ޚަބަރު
އިލެކްޝަން ކޮމިޝަނުގެ ރައީސާއި ނައިބު ރައީސަށް ރުހުން ހޯދުމުގެ މައްސަލަ ވެސް ކޮމެޓީއަށް
އިލެކްޝަން ކޮމިޝަނުގެ ރައީސާއި ނައިބު ރައީސަށް އައްޔަނުކުރެއްވުމުގެ ރުހުން ހޯދުމަށް ފޮނުވާފައިވާ ދެ ބޭފުޅުން، ފޮޓޯ: ރައީސް އޮފީސް
އިލެކްޝަން ކޮމިޝަނުގެ ރައީސާއި ނައިބު ރައީސަށް ރުހުން ހޯދުމުގެ މައްސަލަ މިނިވަން މުއައްސަސާތަކުގެ ކޮމިޓީއަށް މިއަދު ފޮނުވައިފިއެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ރައްޔިތުންގެ މަޖިލީހަށް ހުށަހަޅުއްވާފައި ވަނީ އިލެކްޝަންސް ކޮމިޝަނުގެ ރައީސަކަށް މުޙައްމަދު ޒާހިދު އަދި ނައިބު ރައީސަކަށް ޢަބްދުއްރަޙްމާން ޞަލާޙް ރަޝީދު އައްޔަން ކުރެއްވުމަށެވެ.
މީގެ ކުރިން އިލެކްޝަންސް ކޮމިޝަނުގެ ރައީސާއި ނައިބު ރައީސް ހޮވަނީ އެކޮމިޝަނުގެ މެންބަރުންގެ މެދުގައި ނަގާ ވޯޓަކުން ނަމަވެސް، އެ ކޮމިޝަނުގެ ޤާނޫނަށް މިދިޔަ އަހަރު ގެންނެވި އިޞްލާހުގައި ބަޔާންކޮށްފައިވާ ގޮތުގައި، އިލެކްޝަންސް ކޮމިޝަނުގެ ރައީސާއި ނައިބު ރައީސް އައްޔަން ކުރައްވާނީ ރައީސުލްޖުމްހޫރިއްޔާއެވެ. އަދި މި ދެ މަޤާމަށް ބޭފުޅުން އައްޔަން ކުރެއްވޭނީ ރައްޔިތުންގެ މަޖިލީހުގެ ރުހުން ލިބިގެންކަމަށް ވެސް އެ އިސްލާހުގައި ބަޔާންކޮށްފައި ވެއެވެ.
މުޙައްމަދު ޒާހިދާއި ޢަބްދުއްރަޙްމާން ޞަލާޙް ރަޝީދު އިލެކްޝަންސް ކޮމިޝަނުގެ މެންބަރުންނަށް އައްޔަން ކުރެއްވީ މިދިޔަ ޖެނުއަރީ މަހުގެ 26ވަނަ ދުވަހުއެވެ. އަދި މި ދެ ބޭފުޅުން އެ ކޮމިޝަނުގެ ރައީސާއި ނައިބު ރައީސަށް އައްޔަންކުރެއްވުމަށް މަޖިލީހަށް ފޮނުއްވާފައި ވަނީ ވެސް ހަމަ އެ ދުވަހެވެ.
އިލެކްޝަންސް ކޮމިޝަނަކީ 7 އޮގަސްޓް 2008ން ފެށިގެން އަމަލުކުރަން ފެށި ޤާނޫނުއަސާސީގެ ދަށުން އުފައްދަވާފައިވާ މިނިވަން މުއައްސަސާއެކެވެ. މިއީ އިންތިޚާބުތަކާއި، ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމަށް ކުރަންޖެހޭ ކަންތައްތައް ކުރުމަށާއި ސިޔާސީ ޕާޓީތައް ރަޖިސްޓަރީކޮށް، ޤާނޫނުގެ ދަށުން ސިޔާސީ ޕާޓީތަކާ ގުޅޭގޮތުން މަތިކޮށްފައިވާ ޒިންމާތައް އަދާކުރެއްވުމަށް އުފައްދަވާފައިވާ މުއައްސަސާއެކެވެ.
