އަތޮޅުތަކުގައި ޤަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކައުންސިލްތަކުގެ އެއްބާރުލުން މުހިންމު: އިމިގްރޭޝަން

އަތޮޅުތަކުގައި ޤަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކައުންސިލްތަކުގެ އެއްބާރުލުން މުހިންމުކަމަށް މޯލްޑިވްސް އިމިގްރޭޝަނުން ވިދާޅުވެއްޖެއެވެ. މިކަން ހާމަކުރެއްވީ ޕީއެސްއެމް ނިއުސްއަށް މަޢުލޫމާތު ދެއްވަމުން ޗީފް އިމިގްރޭޝަން އޮފިސަރ އަހުމަދު މުޖްތަބާއެވެ.

މުޖްތަބާ ވިދާޅުވިގޮތުގައި، ޤަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރިއަށްގެންދާ ރެއިޑް އޮޕަރޭޝަންތައް އިމިގްރޭޝަނުން ދަނީ އަތޮޅުތަކަށް ފުޅާ ކުރަމުންނެވެ. މިހާތަނަށް މާލެ ސަރަހައްދުގެ ދެ ރަށެއްގައި މިއޮޕަރޭޝަން ވަނީ ކުރިއަށް ގެންގޮސްފައެވެ.

އަތޮޅުތަކުގެ ރަށްރަށުގައި ހިންގާ އޮޕަރޭޝަންތަކަކީ އެރަށެއްގެ ކައުންސިލްގެ އެދުމުގެ މަތިން ކުރިއަށް ގެންދާ އޮޕަރޭޝަންތަކެއްކަމަށް އޭނާ ވިދާޅުވިއެވެ. އަތޮޅުތަކުން ލިބޭ އެންމެ ބޮޑު ޝަކުވާއަކީ ބިދޭސީން އަމިއްލައަށް މަސައްކަތް ނަގައިގެން އެމަސައްކަތް ކުރާކަމާއި، ރަށަށް ޤަވާއިދާ ޚިލާފަށް އަރާ މަސައްކަތް ކުރަން އުޅޭ ކަމުގެ ޝަކުވާކަމަށް މުޖްތަބާ ފާހަގަކުރެއްވިއެވެ.

އަތޮޅުތެރޭގައި އުޅޭ ބިދޭސީންގެ ކަންކަން އޮންނަނީ އެރަށެއްގެ ކައުންސިލުން ބަލަންޖެހޭ ކަމެއްގެ ގޮތުގައި ކަމަށާއި، އެހެންކަމުން ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން މިހާރު ކުރިއަށް ގެންދާ ކުރަނގި އޮޕަރޭޝަނަށް ކައުންސިލްތަކުން އެއްބާރުލުންދިނުމަކީ މުހިންމު ކަމެއްކަމަށް މުޖްތަބާ ވިދާޅުވިއެވެ.

މީގެއިތުރުން، އަތޮޅުތަކުން ބިދޭސީން ނެގުމަށްފަހު މާލެ ގެނައުމަށް ބޭނުންވާ ދަތުރުފަތުރުގެ ކަންކަން ދިވެހި ފުލުހުންގެ މެރިން ޕޮލިސްއާ ގުޅިގެން ކުރިއަށް ގެންދިޔުމަށް މަޝްވަރާ ކުރަމުންދާކަމަށްވެސް މުޖްތަބާ ހާމަކުރެއްވިއެވެ. މިކަން ހަމަޖެހުމުން މި އޮޕަރޭޝަންތައް ކުރިއަށް ގެންދަން ފަސޭހަވާނެކަމަށް އޭނާ ވިދާޅުވިއެވެ.