ނަމީބިއާގެ މިނިވަންކަމުގެ އިންޤިލާބީ ލީޑަރު ސަމް ނުޖޯމާ އަވަހާރަވެއްޖެ

ނަމީބިއާގެ މިނިވަންކަމަށް މަގުފަހިކޮށްދިން އިންޤިލާބީ ލީޑަރު އަދި އެ ޤައުމުގެ ފުރަތަމަ ރައީސް ސަމް ނުޖޯމާ 95 އަހަރުގެ އުމުރުފުޅުގައި އިއްޔެ ރޭ އަވަހާރަވެއްޖެއެވެ. ނަމީބިއާގެ "ޤައުމުގެ ބައްޕަ" ގެ ގޮތުގައި ލަޤަބު ދެވިފައިވާ ނުޖޯމާ އަވަހާރަވީ ވިންޑްހޯކްގެ ހޮސްޕިޓަލެއްގައި 3 ހަފްތާ ވަންދެން ފަރުވާ ހޯއްދަވަމުން ގެންދެވިފަހުންނެވެ.

ނުޖޯމާގެ އަވަހާރަވުމާ ގުޅިގެން ނަމީބިއާގެ ސަރުކާރުން  ނެރުނު ބަޔާނެއްގައި ވަނީ "ނަމީބިއާ ޖުމްހޫރިއްޔާގެ ބިންގާ ހެލިފައިވާ" ކަމަށް ބަޔާންކޮށްފައެވެ. އަދި ޤައުމީ ހިތާމައިގެ މުއްދަތެއް އިޢުލާނު ކުރާނެ ކަމަށްވެސް ބުނެފައިވެއެވެ.

ނުޖޯމާއަކީ 1990 ގައި ނަމީބިއާ އެޕާޓައިޑް ދެކުނު އެފްރިކާގެ ބާރުގެ ދަށުން މިނިވަންވުމަށް މަގުފަހިކޮށްދިން އަދި 15 އަހަރު ވަންދެން އެ ޤައުމުގެ ރައީސްކަން ކުރެއްވި ބޭފުޅެކެވެ. އޭނާއަކީ ނެލްސަން މަންޑޭލާ، ރޮބަޓް މުގާބޭ، ކެނެތް ކައުންޑާ އަދި ސަމޯރާ މަޗެލް ފަދަ އެފްރިކާގެ ޤައުމުތައް ކޮލޯނިއަލް އަދި މަދު އަދަދެއްގެ ދޮން މީހުންގެ ވެރިކަމުން މިނިވަންކުރުވި ޖީލުގެ އެންމެ ފަހު ލީޑަރެވެ.

1960 ގައި އުފެދުނު ސައުތު ވެސްޓް އެފްރިކާ ޕީޕަލްސް އޯގަނައިޒޭޝަން (ސްވާޕޯ) ގެ އިސް ލީޑަރެއްގެ ގޮތުގައި ނުޖޯމާ ހުންނެވި އިރު، މިނިވަންކަމަށްފަހު ވެސް ސްވާޕޯ ވަނީ ވެރިކަމުގައި ދެމިހުރެފައެވެ. ނުޖޯމާ ވަނީ 2005 ގައި ރައީސްކަމުން ވަކިވެވަޑައިގަތުމަށްފަހު 2007 ގައި 78 އަހަރުގެ އުމުރުފުޅުގައި ސިޔާސީ މައިދާނުން މުޅިން ވަކިވެވަޑައިގެންފައެވެ.

ނަމީބިއާގެ ގިނަ ރައްޔިތުން ދެކޭގޮތުގައި މިނިވަންކަމަށް ކުރެވުނު ހަނގުރާމައާއި ދެކުނު އެފްރިކާގެ ސިޔާސަތުތަކުގެ ސަބަބުން އުފެދުނު ބައިބައިވުންތަކަށްފަހު ޤައުމީ އެއްބައިވަންތަކަމާއި އެކުވެރިކަން އާލާކުރުމުގައި ނުޖޯމާގެ ލީޑަރޝިޕް ވަނީ މުހިންމު ދައުރެއް އަދާކޮށްފައެވެ.