ސައިންސް

ނިދި އަންނަނީ ކީއްވެ؟

ނިދި އަންނަނީ ކީއްވެ؟

ނިދުން/ ފޮޓޯ: އިންޓާރނެޓް

09 ފެބްރުއަރީ 2025، 03:30

ނިދުމަކީ، މަރުވުން ކަހަލަ ކަމެކޭ މީހުން ބުނާތީ އަހަމެވެ. ނިންޖާ ނުލާ އެއްވެސް އިންސާނަކަށް ދިރިއެއް ނޫޅެވޭނެއެވެ. ގޭތެރޭގެ މަސައްކަތްތަކާއި، ވަޒީފާއާއި، ކިޔެވުމާއި، ދަރީންގެ ކަންތައްތައް ކުރުމުގައި އުޅޭއިރު ނިދަން ނުޖެހޭ ނަމަ ހާދަހާ ކަމެއް ނިންމުނީހޭ، ހަމަ އެންމެން ވެސް ހިތަށް އަރާނެއެވެ. ދިރިއުޅުމުގެ ކަންކަމުގައި 24 ގަޑިއިރު މަދުވެފައި އޮންނައިރު، ނިދުމުގެ ފަހަތުގައިވާ ސައިންޓިފިކް ޙަޤީޤަތަކީ ކޮބައިތޯ ބަލައިލުން މުހިންމެވެ.

ނިދި އަންނަނީ، އިންސާނުންގެ ހަށިގަނޑުގައި އުފެދޭ ހޯރމޯނެއް ކަމަށްވާ މެލަޓޯނިން ލެވަލް މަތިވާވަރަކަށެވެ. ދުވަހުގެ ވަގުތުތައް ފާއިތުވަމުން ދާވަރަކަށް، ހަށިގަނޑުގައި އުފެދޭ މެލަޓޯނިން ލެވަލް ދާނީ މަތިވަމުންނެވެ. މައިގަނޑު ގޮތެއްގައި, ހަށިގަނޑުގައި މެލަޓޯނިން އުފެދުމަށް މެދުވެރި ވަނީ، އަނދިރި މާޙައުލަކަށް ދެވުމުންނެވެ. ހަވީރުވެ، އިރުއޮއްސެމުން ދާއިރު، ސިކުނޑީގައިވާ ޕިނިއަލް ގްލޭންޑުން މި ހޯރމޯން އުފައްދާމިންވަރު އިތުރުކޮށް، ރޭގަނޑުގެ ނިންޖަށް މީހާ ތައްޔާރުކޮށްދެއެވެ.

ނިދާ ހޭލާ ވަގުތަކީ އިންސާނުންގެ ހަށިގަނޑުގައި ކޯރޓިސޯލް ހޯރމޯން އެންމެ މަތިވާ ވަގުތެވެ. ކޯރޓިސޯލް ހޯމޯން މަތިވުމުގެ ސަބަބުން މޫޑު ރަނގަޅުވެ، ގައިގައި ވަރުޖެހި، ބޮޑެތި މަސައްކަތްތައް އަވަހަށް ނިންމުމަށް ފަސޭހަވެގެންދެއެވެ. ކޯރޓިސޯލް އިތުރުވާ އެހެން ސަބަބުތަކުގެ ތެރޭގައި ފިކުރު ބޮޑުވުމާއި، ދިރިއުޅުމުގެ ކަންތައްތައް ތަރުތީބުވެފައިވާ ގޮތުން މީހާގެ ސްޓްރެސް ލެވެލް މަތިވުން ހިމެނިގެންދެއެވެ.

މެލަޓޯނިންއާއި ކޯރޓިސޯލްގެ ސައިކަލްއަކީ، އިރު އެރުމާއި އިރު އޮއްސުމުގެ މައްޗަށް ބިނާވާ ނިޒާމެކެވެ. އެތައް ޤަރުނެއް ވަންދެން، މި ނިޒާމަކީ ނިދުމުގެ ނިޒާމުގެ ގޮތުގައި މުޅި ދުނިޔޭގައި ވެސް އާންމުވެފައިވީ ނިޒާމެވެ. ނަމަވެސް 21 ވަނަ ޤަރުނަށް އައިއިރު، ހޯދިފައިވާ ސައިންޓިފިކް ހޯދުންތަކާއި، އިންސާނުންގެ ދިރިއުޅުމުގެ ވައްޓަފާޅިއަށް އައިސްފައިވާ ގިނަގުނަ ބަދަލުތަކާ ހުރެ، ޚާއްސަކޮށް ޒުވާނުންގެ މެދުގައި، "ނައިޓް އައުލްސް" އާއި "އަރލީ ބަރޑްސް" އަކީ، މީހާގެ ނިދުމުގެ ވައްޓަފާޅި އެންމެ ކުރުކޮށް ފޮނިކޮށް ކިޔާލަދެވޭނެ ބަސްތަކުމަގައި މިއަދު މި ވަނީ ވެފައެވެ. 

ނައިޓް އައުލްސްއަކީ، ރޭގަނޑުގެ ވަގުތުތަކުގައި އުނދަގޫ ކަންކަން ކުރާނެ ޖޯޝު ހުންނަ، ނިދަން ފަސޭހައީ ދުވާލުގެ ވަގުތުތަކުގައި ކަމުގައި ބުނާ މީހުންނެވެ. ސައިންޓިފިކް ނަޒަރުން ނައިޓް އައުލްސްގެ ނިދުމަށް ބަލައިލައިފި ނަމަ، ތަފާތު ސަބަބުތަކާހުރެ މިގޮތަށް ނިދަން އާދަވުމަކީ އެކަށީގެންވާކަމެއްކަން މި ވަނީ ޔަޤީންކުރެވިފައެވެ. އިންސާނާގެ ހޯރމޯންތައް މަސައްކަތްކުރާ ސިރކޭޑިއަން ރިދަމަށް އަންނަ ބަދަލުތަކުގެ ސަބަބުން، ރޭގަނޑު ކާހިއްވުމާއި، ކިޔަވާ ހިއްވުމާއި، ކަންކަމަށް ސަމާލުކަންދެވޭ މިންވަރު އިތުރުވުމަކީ، ކޯރޓިސޯލް ލެވެލް ރޭގަނޑަށް މަތިވެ، ނިދިއައުން ލަސްވާ ސަބަބުތައްކަން ދިރާސާތަކުން ދައްކައެވެ. 

އަވަހަށް ނިދުމާއި އަވަހަށް ހޭލުމަކީ، ދީނީ ގޮތުންނާއި ޞިއްޙީ ގޮތުން ވެސް ތިމާއަށް އެންމެ ފައިދާ ހުރިގޮތެވެ. ރޭގަނޑުގެ ނިންޖަކީ ދުވާލުގެ ނިންޖަށްވުރެ އެތައް ގުނައެއް އިތުރަށް ވަރުބަލިކަން ފިލުވައިދޭ، އަރާމު ލިއްބައިދޭ، ފައިދާ ހުރި ނިންޖެއްކަމަށް ސައިންސުވެރިން އިއްތިފާޤުވެއެވެ. 

މި ލިޔުން ކިޔާލުމުން

Ads by MSS