މިފްކޯއިން އިއްޔެ މަސްވެރިންނަށް 6.5 މިލިއަން ރުފިޔާ ދޫކޮށްފި – ފަހުގެ ރެކޯޑެއް

މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް، މިފްކޯއިން އިއްޔެ މަސްވެރިންނަށް 6،491،327 (ހަ މިލިއަން ހަތަރު ލައްކަ ނުވަދިހަ އެއްހަށް ތިންސަތޭކަ ހަތާވީސް) މިލިއަން ރުފިޔާ ދޫކޮށްފިއެވެ. މިއީ ފަހުގެ ތާރީޙެއްގައި މިފްކޯއިން އެއް ދުވަހެއްގައި ކިރުވި މަހަށް މިހާގިނަ އަދަދަކަށް ފައިސާ ދޫކުރި ދުވަހެވެ.

މިފްކޯއިން 6.4 މިލިއަން ރުފިޔާ ދޫކޮށްފައި މިވަނީ މިދިޔަ ބުރާސްފަތި ދުވަހު ކިރުވި މަހަށެވެ. އެ ދުވަހު 60 ދޯންޏަކުން މަސް ކިރާފައިވާކަމަށް މިފްކޯއިން ހާމަކޮށްފައިވެއެވެ.

މިދިޔަ އަހަރުގެ މަސްވެރިންގެ ދުވަހުން ފެށިގެން މިފްކޯއިން އަންނަނީ މަސްވެރިން ކިރުވާ މަހަށް 48 ގަޑިއިރުގެ ތެރޭގައި ފައިސާ ޖަމާކުރަމުންނެވެ. އެއީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ވަޢުދުފުޅެއް ވެސް މެއެވެ.

މީގެ އިތުރުން، މިފްކޯގެ ތަފާސްހިސާބުތައް ދައްކާ ގޮތުން، މިދިޔަ މަހު އެ ކުންފުނިން މަސްވެރިންނަށް 117 މިލިއަން ރުފިޔާ ދޫކޮށްފައިވެއެވެ. މިއީ އޭގެ ކުރީ މަހާއި އަޅާބަލާއިރު %122 އިތުރުވުމެކެވެ. ޑިސެމްބަރ މަހު މިފްކޯއިން މަސްވެރިންނަށް ދޫކޮށްފައިވަނީ 52 މިލިޔަން ރުފިޔާއެވެ.

އަދި ފާއިތުވި 28 އަހަރުގެ ތާރީޙަށް ބަލާއިރު، ޖަނަވަރީ މަހެއްގައި މިފްކޯއަށް އެންމެ ގިނަ އަދަދަކަށް މަސް ކިރުވާފައި ވަނީ ވެސް ނިމުނު ޖެނުއަރީ މަހެވެ. އެ މަހު އެ ކުންފުންޏަށް 8،324 މެޓްރިކް ޓަނުގެ މަސް ކިރުވާފައިވެއެވެ. މިއީ އެވަރެޖްކޮށް ދުވާލަކަށް 280 މެޓްރިކް ޓަނުގެ މަހެވެ. 

ދިވެހިރާއްޖޭގެ މަސްވެރިކަމުގެ ސިނާޢަތް ތަރައްޤީކޮށް ކުރިއެރުވުމަށްޓަކައި ސަރުކާރުން އަންނަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން މަސްވެރިކަމުގެ ސިނާއަތައް ދިމާވެފައިވާ މައްސަލަތަކަށް ސަރުކާރުގެ ފުރަތަމަ 3 އަހަރުގެ ތެރޭގައި ހައްލު ލިބިގެންދާނެކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވުޒާރާއިން ވަނީ ވިދާޅުވެފައެވެ.