ޚަބަރު
ވަޒީރު ޠާރިޤަށް ރުހުން ހޯދުމަށް ކޮމެޓީއަށް ފޮނުވައިފި
ފަތުރުވެރިކަމާއި ތިމާވެށްޓާބެހޭ ވަޒީރަކަށް ި ޠާރިޤު އިބްރާހީމް އައްޔަންކުރެއްވުން، ފޮޓޯ: ރައީސް އޮފީސް
ފަތުރުވެރިކަމާއި ތިމާވެށްޓާބެހޭ ވަޒީރަކަށް އައްޔަން ކުރެއްވި ޠާރިޤު އިބްރާހީމަށް ރުހުން ހޯއްދެވުމުގެ މައްސަލަ ދިރާސާކުރުމަށް، ސަރުކާރުގެ މަސްޢޫލިއްޔަތު އަދާކުރާ މިންވަރުބަލާ ކޮމިޓީއަށް ފޮނުވައިފިއެވެ. މިއާއެކު ދައުލަތުގެ ވުޒާރާތަކަށް ގެންނެވި ބަދަލުތައް ދިރާސާކުރުމަށް ވެސް ވަނީ އެ ކޮމެޓީއަށް ފޮނުވާފައެވެ.
މިއީ ފަތުރުވެރިކަމާބެހޭ ވުޒާރާއާއި މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާ އެއްކޮށްލުމަށް މި މަހުގެ އެއްވަނަ ދުވަހު ރައިސުލްޖުމްހޫރިއްޔާ ނިންމެވުމާ ގުޅިގެން ދިރާސާ ކުރުމަށް ފޮނުވުނު ދެ މައްސަލައެވެ.
ދެ ވުޒާރާ އެއްކޮށްލުމަށްފަހު އުފެއްދި ވުޒާރާގެ ނަމަކީ ފަތުރުވެރިކަމާއި ތިމާވެށްޓާބެހޭ ވުޒާރާއެވެ. މު ވުޒާރާގެ ވަޒީރަކަށް އައްޔަނުކުރެއްވީ ޠާރިޤު އިބްރާހީމެވެ.
މީގެ އިތުރުން އެހެން ބައެއް ވުޒާރާތަކުގެ މަސައްކަތަށް ގެންނެވި ބަދަލުތައް ދިރާސާކުރުމަށްވެސް ވަނީ ކޮމިޓީއަށް ފޮނުއްވާފައެވެ. އެގޮތުން މަތީ ތަޢުލީމާއި، މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއާއި، ދާޚިލީ ސަލާމަތާއި ފަންނިއްޔާތާބެހޭ ވުޒާރާއާއި، ސިއްޙީ ވުޒާރާގެ މަސައްކަތްތަކަށް ބަދަލުތަކެއް ގެންނަވައި، މަސައްކަތުގެ ދާއިރާތައް އަލުން އެކުލަވާލާފައިވާތީ އެ ބަދަލުތައް ފާސްކުރުމަށް ރައީސުލްޖުމްހޫރިއްޔާ ވަނީ މަޖިލީހަށް ހުށައަޅުއްވާފައެވެ.
ޤާނޫނުގައި ހާމަކޮށްފައިވާ ގޮތުގައި ވަޒީރުންނަށް ޤާނޫނީ ބާރުވެރިކަން ލިބިލައްވާނީ ރައްޔިތުންގެ މަޖިލީހުގެ ރުހުން ލިބިވަޑައިގަތުމުންނެވެ. އެހެންކަމުން ވަޒީރުންގެ މަޖިލީހަށް ބޭފުޅަކު އައްޔަން ކުރެއްވުމަށްފަހު އެ ވަޒީރުންނަށް ރުހުން ހޯދުމަށް މަޖިލީހަށް ހުށަހަޅަންޖެހެއެވެ.
