މަސައްކަތުގެ ސްޕީޑަށް ބަލާއިރު، ޖުލައި މަހު އާ ޓާރމިނަލް ހުޅުވޭނެކަމަށް އެމްއޭސީއެލްއިން ހާމަކޮށްފި

ވެލާނާ އިންޓަނޭޝަނަލް އެއަރޕޯޓު (ވީއައިއޭ)ގެ އާ ޓާރމިނަލްގެ މަސައްކަތްތައް މިހާރު ކުރިޔަށްދާ ސްޕީޑަށް ބަލާއިރު، ޖުލައި މަހު ޓާރމިނަލް ހުޅުވޭނެކަމުގެ ބޮޑު އުއްމީދެއް އެބައޮތްކަމަށް، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ހާމަކޮށްފިއެވެ.

އެމްއޭސީއެލްއިން މިކަން ހާމަކުރީ، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)ގެ އަހަރީ އާންމު ޖަލްސާގައި ވީއައިއޭގެ އާ ޓާރމިނަލްގެ މަސައްކަތްތަކުގެ އަދާހަމަ މަޢުލޫމާތު ޙިއްސާކުރުމަށް ހުށަހަޅައިދިން ޕްރެެޒެންޓޭޝަނެއްގައެވެ. 

އެ ކުންފުނިން ހާމަކޮށްފައިވާ ގޮތުގައި، ކަނޑައަޅާފައިވާ ތާވަލާ އެއްގޮތަށް މަސައްކަތް ކުރިޔަށް ގެންދިއުމަށް އެ ކުންފުނިން އަންނަނީ ކޮންޓްރެކްޓަރާއެކު ވަރަށް ކައިރިން މަސައްކަތް ކުރަމުންނެވެ. އެގޮތުން، އެމްއޭސީއެލްގެ ޑެޕިޔުޓީ ޗީފް އޮފިސަރު އިބްރާހިމް އަލީ ހަބީބު ވިދާޅުވީ، އާ ޓާރމިނަލްގެ މަސައްކަތް މިހާރު ކުރިއަށްދަނީ ތާވަލާ އެއްގޮތަށް ކަމަށެވެ.

އެމްއޭސީއެލްއިން ހުށަހެޅި ޕްރެޒެންޓޭޝަންގައި ހާމަކޮށްފައިވާ ގޮތުން، އާ ޓާރމިނަލުގައި އިމިގްރޭޝަންގެ ޚިދުމަތްދޭ ސަރަޙައްދު މިހާރަށް ވުރެން %280 އިތުރުވާނެއެވެ. އަދި އެރޯ ބުރިޖުތައް ޓެސްޓު ކުރުމުގެ މަސައްކަތް މާރިޗު މަހު ކުރިޔަށްދާނެ ކަމަށާއި، ޓާރމިނަލްގެ ބޭރުގެ މަސައްކަތްތައް މިހާރު އެއްކޮށްހެން ނިމިފައިވާއިރު އެތެރޭގެ މަސައްކަތްތަކުގެ %50 ނިމިފައިވާކަމަށެވެ.

އަަހަރަކު 7 މިލިއަން ފަސިންޖަރުންނަށް ޚިދުމަތް ދެވޭނެ ފެންވަރަށް ތަރައްޤީކުރާ މި ޓާރމިނަލް ހުޅުވުމަށް ސަރުކާރުން ކުރިން މަސައްކަތްކުރީ މިދިޔަ އަހަރުގެ ޓޫރިޒަމް ސީޒަނަށެވެ. ނަމަވެސް އެއާރލައިން އޮޕަރޭޓާސް ކޮމިޓީ (އޭއޯސީ)ގެ ލަފާގެ މަތިން، ޓާރމިނަލްގެ މަސައްކަތްތައް އެއްކޮށް ނިންމުމަށްފަހު ހުޅުވަން ނިންމީއެވެ.

މި އަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވީ، މި އަހަރުގެ އޮކްޓޫބަރު މަހުގެ ކުރިން އާ ޓާރމިނަލް ހުޅުވޭނެކަމަށެވެ.