އަމީނީ މަގު ސަރަހައްދުގައި ތާރުއަޅައި ނިމިއްޖެ، ވަރަށް އަވަހަށް މަގު ހުޅުވަން ނިންމައިފި

އަމީނީ މަގުގެ ހަލާކުވެފައިވާ ސަރަހައްދު މަރާމާތުކޮށް ތާރުއެޅުމުގެ މަސައްކަތް ނިންމައިފިއެވެ. އާރްޑީސީއިން ވިދާޅުވީ، މަގު ހުޅުވުމުގެ ކުރިން ނިންމަންޖެހޭ އެސެސްމެންޓުތައް ނިމުމާއެކު، އިމާރާތްކުރުމާ ބެހޭ ވުޒާރާއިން، އާންމުންގެ ބޭނުންތަކަށް މަގު ހުޅުވާލާނެކަމަށެވެ. 

އަމީނީ މަގު މާފަންނު ސްޓޭޑިއަމް ސަރަހައްދުގެ ތާރުގަނޑު ވަރަށް ބޮޑަށް ހަލާކުވެ، ވަޅުހެދުމުގެ ސަބަބުން އެ ސަރައްހައްދު މަރާމާތުކުރުމުގެ މަސައްކަތް މިމަހުގެ 11 ވަނަ ދުވަހު ވަނީ ފަށާފައެވެ. 2023 ވަނަ އަހަރު މިތަންތަން މަރާމާތުކޮށްފައި ވީނަމަވެސް، ކުރުމުއްދަތެއްގެ ތެރޭގައި މި މަގުތައް އަޑިގުޑަންވެ، އާންމުނަށް ގިނަ ގޮންޖެހުންތަކަކާ ކުރިމަތިލާން ޖެހުނެވެ. ޓެކްނިކަލް ފަރާތްތަކުން ވިދާޅުވާ ގޮތުގައި އެހާ އަވަހަށް މި ތާރުގަނޑު ހަލާކުވުމަށް މެދުވެރުވި ސަބަބަކީ ތާރުގަނޑު ރަނގަޅަށް ނުހިކެނީސް، އެ މަގު ބޭނުން ކުރުމަށް ހުޅުވައިލާފައިވުމެވެ. 

އަމީނީ މަގުގެ މި ސަރަހައްދުގެ ތާރުއެޅުން މިހާރު ވަނީ ނިންމާލާފައެވެ. މިފަހަރު މަރާމާތުކޮށް ނިމިފައި ވީނަމަވެސް، މަގު ހުޅުވައިލާނީ ތާރުގަނޑު އެއްކޮށް ހިކުމުން ކަމަށް އާރްޑީސީން ވަނީ ވިދާޅުވެފައެވެ.

މަގުގެ މަސައްކަތްތައް ލަސްވެގެން ދިޔަ ސަބަބެއްގެ ގޮތުގައި އާރްޑީސީ ކުންފުނިން ފާހަގަކުރަނީ މަގުގެ މަސައްކަތް ފެށި ދުވަސްވަރު ވިއްސާރަވުމުގެ ސަބަބުން ކުރިމަތިވި ބައެއް ލަސްތަކެއް ކަމުގައި އެ ކުންފުނިން ވިދާޅުވެފައިވެއެވެ.

ސަރުކާރުން 84.4 މިލިޔަން ރުފިޔާ ޚަރަދުކުރައްވައިގެން ކުރިއަށްގެންދިޔަ، އަމީނީ މަގު ތަރައްޤީކުރުމުގެ މަޝްރޫޢުގެ ދަށުން ޖުމްލަ 1.79 ކިލޯމީޓަރުގެ ސަރަހައްދެއް ތާރު އަޅައިގެން ޒަމާނީ ފެންވަރަށް ތަރައްޤީކޮށްފަވެއެވެ. އަމީނީ މަގުގެ މަސައްކަތް މުޅިން ނިންމާފައިވަނީ މިދިޔަ އަހަރުގެ ޖެނުއަރީ މަހުއެވެ.