ކުޅިވަރު

ރެއާލް މެޑްރިޑާއެކު 25 ތަށި ހޯދި މާސެލޯ ރިޓަޔާކޮށްފި

ރެއާލް މެޑްރިޑާއެކު 25 ތަށި ހޯދި މާސެލޯ ރިޓަޔާކޮށްފި

މާސެލޯ ރެއާލް މެޑްރިޑްގެ ޖާޒީގައި---

މިފްތާޙް މުޙައްމަދު

މިފްތާޙް މުޙައްމަދު

09 ފެބްރުއަރީ 2025، 08:19

09 ފެބްރުއަރީ 2025، 08:19

ސްޕެއިންގެ ރެއާލް މެޑްރިޑާއެކު 25 ކާމިޔާބުކޮށްފައިވާ ބްރެޒިލްގެ ލެފްޓް-ބެކް، މާސެލޯ ޕްރޮފެޝަނަލް ފުޓުބޯޅަ ކުޅުން ހުއްޓާލައިފިއެވެ. 

އުމުރުން 36 އަހަރުގެ މާސެލޯ ފުޓުބޯޅަ ކުޅުން ހުއްޓާލިއިރު، އޭނާ ކުޅެމުން ދިޔައީ ކެރިއަރު ފެށި ބްރެޒިލްގެ ފްލުމިނެންސޭއަށެވެ. ފްލުމިނެންސޭގެ ޔޫތު ލެވަލުން ސީނިއާ ޓީމަށް ޕްރޮމޯޓްވި މާސެލޯ އަލުން އެ ކްލަބާ ގުޅުނީ އެ ޓީމުގައި ހުރެ ރިޓަޔާކުރަން ވެސް ވިސްނައިގެންނެވެ. 

އުމުރުން 18 އަހަރުގައި ރެއާލް މެޑްރިޑަށް ބަދަލުވި މާސެލޯ ވަނީ އެ ކްލަބަށް 15 އަހަރު ކުޅެދީފައެވެ. އަދި ފުޓުބޯޅައިން ރިޓަޔާ ކުރިކަން ހާމަކުރި ވީޑިއޯގައި ރެއާލް މެޑްރިޑަކީ އޭނާގެ ފުޓުބޯޅަ ކެރިއަރުގެ އެންމެ މުހިންމު އެއްބައި ކަމުގައި ވަނީ ހިއްސާކޮށްފައެވެ. 

"ރެއާލް މެޑްރިޑް އާއިލާގައި ހިމެނުން އެއީ ބަޔާންކުރަން ދަތި ކަމެއް. އެއީ އަހަރެން ކެރިޔަރުގައި އެންމެ މުހިންމު ހަނދާންތަކާ ގުޅިފައިވާ އާއިލާ،" މާސެލޯ ބުންޏެވެ.

2007 ވަނަ އަހަރު ރެއާލްއާ ގުޅުނު މާސެލޯ ވަނީ އެ ކްލަބާއެކު ފަސް ޗެމްޕިއަންސް ލީގު ހަ ސްޕެނިޝް ލީގު, ހަތަރު ކްލަބް ވޯލްޑް ކަޕް, ތިން ޔުއެފާ ސުޕަ ކަޕް, ދެ ކޮޕަ ޑެލްރޭ (ސްޕެނިޝް ކަޕް), ފަސް ސްޕެނިޝް ސުޕަ ކަޕް ކާމިޔާބު ކޮށްފައެވެ.

މާސެލޯ ވަނީ ބްރެޒިލްގެ ގައުމީ ޓީމާއެކު ވެސް ގިނަ ކާމިޔާބީ ހޯދައިފައެވެ. އެގޮތުން، ކޮޕަ އެމެރިކާގެ ތަށި އެއް ފަހަރު ހޯދުމުގެ އިތުރުން، އޮލިމްޕިކްސްގެ ގޯލްޑް މެޑަލް ވަނީ ދެ ފަހަރު ކާމިޔާބުކޮށްފައެވެ.

ރެއާލް މެޑްރިޑުން 2022 ގައި މާސެލޯ ބަދަލުވީ އޮލިމްޕިއާކޯސްއަށެވެ. އަދި އެ ކްލަބަށް އެއް ސީޒަން ކުޅުމަށްފަހު އޭނާ ފްލުމިނޭންސޭއާ ގުޅުނީ 2023 ވަނަ އަހަރުއެވެ. 

ފްލުމިނެންސޭގެ ޓްރެއިނިން ސެންޓަރަށް މާސެލޯގެ ނަމުން ނަންދީފައިވާއިރު، މާސެލޯގެ އެއްބަސްވުން އުވާލުމާ ބެހޭގޮތުން އެ ކްލަބުން ބުނެފައިވަނީ، މާސެލޯ އާއި ކްލަބާ ދެމެދުގައި އޮތް ގުޅުން އަބަދަށް ދެމިގެންދާނެ ކަމަށެވެ.

މާސެލޯ ބުނީ ކުޅުން ހުއްޓާލި ނަމަވެސް ފުޓުބޯޅައާ މުޅިން ދުރަށް ދާން ނުވިސްނާ ކަމަށެވެ. އަދި ފުޓުބޯޅައިގެ ތެރެއިން ކޮންމެސް އެހެން ގޮތަކުން އޭނާ ފެންނާނެ ކަމަށް މާސެލޯ ވަނީ ހާމަކޮށްފައެވެ.

މި ލިޔުން ކިޔާލުމުން

Ads by MSS