ޚަބަރު / ކުޅިވަރު
ކުޅިވަރު މުބާރާތްތައް ބައިނަލްއަޤްވާމީ މިންގަނޑަށް ގެނައުމަށް މަސައްކަތް ފަށައިފި

ކޮމިޝަނަރ އޮފް ސްޕޯޓްސް މުހައްމަދު ޠަލާލު ފޮޓޯ:ރައީސް އޮފީސް
ރާއްޖޭގައި ބާއްވާ އެކި ކުޅިވަރު މުބާރާތްތައް ބައިނަލްއަޤްވާމީ މިންގަނޑުތަކާ އެއްގޮތަށް ބޭއްވުމަށް މިއަހަރު އިސްކަންދޭނެ ކަމަށް ކޮމިޝަނަރ އޮފް ސްޕޯޓްސް މުހައްމަދު ޠަލާލު ވިދާޅުވެއްޖެއެވެ. މިކަން ޠަލާލު ހާމަކުރެއްވީ ޕީއެސްއެމް ނިއުސްއަށް ދެއްވި ޚާއްޞަ އިންޓަވިއުއެއްގައެވެ.
ކުޅިވަރުން ޤައުމަށް ރީތިނަން ހޯދައިދިނުމަށްޓަކައި ކުޅިވަރާ ބެހޭ ވަޒީރު އަބްދުﷲ ރާފިޢު ކުރައްވާ މަސައްކަތުގައި އެސޯސިއޭޝަންތަކުގެ އެއްބާރުލުން ހޯދުމަށާއި، ކޮމިޝަނަރގެ އޮފީހާއި އެސޯސިއޭޝަންތަކާ އެކު މަސައްކަތްކޮށް ކުރިޔަށް ދިއުމަށް އިސްކަން ދެއްވާނެ ކަމަށް ޠަލާލު ވިދާޅުވިއެވެ.
މީގެ އިތުރުން، މަޖިލީހުގެ ޖަލްސާތައް ފެށުމުން ކުޅިވަރުގެ ޤާނޫނަށް ބަދަލުތަކެއް ގެނައުމަށް މަސައްކަތް ކުރައްވާނެ ކަމަށާއި، ޤާނޫނުތަކާއި ޤަވާއިދުތަކާ އެއްގޮތްވާ ގޮތުގެ މަތިން އެސޯސިއޭޝަންތައް ހިންގުމަށް ގެންނަންޖެހޭ އިޞްލާޙުތައް ގެނައުމަށްވެސް މިއަހަރު އިސްކަން ދެއްވާނެ ކަމަށް ޠަލާލު ވިދާޅުވިއެވެ.
ކުޅިވަރު ކުޅުންތެރިންނާއި ކުޅިވަރުގެ ޚިދުމަތްތެރިންގެ އަގުވަޒަންކުރުމުގެ ގޮތުން، ރައީސުލްޖުމްހޫރިއްޔާ މުޢިއްޒު އިބްރާހީމްގެ ވަޢުދުފުޅާ އެއްގޮތަށް، ވެޓްރަންސް ދަފްތަރެއް އެކުލަވާލައި، އެ ބޭފުޅުންނަށް ލިބިދޭންޖެހޭ މަންފާތައް ލިބޭނެ ގޮތް ހަމަޖެއްސުމަކީވެސް މިއަހަރު ތެރޭގައި ޚާއްޞަ އިސްކަމެއް ދީގެން ކުރައްވާނެ ކަމެއް ކަމުގައި ޠަލާލު ފާހަގަކުރެއްވިއެވެ.
ޠަލާލު އިތުރަށް ވިދާޅުވި ގޮތުގައި، އެންމެ ބޮޑަށް ބެއްލެވީ ޤާނޫނީ ގޮތުން އެސޯސިއޭޝަންތަކުން ކުރަން ހުރި ކަންކަން ފުރިހަމަކުރުމެވެ. އަދި އެ މައްސަލަތަކަށް ޙައްލު ހޯދުމަށްފަހު، އެސޯސިއޭޝަންތަކުގެ ހުރި ގޮންޖެހުންތަކުން އަރައިގަތުމަށް ކުރިޔަށްދާނެ މަގެއް ދެއްކުމަށް މަސައްކަތް ކުރެވުނު ކަމަށްވެސް ވިދާޅުވިއެވެ.
ކޮމިޝަނަރ އޮފް ސްޕޯޓްސްގެ މަޤާމާ ހަވާލުވުމަށްފަހު، ޠަލާލު ވަނީ އެސޯސިއޭޝަންތަކުގެ ހިންގުން ހަރުދަނާކުރުމަށްޓަކައި ގިނަ މަސައްކަތްތަކެއް ކުރައްވާފައެވެ.