ޚަބަރު
ބައެއް ސަރަޙައްދުތަކުގައި ހެލްމެޓް އަޅައިގެން ދުއްވާނަމަ ބަލާފާސްކުރަނީ

ހެލްމެޓް އަޅައިގެން ސައިކަލެއްގައި މީހަކު ސިނަމާލެ ބުރިޖުން ފައިބަނީ، ފޮޓޯ: ޝުއައުބް މުޙައްމަދު އިޤުބާލު
ހުލާސާ
ހެލްމެޓް އަޅަން ލާޒިމުކޮށްފައިވަނީ 30 ކިލޯމީޓަރަށްވުރެ ބާރަށް އުޅަނދު ދުއްވަން ހުއްދަކޮށްފައިވާ ސަރަޙައްދުތަކުގައި.
ސަލާމަތީ ފިޔަވަޅެއްގެ ގޮތުން، ހެލްމެޓް އެޅުން ލާޒިމު ނޫން ސަރަޙައްދުތަކުގައި ހެލްމެޓް އަޅައިގެން ދުއްވާނަމަ ފާރަވެރިވެ، ތުހުމަތުކުރެވޭ މީހުން ހުއްޓުވައި، ބަލާފާސްކުރަން ނިންމާފައިވާކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ.
އެ އިދާރާއިން މިހެން ހާމަކުރީ، ކާކުކަން ވަންހަނާކުރުމުގެ ގޮތުން ހެލްމެޓު ބޭނުންކޮށް، ކުށްކުށަށް އަރައިގަތުން އިތުރުވެގެން ދިއުމާ ގުޅިގެންނެވެ. އެގޮތުން މިފަދަ ފަރާތްތަކުން އާންމު ޚިދުމަތްދޭ ތަންތަނަށާއި ވިޔަފާރިތަކަށްވަދެ ކުށްކުށަށް އަރައިގަންނަމުން އަންނަކަމަށް، މިކަމާ ގުޅިގެން ފުލުހުން ނެރުނު ނޫސްބަޔާނުގައި ހާމަކޮށްފައިވެއެވެ.
އެއްގަމު އުޅަނދު ދުއްވުމުގެ އާންމު ޤަވާއިދުގައި ހާމަކޮށްފައިވާ ގޮތުގައި، ހެލްމެޓް އަޅަން ޖެހޭނީ 30 ކިލޯމީޓަރަށްވުރެ ބާރަށް އުޅަނދު ދުއްވަން ހުއްދަކޮށްފައިވާ ސަރަޙައްދުތަކުގައި ނުވަތަ މަގުތަކުގައި 1A އަދި 0A ގިންތީގެ އުޅަނދެއް ދުއްވާއިރުއެވެ. އަދި މި މަގުތަކުގައި އުޅަނދު ދުއްވަން އިންނަ މީހާއާއި އުޅަނދުގެ ފަހަތުގައި އިންނަ މީހާ ހެލްމެޓް އެޅުމަށް ލާޒިމު ކުރެއެވެ.
އެހެންކަމުން ފުލުހުން ހާމަކޮށްފައިވާ ގޮތުގައި، އެންމެހައި ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުކޮށް އާމާން ވެއްޓެއް ޤާއިމްކުރުމުގެ މަޤުސަދުގައި، ހެލްމެޓް އެޅުން ލާޒިމު ނޫން ސަރަޙައްދުތަކުގައި ހެލްމެޓް އަޅައިގެން ދުއްވާފަރާތްތަކުގެ ތެރެއިން، ތުހުމަތުކުރެވޭ ފަރާތްތައް ހުއްޓުވައި، ފުލުހުން ދާނީ ބަލާ ފާސްކުރަމުންނެވެ.