ޚަބަރު
ފަތުރުވެރިކަމުގެ ރަށްތައް ތަރައްޤީކުރުމަށް އިންވެސްޓަރުންނަށް އިތުރު ފުރުސަތު ދޭން ސަރުކާރުން ނިންމައިފި

ފަތުރުވެރިކަމާއި ތިމާވެއްޓާބެހޭ ވަޒީރު ޠާރިޤު އިބްރާހީމް ފޮޓޯ:އެޑިޝަން
ފަތުރުވެރިކަން ތަރައްޤީކުރުމަށް ދޫކޮށްފައިވާ ރަށްތަކުގެ ތެރެއިން މަސައްކަތް ހުއްޓިފައި ހުރި ރަށްތައް ސަރުކާރަށް އަނބުރާ ނެގުމުގެ ބަދަލުގައި، އިންވެސްޓަރުންނަށް މަސައްކަތް ކުރިއަށްގެންދިޔުމަށް ހުރި ދަތިތަކަށް ހައްލު ހޯދައިދިނުމަށް ސަރުކާރުން ނިންމައިފިއެވެ. މިކަން ހާމަކުރައްވާފައިވަނީ ފަތުރުވެރިކަމާއި ތިމާވެއްޓާބެހޭ ވަޒީރު ޠާރިޤު އިބްރާހީމެވެ.
ވަޒީރު މިހެން ވިދާޅުވެފައިވަނީ ދައުލަތުގެ މީޑިއާގެ ރާއްޖެމިއަދު ޕްރޮގްރާމްގައި ވާހަކަފުޅުދައްކަވަމުންނެވެ. މި ޕްރޮގްރާމްގައި ވާހަކަފުޅުދައްކަވަމުން ވަޒީރު ވިދާޅުވީ ފަތުރުވެރިކަން ތަރައްޤީކުރުމަށް ދޫކޮށްފައި ހުރި ރަށްތަކުގެ ތެރެއިން ގިނަ ދުވަސްވެފައިވާ 68 ރަށެއް ފާހަގަކުރެވިފައިވާ ކަމަށެވެ. މީގެ ތެރޭގައި 8 އަހަރަށްވުރެ ގިނަ ދުވަސްވެފައިވާ ރަށްތައް ހިމެނޭއިރު، ސަރުކާރުން ބޭނުންވަނީ މި ރަށްތައް ފަތުރުވެރިކަމަށް ނުނެރެވި ހުރި ސަބަބުތައް ދެނެގަނެ އިންވެސްޓަރުންނަށް ހުރި ދަތިތަކަށް ހައްލު ހޯދައިދިނުމަށް ކަމަށް ވަޒީރު ވިދާޅުވިއެވެ.
މަސައްކަތްތައް ހުއްޓިފައި ހުރި ވާހަކަ ނުދައްކާ، ބޭނުންވަނީ އެކަންކަމަށް ޙައްލުތައް ހޯދާ ކުރިއަށްދެވޭނެ މަގުތައް ކޮށައިދޭން. ރައީސްގެވެސް ވިސްނުމަކީ މިއީ. އެކަމާ ގުޅޭ ޤާނޫނުތަކާއި އުސޫލުތަކަށްވެސް ބަދަލުތައް، ލުއިފަސޭހަވާނެގޮތަށް ގެންނަންޖެހޭ
ވަޒީރު
މީގެއިތުރުން، ބޮޑެތި މަޝްރޫޢުތަކަށް ނަގަންޖެހޭ ހުއްދަތައް ނެގުމާއި ލިޔެކިޔުންތައް ހޯދުމުގެ މަސައްކަތް ލުއިފަސޭހަކުރުމަށް ބައެއް ބަދަލުތައް ގެނައުމުގެ މަސައްކަތް ކުރަމުންދާކަމަށްވެސް ވަޒީރު ވިދާޅުވިއެވެ. މިގޮތުން، އެކްރެޑިޓް ޗެކަރއެއްގެ ގޮތުގައި އިންޖިނިއަރިން ކޮންސަލްޓެންސީ ޕޫލްއެއް އުފެއްދުމުގެ މަސައްކަތް ކުރަމުންދާކަމަށާއި، ކޮންސަލްޓަންޓުން ހޯދުމަށް ވަރަށް އަވަހަށް ހުޅުވާލާނެކަމަށް ވަޒީރު ވިދާޅުވިއެވެ.
ރާއްޖޭގައި މިވަގުތު 176 ރިސޯޓް ތަރައްޤީކޮށް ޚިދުމަތްދެމުންދާއިރު، 165 ރަށެއް ތަރައްޤީކުރުމުގެ މަސައްކަތް ކުރިއަށްދާކަމަށް ވަޒީރު ވިދާޅުވިއެވެ. އަދި މިއަހަރު 6 ރިސޯޓް ހުޅުވި، ސިނާޢަތަށް 1290 އެނދު އިތުރުވާނެކަމަށް އަންދާޒާކުރެވޭކަމަށްވެސް ވަޒީރު ވިދާޅުވިއެވެ.