ދުނިޔެ
ގާޒާގެ ހޮސްޕިޓަލްތައް އަލުން އިމާރާތްކުރުމަށް އ.ދ ގެ އިންސާނީ އެހީގެ ވެރިޔާ ގޮވާލައިފި
ގާޒާގެ އަލް ޝިފާ ހޮސްޕިޓަލް ފޮޓޯ:އަލްޖަޒީރާ
ގާޒާގައި އިސްރާއީލުގެ ހަނގުރާމައިގެ ސަބަބުން ވީރާނާވެފައިވާ ހޮސްޕިޓަލްތައް އަލުން އިމާރާތްކުރުމަށް އިތުރު ވަސީލަތްތަކަށް އެދި އ.ދ ގެ އިންސާނީ އެހީގެ ވެރިޔާ ޓޮމް ފްލެޗަރ ގޮވާލައިފިއެވެ. 15 މަސްދުވަހުގެ ހަނގުރާމައިގައި އިސްރާއީލުގެ ސިފައިން ވަނީ ގާޒާގެ ގިނަ ހޮސްޕިޓަލްތަކެއް ހަލާކުކޮށްލާފައެވެ.
ފްލެޗަރ ވަނީ ގާޒާގެ އަލް ޝިފާ ހޮސްޕިޓަލަށް ޒިޔާރަތްކޮށް، އެތަނުގެ ހަލާކުވެފައިވާ މަންޒަރުތައް ދައްކުވައިދޭ ވީޑިއޯއެއް އެކްސް ގައި ޝާއިޢުކޮށްފައެވެ. އޭނާ ބުނީ އެތަން ވަނީ "ކަށްވަޅަކަށް" ވެފައި ކަމަށެވެ.
ފްލެޗަރ ބުނި ގޮތުގައި އޭނާ ބައްދަލުކުރި ޑޮކްޓަރުންނަކީ ބަޑީގެ ހަމަލާގެ ތެރޭގައި އޮޕަރޭޝަންތައް ކުރި އަދި ހަމަލާގެ ތެރޭގައި ކުދިން ވިއްސި ޑޮކްޓަރުންނެވެ.
Visiting the rubble of Gaza’s health system.
— Tom Fletcher (@UNReliefChief) February 8, 2025
Hospitals should never be a target.
We must rebuild fast. pic.twitter.com/I0MQTtgC8p
މީގެ އިތުރުން، ކެންސަރު ފަރުވާއަށް ހޮސްޕިޓަލަށް ގެނައި ދަރިފުޅަށް ބަޑިން ހަމަލާދިން އުމުރުން ދުވަސްވީ އަންހެނަކާވެސް ބައްދަލުވި ކަމަށް އޭނާ ބުނިއެވެ. "އޭނާގެ ދަރިފުޅު މަގުމަތީގައި ލޭއޮހޮރެމުންދާ މަންޒަރު އޭނާ ބަލަން ޖެހުނު. އަދި އެ ކުއްޖާއަށް އެހީވާން އައި މެޑިކަލް މުވައްޒަފުންނަށް ވެސް ހަމަލާދިން މަންޒަރު ބަލަން ޖެހުނު،" ފްލެޗަރ ބުންޏެވެ.
މި ހާލަތުގައި ގާޒާގެ ހޮސްޕިޓަލްތައް އަލުން އިމާރާތްކުރުމަށް ބޭނުންވާ އެހީ ހޯދުމަށް އ.ދ ގެ އިންސާނީ އެހީގެ ވެރިޔާ ގޮވާލާފައިވާއިރު، މި މައްސަލައަށް ބައިނަލްއަޤްވާމީ ސަމާލުކަން ލިބޭނެ ކަމަށް އުއްމީދު ކުރެވެއެވެ.
