ޚަބަރު
އަލިފާނުގެ ހާދިސާއާ ގުޅިގެން 55 ފަރާތަކަށް ބޯހިޔާވަހިކަން ހަމަޖައްސައިދީފި
އަލިފާން ނިއްވުމަށް އެމްއެންޑީއެފް ފަޔަރ އެންޑް ރެސްކިއު ސަރވިސްއިން ހަރަކާތްތެރިވަނީ، ފޮޓޯ: އެމްއެންޑީއެފް
ހުލާސާ
ބޯހިޔާވަހިކަން ހަމަޖައްސައިދިން މީހުންގެ ތެރޭގައި 20 ބިދޭސީން ހިމެނޭ.
މިއަދު ހެނދުނު މާލޭގައި ހިނގި އަލިފާނުގެ ހާދިސާއާ ގުޅިގެން 55 ފަރާތަކަށް، ނޭޝަނަލް ޑިޒާސްޓަރ މެނޭޖްމެންޓު އޮތޯރިޓީ، އެންޑީއެމްއޭ އިން ބޯހިޔާވަހިކަން ހަމަޖައްސައިދީފިއެވެ.
މި ހާދިސާ ހިނގާފައިވާ މ. ހައުސްޕްލާޒާ ހުންނަނީ ބުރުޒު މަގުގެ، ޝީ ބިލްޑިންގްގެ ދެކުނު ފަރާތުގައެވެ. އަދި މޯލްޑިވްސް ނޭޝަނަލް ޑިފެންސް ފޯސް، އެމްއެންޑީއެފް އިން ބުނެފައިވާ ގޮތުގައި މި ހާދިސާ ހިނގާފައިވަނީ އެ ގޭގައި ހުރި ކުނިތަކެއްގައި ރޯވެގެންނެވެ.
އެންޑީއެމްއޭއިން ހާމަކޮށްފައިވާ ގޮތުގައި، ބޯހިޔާވަހިކަން ހަމަޖައްސައިދޭން ޖެހުނީ، މި ހާދިސާގެ ސަބަބުން ދެ ގެއެއްގެ މައި ފެންހޮޅިއަކަށް ލިބުނު ގެއްލުމަކާ ގުޅިގެންނެވެ. އަދި ބޯހިޔާވަހިކަން ހަމަޖައްސައިދިން މީހުންގެ ތެރޭގައި 20 ބިދޭސީން ހިމެނޭކަމަށް ވެސް އެ އޮތޯރިޓީން ވަނީ ހާމަކޮށްފައެވެ.
މ.ހައުސް ޕްލާޒާގައި މިއަދު ހިނގި އަލިފާނުގެ ހާދިސާގެ ސަބަބުން ، ދެ ގެއެއްގެ މައި ފެންހޮޅިއަށް ލިބުނު ގެއްލުމާއި ގުޅިގެން އެކަން މަރާމާތުކުރެވެންދެން 2 ގެއަކުން 55 ފަރާތަކަށް(20 ބިދޭސީން ހިމެނޭހެން) ވަގުތީ ބޯހިޔާވަހިކަން ވަނީ ހަމަޖައްސައިދެވިފައި.
— NDMA Maldives (@NDMAmv) February 9, 2025
މި ހާދިސާ ހިނގި ގެއަކީ ގިނަ ދުވަސްތަކެއް ވަންދެން ފަޅުގެއެއްގެ ގޮތުގައި ހުރި ތަނެކެވެ. އަދި މި ހާދިސާގެ މަޢުލޫމާތު ލިބުނީ 6:35 ހާއިރު ކަމަށާއި، ގާތްގަނޑަކަށް 7:47ގައި އަލިފާންގަނޑު އެއްކޮށް ނިއްވާލާފައިވާކަމަށް އެމްއެންޑީއެފް އިން ވަނީ ހާމަކޮށްފައެވެ.
