި އެރަށުގެ ބަނދަރު ތަރައްޤީކުރާނީ ރަށުގެ ރައްޔިތުން ބޭނުންވާގޮތައްކަން ވެސް ރައީސް ވަނީ ފާހަގަކުރައްވާފައެވެ. 

ނަޑެއްލާގައި މިވަގުތު އޮތީ 2008 ވަނަ އަހަރު ހަދާފައިވާ ބަނދަރެވެ. އެހެންކަމުން ރަށުގެ ރައްޔިތުންނަށް މީގެ ދަތިކަން ދަނީ ކުރިމަތިވަމުންކަން ކައުންސުލުގެ ރައީސް ފާހަގަކުރެއްވިއެވެ.