ޚަބަރު
ބައި-އިލެކްޝަންސްތަކުގައި ވޯޓުލީ 55 އިންސައްތަ މީހުން

ލ. ގަމުގައި ވޯޓުލުން ކުރިޔަށްދަނީ، ފޮޓޯ: އިލެކްޝަންސް ކޮމިޝަން
މިއަދު ކުރިޔަށްދިޔަ ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ ބައި-އިލެކްޝަންތަކުގައި ވޯޓު ލުމަށް ކަނޑައަޅާފައި އޮތް ވަގުތު ހަމަވިއިރު ވޯޓުލާފައި ވަނީ 55 އިންސައްތަ މީހުންކަމަށް އިލެކްޝަންސް ކޮމިޝަނުން ހާމަކޮށްފިއެވެ.
އެގޮތުން މި އިންތިޙާބުތަކުގައި ވޯޓުލުމުގެ ހައްޤު 11،325 މީހަކަށް ލިބިފައިވާއިރު، އޭގެ ތެރެއިން ވޯޓުލާފައިވަނީ 6،275 މީހުންނެވެ. އެއީ ވޯޓުލުމުގެ ޙައްޤު ލިބިފައިވާ މީހުންގެ ތެރެއިން %55.4 މީހުންނެވެ. އޭގެތެރޭގައި ހިމެނެނީ 3،292 އަންހެނުންނާއި 2،983 ފިރިހެނުންނެވެ.
މިއަދު ކުރިޔަށްދިޔަ ބައި-އިލެކްޝަންތަކުގައި 12 ދާއިރާއަކުން ވޯޓުލުން ކުރިއަށް ގެންގޮސްފައިވެއެވެ. އެއީ 2 ރަށެއްގެ ކައުންސިލް ބައި-އިލެކްޝަނާއި، 10 ރަށެއްގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަންތައް ހިމެނެއެވެ.
މި އިންތިޚާބުގެ ރަސްމީ ނަތީޖާ އިޢުލާން ކުރުމަށް ހަމަޖެހިފައިވަނީ މާދަމާ ކަމަށް އިލެކްޝަންސް ކޮމިޝަނުން ވަނީ ހާމަކޮށްފައެވެ.