ބޭސް ލިބުމުގައި ބައެއްފަހަރު ދަތިވަނީ ވަކި ބްރޭންޑެއްގެ ބޭސް ހޯދުމަށް ޑޮކްޓަރުން ބުނާތީ: ޝިމާދު

ބައެއް ބޭސްތައް ހޯދުމުގައި އާންމުންނަށް ދަތިތަކާ ކުރިމަތިވަނީ، ސްޓޭޓް ޓްރޭޑިންގް އޯރގަނައިޒޭޝަން، އެސްޓީއޯގެ ބޭސްފިހާރަތަކުން އެ ބޭނުންވާ ބޭހެއް ލިބެންހުރި ނަމަވެސް، ބައެއް ފަހަރު ބޭހުގެ ވަކި ބްރޭންޑުތަކެއް ޑޮކްޓަރުން ބޭސް ސިޓީގައި ލިޔެފައި ހުންނާތީކަމަށް، އެ ކުންފުނީގެ މެނޭޖިންގް ޑިރެކްޓަރ ޝިމާދު އިބްރާޙިމް ވިދާޅުވެއްޖެއެވެ.

ޝިމާދު ވިދާޅުވީ ދިވެހިން އާންމުކޮށް ބޭނުންކުރާ ބޭސްތައް މިހާރު ވެސް ދަތިކަމެއް ނެތި ލިބެން ހުންނާނެކަމާއި، އަދި ބޭހާ ގުޅިގެން އާންމުންގެ ފަރާތުން ލިބެމުންދާ ޝަކުވާތަކަށް ޙައްލެއް ގެނައުމަކީ އެ ކުންފުނީގެ އަމާޒުކަމުގައެވެ. 

ބޭސް ލިބުމުގައި ދަތިވާކަމަށް ބުނެ ހުށަހަޅާ ޝަކުވާތައް ހައްލު ކުރެވޭނެ އެއްކަމެއްކަމަށް ޝިމާދު ވިދާޅުވީ، ބޭހުގެ ބްރޭންޑުގެ ބަދަލުގައި، އެ ބޭހެއްގެ ޖެނެރިކް ނަން ބޭސް ސީޓީގައި ލިޔުމަށް ޑޮކްޓަރުން ސަމާލުކަން ދިނުމެވެ.

މީގެ އިތުރުން، ރާއްޖޭގެ އެޕްރޫވްޑް ޑްރަގް ލިސްޓުގައި ހިމެނޭ ގާތްގަނޑަކަށް 4،000 އަށް ވުރެން ގިނަ ބޭހުގެ ތެރޭގައި ނުހިމެނޭ ބޭސްތައް ބޭސް ސިޓީގައި ލިޔުމަކީ ވެސް، ބޭސް ލިބުމަށް އާންމުންނަށް ދަތިވާކަމެއްކަމަށް ޝިމާދު ވިދާޅުވިއެވެ. 

ނަމަވެސް މުހިއްމު ބޭހެއް އެޕްރޫވްޑް ޑްރަގް ލިސްޓުގައި ނެތްކަން އެނގި، އެ ލިސްޓަށް ބޭހެއް ނުވަތަ ބޭސްތަކެއް އިތުރުކުރަންޖެހޭފަދަ ހާލަތެއް އަތުވެއްޖެނަމަ، އެ ބޭސްތައް ރާއްޖޭގައި ރަޖިސްޓަރީކޮށް، އިމްޕޯޓުކުރަން މަސައްކަތް ކުރައްވާނެކަމަށް ހާމަކުރެއްވިއެވެ.

މިދިޔަ ހަފްތާގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިއްވެވި ރިޔާސީ ބަޔާނުގައި ވެސް ވަނީ މިކަމަށް އަލިއަޅުވާލައްވާފައެވެ. އެގޮތުން ބޭހުގެ އަގު ކޮންޓްރޯލް ކުރުމުން އާއްމުންނަށް ދަތިތައް ކުރިމަތިވާން ފެށި ކަމަށާއި، ނަމަވެސް އެކަމަށް ފަހަތަށް ނުޖެހި، މި އަހަރު އިތުރު ފިޔަވަޅުތައް ވަރުގަދަކުރާނެކަމަށް އެ މަނިކުފާނު ވަނީ ވިދާޅުވެފައެވެ. 

ބޭހުގެ ނަހަމަ ވިޔަފާރި އާއި ނިޒާމުގެ އިސްރާފު ހުއްޓުވުމަށްޓަކައި މިދިޔަ އަހަރު ވަނީ 250 ބޭހެއްގެ އަގު ކޮންޓްރޯލްކޮށްފައެވެ.