ޚަބަރު
މާލީ ދާއިރާއިން މީހުން ތަމްރީނުކުރުމަށް ޕެންޝަން އޮފީހުން ސްކޮލަޝިޕް ދެނީ

މި ޕްރޮގްރާމް ކުރިޔަށް ދާނީ މެރިޓް ބޭސްޑް ޕްރޮގްރާމެއްގެ ގޮތުގައި--- ފޮޓޯ: ޕެންޝަން އޮފީސް
ހުލާސާ
ކިޔެވުމަށް ކަނޑައަޅާ ދާއިރާތަކާއި ސްކޮލަަޝިޕްގެ އަދަދު ޕެންޝަން އޮފީހުން އަހަރަކު އެއް ފަހަރު އިއުލާންކުރާނެ.
މާލީ ދާއިރާއިން މީހުން ތަމްރީނުކުރުމަށް ޕެންޝަން އޮފީހުން ސްކޮލަޝިޕް ދޭން ނިންމާފައިވާކަމަށް އެ އޮފީހުން އިޢުލާންކޮށްފިއެވެ.
ޕެންޝަން އޮފީހުން ހާމަކޮށްފައިވާ ގޮތުގައި، މި ސްކޮލަޝިޕް ޕްރޮގްރާމްގެ އަމާޒަކީ، މާލީ ދާއިރާއަށް ތަފާތު ރޮނގުތަކުން ބޭނުންވާ ފަންނީ މީހުން ބިނާކުރުމެވެ. އަދި މި ދާއިރާއިން ކުރިޔަށް ދިއުމަށް ބޭނުންވާ ފަރާތްތަކަށް އެ ފުރުސަތު ހޯދައިދިނުމަކީ ވެސް މި ޕްރޮގްރާމުގެ އަމާޒެއްކަމަށް ހާމަކޮށްފައިވެއެވެ.
މެރިޓް ބޭސްޑް ޕްރޮގްރާމެއްގެ ގޮތުގައި ހިންގުމަށް ހަމަޖެހިފައިވާ މި ޕްރޮގްރާމަކީ، ދުނިޔޭގެ ޔުނިވަސިޓީ ރޭންކިންއަށް ބަލައި ފެންވަރު ރަނގަޅު ޔުނިވަސިޓީތަކުން އަންޑަގްރެޖުއޭޓް އަދި ޕޯސްޓްގްރެޖުއޭޓް ޕްރޮގްރާމުތަކުގައި ކިޔެވުމުގެ ފުރުސަތު ލިބިގެންދާނެ ޕްރޮގްރާމެއްކަމަށް އެ އޮފީހުން ބުންޏެވެ.
އެގޮތުން، މި ޕްރޮގްރާމުގެ ދަށުން ކިޔެވުމަށް ކަނޑައަޅާ ދާއިރާތަކާއި ސްކޮލަަޝިޕްގެ އަދަދު ޕެންޝަން އޮފީހުން އަހަރަކު އެއް ފަހަރު އިއުލާންކުރާނެކަމަށާއި، މި އަހަރަށް ދިނުމަށް ކަނޑައަޅާފައިވަނީ އަންޑަރ-ގްރެޖުއޭޓް އެއް ސްކްލަޝިޕްކަމަށް ހާމަކޮށްފައިވެއެވެ.
މި ޕްރޮގްރާމުގެ ހުރިހާ ޚަރަދެއް ހަމަޖައްސާނީ ޕެންޝަން އޮފީހުންކަމަށް ވެސް އެ އޮފީހުން ވަނީ ހާމަކޮށްފައެވެ.