އެކްސިޑެންޓުވުމުން މަސްތުގެ ހާލަތުގައިކަމަށް ހައްޔަރު ކުރީ: ޓެސްޓުތައް ނައްސި

މަސްތުގެ ހާލަތުގައި އިން މީހަކުކަމަށް ލަފާކުރެވޭ މީހަކު ދުއްވަމުން ދިޔަ އުޅަނދެއް އެކްސިޑެންޓްވި މަޢުލޫމާތު ލިބި، މަސްތުވާތަކެއްޗަށް ފުލުހުން ކުރި ޓެސްޓު ނައްސިވެއްޖެއެވެ.

މަސްތުގެ ޚާލަތުގައިކަމަށް ލަފާކުރެވޭ މީހަކު ހުޅުމާލޭގައި ވޭނެއް ދުއްވަމުންދާކަމުގެ ޚަބަރު ފުލުހުންނަށް ލިބިފައި ވަނީ 25 ފެބްރުއަރީ 2025 ވަނަ ދުވަހުގެ ހެނދުނު 10:34ގައެވެ. މި މަޢުލޫމާތާ ގުޅިގެން ފުލުހުން މި އުޅަނދު ދުއްވަމުން ދާކަމަށް ޚަބަރު ލިބުނު ހިސާބަށް ދިޔައިރު، ވޭން އޮތީ، ހުޅުމާލެ ފިތުރޯނު މަގު އަރިމައްޗަށް އަރައި އެކްސިޑެންޓުވެފައި ކަމަށް ފުލުހުން މަޢުލޫމާތު ދެއްވައެވެ. 

މި މައްސަލަ އިތުރަށް ބަލުމުގެ ތެރޭގައި، މި ޑްރައިވަރު ފިތުރޯނުމަގަށް އެރުމުގެ ކުރިން، ފޭސް ދެއަކުން ފޭސް އެކަކަށް އެރި ބްރިޖު ގުޅުވައިދޭ ތާންގައިވާ ބްރިޖު ޑިވައިޑާރގައި ޖެހި ވެސް އެކްސިޑެންޓުވެފައި ވާކަމަށް ފުލުހުން މަޢުލޫމާތު ދެއްވާފައިވެއެވެ. 

މި މައްސަލަ ތަޙުޤީޤުކުރުމަށް، މި އުޅަނދު ދުއްވި ޑްރައިވަރު ފުލުހުންގެ ބެލުމުގެދަށަށް ގެންގޮސް، ކުޑަކަމުދާ ތަކެތި ޓެސްޓުކޮށްފައިވެއެވެ. މި ޓެސްޓުގައި އެއްވެސް ކަހަލަ މަސްތުވާއެއްޗަކަށް މި ޑްރައިވަރު ފައްސިވެފައި ނުވާކަމަށް، ފުލުހުން މަޢުލުމާތު ދެއްވައެވެ. އެހެންކަމުން އެދުވަހުގެ 17:28 ކަންހާއިރު އެމީހާވަނީ ދޫކޮށްލާފައެވެ.

އެމީހާ ފުލުހުންގެ ބެލުމުގެ ދަށަށް ގެންދިޔުމަށްފަހު އޭނާގެ ޢަމަލުތައް ހުންނަ ގޮތް އެސެސްކުރެވެމުން ދާކަމަށާއި، މި އެކްސިޑެންޓުތައް ހިނގައިފައި ވަނީ އެއްވެސް ގޮތަކުން އެއްވެސް ފަރާތެއްގެ އިހުމާލެއް އޭގައި އޮވެގެންތޯ ބަލައި، އެފަރާތްތަކާމެދު އަޅަންޖެހޭ ފިޔަވަޅުތައް އަޅާނެކަމަށް ފުލުހުން ވިދާޅުވެފައިވެއެވެ.