ޚަބަރު
ކޯރާޑިން ހަމަލާދިން މައްސަލައިގައި ހިމެނޭ އެކަކު ތަޙުޤީޤު ނިމެންދެން ބަންދުކުރުމަށް ކޯޓުން އަމުރުކޮށްފި

ކޯރާޑިން ހަމަލާދިން މައްސަލައިގައި ހިމެނޭ ދެ މީހުން---
ހުލާސާ
ތަޙުޤީޤު ނިމެންދެން ބަންދުކުރުމަށް ނިންމީ ސައިފުﷲ
ކޯރާޑިން ހަމަލާދިން މައްސަލައިގައި ހިމެނޭ ދެ މީހުންގެ ތެރެއިން އެކަކު ތަޙުޤީޤު ނިމެންދެން ބަންދުކުރުމަށް ކްރިމިނަލް ކޯޓުން އަމުރުކޮށްފިއެވެ.
މި ދެ މީހުން ހައްޔަރުކުރީ، ހުޅުމާލޭގެ ރެހެންދި ފުޓްސަލް ދަނޑުގެ ހުޅަނގު ފަރާތުގައި މަޑުކޮށްގެން ހުރި މީހަކަށް ކޯރާޑިއަކުން ހަމަލާ ދިނުމުންނެވެ. ހަމަލާ ދިނުމަށްފަހު އެ މީހުން ފިލަން ދަނިކޮށް، ހައްޔަރުކޮށްފައިވަނީ ސިނަމާލެ ބުރިޖާއި ގުޅިފައި އޮންނަ ހައިވޭގެ މަތިން މިދިޔަ ހޮނިހިރު ދުވަހުގެ ރެއެވެ.
މި މައްސަލައިގައި ފުލުހުން ހައްޔަރުކޮށްފައިވަނީ ގދ. ފިޔޯރީ، ހީނާމާގެ އުމުރުން 25 އަހަރުގެ ރުސްތުމް އިބްރާހީމްއާއި، ބ.ގޮއިދޫ، ފިނިފެންމާގޭ އުމުރުން 19 އަހަރުގެ ސައިފްﷲ ފައިޞަލެވެ.
މި ދެ މީހުންގެ ބަންދާއިމެދު ގޮތެއް ނިންމުމަށް ކޯޓަށް ހާޒިރުކުރުމުން، ސައިފުﷲ ބަންދުކުރުމަށް ކޯޓުން ނިންމީ ތަޙުޤީޤު ނިމެންދެނެވެ. އަދި ރުސްތުމްގެ ބައްދަށް ޖަހާފައިވަނީ ތިން ދުވަހެވެ.
މި ދެ މީހުން ހައިވޭ މަތިން ހައްޔަރުކުރިއިރު އެ ސަރަހައްދުން މާރާމާރީ ހިންގަން ބޭނުންކުރާ ސާމާނު ވެސް ފެނިފައިވެއެވެ. އޭގެ ތެރޭގައި ވަޅިއެއް ވެސް އޮތެވެ.