ފަތުރުވެރިކަމުގެ ދާއިރާއިން މީހުން ބިނާކުރުމަށް ސަރުކާރުން ޙާއްސަ އިސްކަމެއް ދެއްވާނެކަމުގައި ވަޒީރު ވިދާޅުވެއްޖެ

ފަތުރުވެރިކަމުގެ ދާއިރާއިން މީހުން ބިނާކުރުމަށް ސަރުކާރުން ޙާއްސަ އިސްކަމެއް ދެއްވާނެކަމުގައި ފަތުވެރިކަމާއި ތިމާވެއްޓާ ބެހޭ ވަޒީރު ތާރިޤް އިބްރާހިމް ވިދާޅުވެއްޖެއެވެ. 

ވަޒީރު މިހެން ވިދާޅުވީ، މޯލްޑިވްސް އެސޯސިއޭޝަން އޮފް އެޗްއާރު ޕްރޮފެޝަނަލްސް، (މާޕް)އިން އިންތިޒާމް ކޮށްގެން ބާއްވަމުން އަންނަ ނެޝަނަލް އެޗްއާރް ކޮންވެންޝަންގެ 5 ވަނަ ކޮންވެންޝަން ފަށްޓަވައިދެއްވާ ވާހަކަފުޅުދައްކަވަމުންނެވެ.

ވަޒީރު ވިދާޅުވީ ފަތުރުވެރިކަމުގެ ދާއިރާއަކީ ރާއްޖޭގެ މައި އިޤްތިޞާދީ ހަރަކާތަށްވާއިރު، މި ދާއިރާގައި ވަޒީފާގެ ފުރުޞަތު ލިބެންހުރިކަމަށާއި، މި ފުރުޞަތުތަކުގެ ބޭނުން ހިފަން ޖެހޭކަމަށެވެ. އަދި ވަޒީފާގެ ފުރުޞަތު ދޭއިރު އެއްވެސް ފަރާތެއް އިސްތިސްނާނުވާ ގޮތަކަށް ވަޒީފާ ދިނުމަކީ މުހިންމުކަމެއްކަމުގައި ވަޒީރު ވެސް ވަޒީރު ފާހަގަކުރެއްވިއެވެ.

އަޅުގަނޑުމެންގެ މަސައްކަތުގެ މާޙައުލު އެކުލެވިގެންވާ ގޮތަކަށް ހެދުމާ މެދުވެސް އަޅުގަނޑުމެން ވިސްނަން ޖެހޭ. ޒުވާނުންނާއި، އަންހެނުންނާއި، ނުކުޅެދުންތެރިކަން ހުންނަ މީހުންނާ ހަމައަށް، އެއްވެސް މީހަކު އަޅުގަނޑުމެންގެ ތެރެއިން އެކަހެރިވެގެން ނުދާނެކަން ކަށަވަރުކުރަން ޖެހޭ. ކޮންމެ މީހަކަށްވެސް މަސައްކަތުގެ މާޙައުލުގައި އެމީހެއްގެ ޤާބިލުކަން ދައްކުވައިދިނުމުގެ ފުރުޞަތު ލިބެންވާނެ.

ވަޒީރު ވިދާޅުވިއެވެ.

މި އެޗްއާރު ކޮންވެންޝަނާއި ގުޅިގެން ސޯޝަލްމީޑިއާގައި ކުރެއްވި ޕޯސްޓެއްގައި ވަޒީރު ވިދާޅުވީ، ދިވެހިރާއްޖޭގައި ހުނަރުވެރިން ތަރައްޤީކޮށް، އެ ފަރާތްތަކުގެ ޤާބިލުކަން އިތުރުކުރުމަށް އަމާޒުކުރެވިފައިވާ ސިޔާސަތުތަކެއް މި ސަރުކާރުން އެކުލަވާލައްވާފައިވާކަމަށެވެ. އަދި ކޮންމެ ރައްޔިތަކަށްވެސް އެ ފަރާތެއްގެ ޤާބިލުކަން ދައްކުވައިދިނުމުގެ ހަމަހަމަ ފުރުޞަތުތަކެއް ފޯރުކޮށްދިނުމަކީ މި ސަރުކާރުގެ އަމާޒެއްކަމަށް ވެސް ވަޒީރު ފާހަގަކުރެއްވިއެވެ.

މި އަހަރުގެ ކޮންވެންޝަންގައި ކީނޯޓް ސްޕީޗްތައް ދުނިޔޭގެ ފެންވަރުގެ މަޝްހޫރު ފަރާތަކުން ދެއްވުމަށް ހަމަޖެހިފައިވާއިރު ލީޑަރޝިޕް ޑިވެލޮޕްމަންޓާއި ގުޅުންހުރި އެކި ސެޝަންތަކާއި އެޗްއާރް ދާއިރާގެ މުވައްޒަފުންގެ ހުނަރާއި ޤާބިލުކަން އިތުރުކުރުމުގެ ސެޝަންތަކެއް ކުރިއަށް ގެންދިޔުމަށް ހަމަޖެހިފައިވެއެވެ.

މާޕްއަކީ ހިއުމަން ރިސޯސްގެ ދާއިރާއަށް މީހުން ހޭލުންތެރިކޮށް މީހުން ބިނާކުރަން މަސައްކަތް ކުރުމަށް ރާއްޖޭގައި އުފެދުނު ފުރަތަމަ ޖަމިއްޔާއެވެ. މި ޖަމިއްޔާގެ މައިގަނޑު މަޤްޞަކީ އެޗްއާރް ދާއިރާގައި މަސައްކަތް ކުރައްވާ ފަރާތްތަކަށް ތަފާތު ގޮތްގޮތުން އެހީތެރިވެ، އެފަރާތްތަކަށް ބޭނުންވާ ފަހުގެ ރިސޯސްތައް ހޯދުމަށް އެހީތެރިވެދިނުމާއި ދާއިރާއާއިގުޅޭ ބޭރުގެ ފަރާތްތަކާ ގުޅުން ބަދަހި ކުރެވި މައުލޫމާތު ބަދަލުކުރެވޭނެ މަގުތައް ފަހިކޮށްދިނުމެވެ.