ބައި-އިލެކްޝަންސްތަކުގެ 89 އިންސައްތަ ގޮނޑި ވެރިކަންކުރާ ކޮންގްރެސް ޕާޓީއިން ކާމިޔާބުކޮށްފި

މިއަދު ކުރިޔަށްދިޔަ ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ ބައި-އިލެކްޝަންތަކާއި، އެއް ކެނޑިޑޭޓަކު ވާދަކުރުމުން ބައި-އިލެކްޝަންތައް ނުބާއްވާ ގޮނޑިތަކާއެކު، ޖުމްލަ 89 އިންސައްތަ ގޮނޑި ވެރިކަންކުރާ ޕީޕަލްސް ނެޝަނަލް ކޮންގްރެސް (ކޮންގްރެސް ޕާޓީ) އިން ކާމިޔާބުކޮށްފިއެވެ.

އެގޮތުން ކޮންގްރެސް ޕާޓީއިން ވަނީ 37 ގޮނޑީގެ ތެރެއިން 4 ގޮނޑިފިޔަވާ އެހެން ހުރިހާ ގޮނޑިއެއް ކާމިޔާބުކޮށްފައެވެ. އެ ޕާޓީއަށް ގެއްލުނު 4 ގޮނޑީގެ ތެރެއިން 2 ގޮނޑި ކާމިޔާބުކޮށްފައިވަނީ އިދިކޮޅު އެމްޑީޕީއިންނެވެ. އަދި އަނެއް ދެގޮނޑި ހޯދީ އަމިއްލަ ގޮތުން ކުރިމަތިލި ދެ ފަރާތަކުންނެވެ.

އެމްޑީޕީއިން ކާމިޔާބުކުރީ ނ. މިލަދޫ އާއި އދ. ހަންޏާމީދޫގެ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ ގޮނޑިއެވެ. އަދި އަމިއްލަ ގޮތުން ކުރިމަތިލި ކެނޑިޑޭޓުން ކާމިޔާބުކުރީ ހދ. މަކުނުދޫ ކައުންސިލް މެންބަރުގެ ގޮނޑިއާއި ދ. ހުޅުދެލި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ ގޮނޑިއެވެ.

މި ބައި-އިލެކްޝަންސްތަކުގައި ކޮންގްރެސް ޕާޓީއިން ވަނީ އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ 32 ގޮނޑީގެ ތެރެއިން 29 ގޮނޑިއާއި ކައުންސިލް މެންބަރުގެ 3 ގޮނޑީގެ ތެރެއިން 2 ގޮނޑިއާއި ކައުންސިލްގެ ރައީސްގެ ހުސްވެފައިވާ ހަމައެކަނި ގޮނޑި އަދި އަތޮޅު ކައުންސިލްގެ ރައީސްގެ ހުސްވެފައިވާ ހަމައެކަނި ގޮނޑި ކާމިޔާބުކޮށްފައެވެ.

މިއަދު ކުރިޔަށް ގޮސްފައިވަނީ 12 ދާއިރާއެއްގެ ވޯޓުލުމެވެ. އޭގެ ތެރޭގައި ހިމެނެނީ 2  ރަށެއްގެ ކައުންސިލް ބައި-އިލެކްޝަނާއި 10 ރަށެއްގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަނެވެ.

އަދި 21  ރަށެއްގެ ބައި-އިލެކްޝަންތަކުގައި އެންމެ ކެންޑިޑޭޓަކު ވާދަކުރުމުން އެ ރަށްތަކުގެ ބައި-އިލެކްޝަންތައް ބާއްވާފައެއް ނުވެއެވެ.