Ads by Exprox

ޚަބަރު

ރާއްޖެއަށް ފަތުރުވެރިން އައުން އިތުރުވަނީ: މިދިޔަ ހަފްތާގައި 55,000 އަށްވުރެ ގިނަ ފަތުރުވެރިން ޒިޔާރަތްކުރި

ރާއްޖެއަށް ފަތުރުވެރިން އައުން އިތުރުވަނީ: މިދިޔަ ހަފްތާގައި 55,000 އަށްވުރެ ގިނަ ފަތުރުވެރިން ޒިޔާރަތްކުރި

ރާއްޖެއަށް ޒިޔާރާތް ކުރާ ފަތުރުވެރިން ފޮޓޯ: ވިޒިޓް މޯލްޑިވްސް

އާމިނަތު ޔުމްނާ

އާމިނަތު ޔުމްނާ

09 ފެބްރުއަރީ 2025، 12:00

09 ފެބްރުއަރީ 2025، 12:00

ރާއްޖޭގެ ފަތުރުވެރިކަމުގެ ދާއިރާ އިތުރަށް ކުރިއަރަމުންދާކަން ފާހަގަކުރެވޭ ގޮތަށް، މިދިޔަ ހަފްތާގައި ރާއްޖެއަށް ބައި ލައްކައަށްވުރެ ގިނަ ފަތުރުވެރިން ޒިޔާރަތްކޮށްފައިވާކަމަށް ފަތުރުވެރިކަމާބެހޭ ވުޒާރާގެ ތަފާސްހިސާބުތަކުން ދައްކައިފިއެވެ.

މި ތަފާސްހިސާބުތަކުން ދައްކާގޮތުގައި މިދިޔަ ހަފްތާގައި ރާއްޖެއަށް ޒިޔާރަތްކޮށްފައިވަނީ 55,558 ފަތުރުވެރިންނެވެ. މިއީ މިދިޔަ އަހަރުގެ މަހަރުގެ މި މުއްދަތާ އަޅާބަލާއިރު 5 އިންސައްތައިގެ ކުރިއެރުމެކެވެ. މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 52,511 ފަތުރުވެރިންނެވެ.

އަހަރުގެ މިހާތަނަށް އެއް ދުވަހެއްގައި އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވަނީ މި މަހުގެ 1 ވަނަ ދުވަހުއެވެ. އެ ދުވަހު ރާއްޖެއަށް 9,495 ފަތުރުވެރިން ޒިޔާރަތްކޮށްފައިވެއެވެ. މިހާރު ރާއްޖެއަށް އެވްރެޖްކޮށް ކޮންމެ ދުވަހަކު 7,000 އަށްވުރެ ގިނަ ފަތުރުވެރިން ޒިޔާރަތްކުރާކަން ފާހަގަކުރެވެއެވެ.

މި މަހުގެ 8 ވަނަ ދުވަހުގެ ނިޔަލަށް ރާއްޖެއަށް ޒިޔާރަތްކޮށްފައިވަނީ 279,916 ފަތުރުވެރިންނެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 11.2 އިންސައްތައިގެ ކުރިއެރުމެކެވެ. މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވަނީ 251,503 ފަތުރުވެރިންނެވެ.

ރާއްޖެއަށް މިހާރު އެންމެ ގިނަ އަދަދަކަށް ފަތުރުވެރިން އަންނަނީ ޗައިނާއިންނެވެ. އަހަރުގެ މިހާތަނަށް ޗައިނާއިން ވަނީ ބައިލައްކައަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައެވެ. ދެވަނައަށް އެންމެ ގިނަ އަދަދަކަށް ފަތުރުވެރިން ރާއްޖެއަށް އައިސްފައިވަނީ ރަޝިއާއިންނެވެ.

ރާއްޖެއަށް އައި ފަތުރުވެރިންގެ ތެރެއިން 69.7 އިންސައްތަ ފަތުރުވެރިން ޗުއްޓީ ހޭދަކޮށްފައިވަނީ ރިސޯޓުތަކުގައެވެ. އަދި 25.4 އިންސައްތަ ފަތުރުވެރިން ޗުއްޓީ ހޭދަކޮށްފައިވަނީ ގެސްޓުހައުސްތަކުގައެވެ.

ސަރުކާރުން މި އަހަރަށް ވަނީ 2.3 މިލިއަން ފަތުރުވެރިން ގެނައުމަށް އަމާޒު ހިފާފައެވެ. މިއީ މިދިޔަ އަހަރު ރާއްޖެއަށް ޒިޔާރަތްކޮށްފައިވާ 2 މިލިއަން ފަތުރުވެރިންނާ އަޅާބަލާއިރު 3 ލައްކަ ފަތުރުވެރިން އިތުރު އަދަދެކެވެ.
                    

މި ލިޔުން ކިޔާލުމުން

Ads by MSS