ރަމަޟާން މަހާ ދިމާކޮށް އެޗްޑީސީން ކުރިއަށްގެންދާ "އެއްގެއިން އަނެއްގެއަށް" ކެމްޕެއިނަށް ބޮޑު ތަރުހީބެއް

ރަމަޟާން މަހާ ދިމާކޮށް، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ކުރިއަށްގެންދާ "އެއްގެއިން އަނެއްގެއަށް" ކެމްޕެއިނަށް އާންމުންގެ ފަރާތުން ވަރަށް ބޮޑު ތަރުހީބެއް ލިބެމުންދާ ކަމަށް އެ ކުންފުނިން މަޢުލޫމާތު ދީފިއެވެ.

މި މަހުގެ 1 އިން 16 އަށް ކުރިއަށްދާ މި ކެމްޕެއިންގެ ދަށުން މިހާތަނަށް 89 އައިޓަމް ހަދިޔާ ކުރެވިފައިވާ ކަމަށް އެޗްޑީސީން ބުނެއެވެ. އަދި މިހާތަނަށް އެންމެ ގިނައިން ހަދިޔާކޮށްފައިވަނީ ފަރުނީޗަރު ކަމަށްވެސް އެ ކުންފުނިން ފާހަގަކޮށްފައިވެއެވެ.

ޕީއެސްއެމް ނިއުސްއަށް މަޢުލޫމާތު ދެމުން، އެޗްޑީސީގެ މާކެޓިންގ އެންޑް ޕަބްލިކް ރިލޭޝަންގެ އެސިސްޓެންޓް ޑިރެކްޓަރ ހަސަން ޝަހީދު ވިދާޅުވީ، ރަމަޟާން މަހަށް ތައްޔާރުވުމުގެ ގޮތުން ގޭގައި ހިފާގެންގުޅޭ ސާމާނާއި ފަރުނީޗަރު ފަދަ ތަކެތި އައު ކުރުމަކީ ގިނަ ބައެއްގެ ސަޤާފަތެއް ކަމަށެވެ. ނަމަވެސް، މިގޮތަށް އައު ކުރާއިރު ބޭނުން ހިފޭ އެއްޗެހިވެސް އުކާލާކަން ފާހަގަކުރެވޭތީ، މި ހަރަކާތުގެ އެންމެ ބޮޑު ބޭނުމަކީ މިފަދަ ތަކެތި އުކާލުމުގެ ބަދަލުގައި، ބޭނުންޖެހިފައިވާ އެހެން ފަރާތަކަށް ހަދިޔާކުރުމުގެ ފުރުޞަތު ދިނުން ކަމަށް އޭނާ ވިދާޅުވިއެވެ.

މި ޕްރޮގްރާމަށް މާލޭގެ އިތުރުން އަތޮޅުތަކުގެ ބައެއް ރަށްރަށުން ވެސް ތަރުހީބު ލިބެމުންދާކަން ޝާހިދު ފާހަގަކުރެއްވިއެވެ. އެޗްޑީސީގެ އެންމެ ފަހުގެ ތަފާސްހިސާބުތަކުން ދައްކާ ގޮތުގައި، މި ކެމްޕެއިނާ ގުޅޭގޮތުން މަޢުލޫމާތު ސާފުކުރުމަށް 249 ފަރާތަކުން ގުޅާފައިވާއިރު، 86 ފަރާތަކުން ތަކެތި ހަދިޔާކުރުމަށް އެދިފައިވެއެވެ. މީގެ އިތުރުން 101 އައިޓަމް ލިބި، 89 އައިޓަމް ހަދިޔާކުރެވިފައިވެއެވެ.

އެޗްޑީސީން ބުނާ ގޮތުގައި މި ކެމްޕެއިންގެ މަޤްޞަދަކީ، އެކަކު އަނެކަކަށް ތަކެތި ހަދިޔާކުރުމާއި، ބޭނުންޖެހިފައިވާ ފަރާތްތަކަށް ތަކެތި ފޯރުކޮށްދީ އެހީތެރިވުމަށް ބާރު އެޅުމެވެ. އަދި މިއީ، ރަމަޟާން މަހާ ދިމާކޮށް ފްލެޓުތަކުން އުކާލުމަށް ނެރެފައި ހުންނަ ކުނީގެ މައްސަލަ ހައްލުކުރުމާއެކު، ކުނީގެ ގޮތުގައި ނައްތާލަންޖެހޭ ތަކެތި މަދުކޮށް، އަލުން ބޭނުންކުރުމަށް ބާރުއަޅައި، އިސްރާފު މަދުކުރުމަށް ކުރިޔަށްގެންދާ ކެމްޕެއިނެކެވެ.

މި ކެމްޕެއިނަށް ތަކެތި ހަދިޔާކުރަން ބޭނުންވާ ފަރާތްތަކުން، އެޗްޑީސީގެ ހޮޓްލައިން ނަންބަރު 7412111 އަށް ގުޅުމަށް ކުންމަށް ކުންފުނިން އެދިފައިވެއެވެ.

އެޗްޑީސީން އިތުރަށް މަޢުލޫމާތު ދިނުމުގައި، މި ކެމްޕެއިންގެ ދަށުން ހަދިޔާކުރާ ތަކެތި ރުއްގަނޑު އެކެއްގައި ބެހެއްޓިފައި ހުންނާނެ ކަމަށް ބުނެފައިވެއެވެ. އެ ސަރަހައްދުން ބޭނުންވާ ތަކެތި ފާހަގަކުރުމުން އެޗްޑީސީގެ ޓީމުން އެ ތަކެތި ހިލޭ ގޭގެއަށް ގެންގޮސްދޭނެ ކަމަށްވެސް އެ ކުންފުނިން ބުނެފައިވެއެވެ.

މި ކެމްޕެއިނަކީ ރަމަޟާން މަހުގެ ރޫހާ އެއްގޮތަށް، އެކަކު އަނެކަކަށް އެހީތެރިވުމުގެ ރޫހު އާލާކޮށް، އިޖުތިމާޢީ ގުޅުން ބަދަހިކުރުމަށް މަގުފަހިކުރާނެ ކަމެއްގެ ގޮތުގައި ބެލެވެއެވެ. މީގެ އިތުރުން، ތިމާވެށި ހިމާޔަތްކުރުމަށާއި ދެމެހެއްޓެނިވި ގޮތެއްގައި ވަސީލަތްތައް ބޭނުންކުރުމަށް ހިތްވަރުދޭ ކަމެއްގެ ގޮތުގައިވެސް މި ކެމްޕެއިން ފާހަގަކުރެވެއެވެ.