ރާއްޖޭގެ 3 ސަރަޙައްދެއްގައި ބްލަޑް ބޭންކު ޤާއިމުކުރުމުގެ މަސައްކަތް މިއަހަރު ނިމޭނެ

ރާއްޖޭގެ 5 ސަރަޙައްދެއްގައި ފުލް ފްލެޖްޑް ބްލަޑް ބޭންކު ޤާއިމުކުރުމަށް ކުރަމުންދާ މަސައްކަތުގެ ދަށުން މިއަހަރު 3 ސަރަޙައްދެއްގައި ބްލަޑް ބޭންކުތައް ޤާއިމުކުރުމުގެ މަސައްކަތް ނިމޭނެކަމަށް ސިއްޙަތާ ބެހޭ ވުޒާރާއިން ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ސިއްޙަތާ ބެހޭ ވަޒީރުގެ ނައިބު މުޙައްމަދު ފިޒްނީ ވިދާޅުވީ، ރާއްޖޭގެ 5 ސަރަޙައްދުގައި ބްލަޑް ބޭންކް ޤާއިމުކޮށް އަދި ކުރިން ހުރި ބައެއް ތަންތަން އަޕްގްރޭޑްކުރުމުގެ މަސައްކަތް ކުރަމުންދާ ކަމަށެވެ. މިގޮތުން ފުލްފްލެޖްޑް 5 ބްލަޑް ބޭންކު ޤާއިމުކުރުމަށް ކުރާ މަސައްކަތުގެ ތެރެއިން 3 ބަލްޑް ބޭންކުގެ މަސައްކަތް މިއަހަރުގެ ތެރޭގައި ނިމޭނެކަމަށް ފިޒްނީ ވިދާޅުވިއެވެ.

ސަރުކާރުން 2024 ވަނަ އަހަރު ވަނީ އައްޑޫ ސިޓީއާއި ކުޅުދުއްފުށި ސިޓީގައި ޤާއިމުކޮށްފައިވާ ބްލަޑް ބޭންކުގެ ޚިދުމަތް ފުޅާކޮށްފައެވެ. މިހާރު ރ. އުނގޫފާރު ރީޖަނަލް ހޮސްޕިޓަލާއި، ގދ. ތިނަދޫ ޑރ. ޢަބްދުއްސަމަދު މެމޯރިއަލް ހޮސްޕިޓަލާއި، ލ.ގަމު ރީޖަނަލް ހޮސްޕިޓަލުގައި ފުލް ފްލެޖްޑް ބްލަޑް ބޭންކްތައް ޤާއިމުކުރުމުގެ މަސައްކަތް ކުރަމުންދާކަމަށް ސިއްޙަތާ ބެހޭ ވުޒާރާއިން ވިދާޅުވިއެވެ.

ރާއްޖޭގެ ކޮންމެ ރަށެއްގައި ތެލަސީމިއާ ކުދިންނަށް ބޭނުންވާ ބޭސް ލިބޭނެ އިންތިޒާމު މިހާރުވާނީ ހަމަޖެހިފައި. މިހާރު އެއްވެސް ރަށަކުން ނުޖެހޭނެ ބޭސް ހޯދަން އެހެން ރަށަކަށް ދާން. އަދި އަޅުގަނޑުމެން މިދަނީ 5 ސަރަޙައްދެއްގައި ބްލަޑް ބޭންކް ޤާއިމުކުރުމުގެ މަސައްކަތްވެސް ކުރަމުން. މީގެ ދަށުން 2 ސަރަޙައްދެއްގައި މިހާރު ހުންނާނީ ފުލްފްލެޖްޑް ބްލަޑް ބޭންކްތައް

ފިޒްނީ 

މީގެއިތުރުން، ރާއްޖޭގައި އިތުރުވަމުންދާ ތެލަސީމިއާ ކުދިންގެ ނިސްބަތް މަދުކުރުމަށް "ތެލަސީމިއާ ޕްރިވެންޝަން އެންޑް ކޮންޓްރޯލް ސްޓްރެޓެޖިކް އެކްޝަން ޕްލޭން" ތަންފީޒުކުރުމުގެ މަސައްކަތް ކުރަމުންދާކަމަށާއި، 2024 ވަނަ އަހަރު 14 ކުއްޖަކަށް ބޯންމެރޯ ޓްރާންސްޕްލާންޓް ހެދުމުގެ ފުރުސަތު ފަހިކޮށްދީފައިވާކަމަށްވެސް ފިޒްނީ ވިދާޅުވިއެވެ.

ހުޅުމާލޭ 2 ވަނަ ފިޔަވަހީގައި ތަރައްޤީކުރާ ތެލަސީމިއާ ހޮސްޕިޓަލުގެ ޢަމަލީ މަސައްކަތް މިއަހަރުގެ ތެރޭގައި ފެށިގެންދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މިއަހަރުގެ ރިޔާސީ ބަޔާނުގައިވެސް ވިދާޅުވެފައިވާކަން ފިޒްނީ  ފާހަގަކުރެއްވިއެވެ.

ރާއްޖޭގެ ސިއްހީ ނިޒާމުގައި ޙައްލުކުރަންޖެހޭ ގިނަ މައްސަލަތަކެއް ހުރިއިރު، މިއީ ރައްޔިތުންގެ ދުޅަހެޔޮކަމާއި ރައްކާތެރިކަމާއި ގުޅިފައިވާކަމެއްކަން ފާހަގަކުރެވެއެވެ. އެހެންކަމުން ސިއްޙީ ނިޒާމު ހަރުދަނާކުރުމަށް ގިނަ މަސައްކަތްތަކެއް ކުރަމުންދާކަން ސިއްޙަތާ ބެހޭ ވުޒާރާއިން ވަނީ އިތުރަށް ފާހަގަކުރައްވާފައެވެ.

ވަކިން ޚާއްސަކޮށް އަތޮޅުތަކުގެ ރަށްރަށުގައި ތިބި ތެލަސީމިއާ ކުދިންނަށް ބޭނުންވާ ލޭ ލިބޭނެ އިންތިޒާމު އަދި ބޭސް ލިބޭނެ އިންތިޒާމު ހަމަޖެއްސުމުގެ މަސައްކަތް ފަށާފައިވާކަމަށް ފިޒްނީ ވިދާޅުވިއެވެ. މިކަމުގެ ސަބަބުން ރަށްރަށުން ތެލަސީމިއާ ކުދިންނާއި އަދި އެނޫން ފަރާތްތަކަށްވެސް ބޭނުންވާ ލޭ ލިބޭނެ އިންތިޒާމު ކަށަވަރުވެގެންދާނެކަމަށް އެމަނިކުފާނު ވިދާޅުވިއެވެ.

މީގެއިތުރުން، ތެލަސީމިއާ ކުދިންނަށް ބޭނުންވާ ބޭސް މެދުނުކެނޑި ލިބޭނެ އިންތިޒާމު ހަމަޖެއްސުމަށް ކުރިމަތިވަމުންދާ މައްސަލަތައް ޙައްލުކޮށް، އެކުދިންނަށް ބޭނުންވާ ލޭ އަތޮޅުތެރޭގެ އެކި ސަރަޙައްދުތަކުން ހަމަޖެއްސުމާއި، އެފަދަ ކުދިންނަށް ބޭނުންވާ ބޯންމެރޯ ޓްރާންސްޕްލާންޓް ހެދޭނެ އިންތިޒާމު ހަމަޖެއްސުމުގެ މަސައްކަތްވެސް ކުރަމުންދާކަމަށް ފިޒްނީ ވިދާޅުވިއެވެ.