ޚަބަރު
ރޯދަމަހަށް ބޭނުންވާ މުދާ ދަތިކަމެއް ނެތި ލިބޭނެ އިންތިޒާމު ހަމަޖެއްސުމަށް އެސްޓީއޯއިން ދަނީ ތައްޔާރުވަމުން: ޝިމާދު

ރޯދަޔަށް ބޭނުންވާ މުދާ ދަތިކަމެއް ނެތި ލިބޭނެ އިންތިޒާމު ހަމަޖެއްސުމަށް އެސްޓީއޯއިން އަންނަނީ ތައްޔާރުވަމުން
ހުލާސާ
ތަކެތީގެ އަގުތައް ބޮޑުވިޔަނުދީ ހިފެހެއްޓުމުގެ މަސައްކަތް ކުރައްވަމުންދާކަމަށް ރައީސުލްޖުމްހޫރިއްޔާ ވެސް ވިދާޅުވި.
މި އަހަރުގެ ރޯދަމަސް ފެށުމަށް ކުޑަތަންވެފައިވާއިރު، ރޯދަޔަށް ބޭނުންވާ މުދާ ދަތިކަމެއް ނެތި ލިބޭނެ އިންތިޒާމު ހަމަޖެއްސުމަށް ސްޓޭޓް ޓްރޭޑިންގް އޯގަނައިޒޭޝަން، އެސްޓީއޯއިން އަންނަނީ ތައްޔާރުވަމުންކަމުގައި އެ ކުންފުނީގެ މެނޭޖިންގް ޑިރެކްޓަރ، ޝިމާދު އިބްރާޙިމް ވިދާޅުވެއްޖެއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ޝިމާދު ވިދާޅުވީ، ބާޒާރުގައި އަގު މައްޗަށްދާ ބާވަތްތައް ދެނެގަތުމަށް އެ ކުންފުނިން ދުވަހުން ދުވަހަށް ބާޒާރުގެ އަގުތައް މޮނިޓަރ ކުރަމުން އަންނަކަމަށެވެ. މިކަމުގެ ބޭނުމަކީ ރައްޔިތުންނަށް ބޭނުންވާ ތަކެތި ހެޔޮ އަގުގައި ލިބޭނެ އިންތިޒާމް ހަމަޖެއްސުމެވެ.
އެގޮތުން، ރޯދައަށް ޙާއްސަކޮށް ގެނައި ލުނބޯގެ ފުރަތަމަ ޝިޕްމެންޓު މިހާރު ރާއްޖެ ގެނަސްފައިވާކަމަށް ޝިމާދު ވިދާޅުވެފައިވެއެވެ.
އެސްޓީއޯއިން މިއަންނަނީ ރަމަޟާން މަހަށް ބޭނުންވާ މުދާ ދަތިކަމެއްނެތި ލިބޭނެ އިންތިޒާމު ހަމަޖެއްސުމަށް ދުރާލާ ތައްޔާރުވަމުން. އަގު މައްޗަށް ދާ ބާވަތްތައް ދެނެގަނެ, ދުވަހުން ދުވަހަށް ބާޒާރުގެ އަގުތައް މޮނިޓަރ ކުރަމުން. މިގޮތުން ލުނބޯގެ ފުރަތަމަ ޝިޕްމެންޓް މިހާރު ލިބިއްޖެ.
ސޯޝަލް މީޑިއާގައި ޝިމާދު ކުރެއްވި ޕޯސްޓުގައި ވެއެވެ.
ކޮންމެ އަހަރެއްގެ ރޯދަމަހާ ދިމާކޮށް، ކާބޯތަކެތީގެ ޑިމާންޑު ބޮޑުވުމުން، ބާޒާރުގައި މި ތަކެތި ލިބެން ހުންނަ އަގު ބޮޑުވެއެވެ. އެހެންކަމުން ބާޒާރުގައި މުދާ ލިބޭނެކަމުގެ ޔަޤީންކަން ކަށަވަރުކުރުމަށް އެސްޓީއޯއިން ދުރާލާ ތައްޔާރުވެއެވެ.
މި އަހަރަށް ރައްޔިތުންގެ މަޖިލީސް ހުޅުވި ޖަލްސާގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެސް މިކަމަށް އަލިއަޅުވާލައްވާފައި ވެއެވެ. އެ މަނިކުފާނު ވިދާޅުވީ، ރައްޔިތުންގެ ފުދުންތެރިކަން އިތުރުކުރުމާއި ބާޒާރުގެ އަގުތައް އެއްހަމައެއްގައި ހިފެހެއްޓުމަކީ އިޤްތިޞާދީ ސިޔާސަތުގެ އެއް ބައިކަމަށާއި، އެގޮތުން މިދިޔަ އަހަރު އެކަން އެކަށައެޅުމަށް ގިނަ މަސައްކަތްތަކެއް ކުރެއްވެވިކަމަށެވެ.
އަދި ޒަރޫރީ ކާބޯތަކެތި، ޙާއްސަކޮށް ރަމަޟާން މަހުގައި ކޮންމެހެން ބޭނުންވާ ތަކެތީގެ އަގުތައް ބޮޑުވިޔަނުދީ ހިފެހެއްޓުމަށް މިހާރު މަސައްކަތް ފައްޓަވާފައިވާކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ.