ދުބާއީގައި ބޭއްވޭ ވޯލްޑް ގަވަރމަންޓްސް ސަމިޓް 140 ޤައުމާ އެކު މާދަމާ ފަށަނީ

ދުބާއީގައި ބޭއްވޭ 12 ވަނަ އަހަރީ ވޯލްޑް ގަވަރމަންޓްސް ސަމިޓްގެ ތީމްގެ ގޮތުގައި "ޝޭޕިންގ ފިއުޗަރ ގަވަރމަންޓްސް" ހަމަޖައްސައިފިކަމަށް އެމިރޭޓްސް ސަރުކާރުގެ ނޫސް އޭޖެންސީ ވާމް އިން ހާމަކޮށްފިއެވެ. މި ސަމިޓް ބޭއްވުމަށް ހަމަޖެހިފައިވަނީ ފެބްރުއަރީ 11 އިން 13 އަށެވެ.

މިއަހަރުގެ ސަމިޓްގައި ދުނިޔޭގެ އެކި ދާއިރާތަކުގައި އަންނަމުންދާ ބަދަލުތަކާއި، އެކި ދާއިރާތަކުގައި ހުރި ފުރުސަތުތަކާއި ގޮންޖެހުންތަކަށް އަލިއަޅުވާލާނެއެވެ. މީގެ އިތުރުން ސަރުކާރުތަކުގެ މަސައްކަތްތައް ހަރުދަނާކުރުމަށާއި ބައިނަލްއަޤްވާމީ އެއްބާރުލުން އިތުރުކުރުމަށް ބޭނުންވާ އެކި ސްޓްރެޓެޖީތަކާއި ވިސްނުންތައް އެކުލަވާލުމަށް މަސައްކަތްކުރާނެއެވެ.

މި ސަމިޓްގައި 30 އަށްވުރެ ގިނަ ގައުމުތަކުގެ ވެރިންނާއި،140 ސަރުކާރުގެ ވަފުދުތަކާއި، 80 އަށްވުރެ ގިނަ ބައިނަލްއަޤްވާމީ މުއައްސަސާތަކުގެ މަންދޫބުން ބައިވެރިވާނެކަމަށް ލަފާކުރެވެއެވެ. މިއީ މިހާތަނަށް މި ސަމިޓްގައި ބައިވެރިވި އެންމެ ގިނަ ފަރާތްތައް ކަމަށްވާއިރު، މިއީ ވޭތުވެދިޔަ އަހަރަށްވުރެ 50 އިންސައްތަ އިތުރު އަދަދެކެވެ.

އިންޑޮނޭޝިއާގެ ރައީސް ޕްރަބޯވޯ ސުބިއާންޓޯ، ޕޮލެންޑްގެ ރައީސް އެންޑްރޭޖް ޑޫޑާ އަދި ސްރީލަންކާގެ ރައީސް ކުމާރަ ދިސަނާޔަކޭ ފަދަ ގައުމުތަކުގެ ވެރިން މި ސަމިޓްގައި މުހިންމު ވާހަކަތައް ދައްކަވާނެއެވެ. މީގެ އިތުރުން އީލޮން މަސްކް، އައިއެމްއެފްގެ މެނޭޖިންގ ޑިރެކްޓަރ ކްރިސްޓަލީނާ ޖޯޖީވާ އަދި އިނގިރޭސިވިލާތުގެ ކުރީގެ ބޮޑުވަޒީރު ޓޯނީ ބްލެއަރ ފަދަ ފަރާތްތަކުން ވެސް ވާހަކަފުޅު ދައްކަވާނެއެވެ.

އެމިރޭޓްސްގެ ކެބިނެޓް ކަންކަމާބެހޭ މިނިސްޓަރ އަދި ވޯލްޑް ގަވަރމަންޓްސް ސަމިޓްގެ ޗެއަރމަން މުހައްމަދު އަލް ގަރްގާވީ ވިދާޅުވީ، މި ސަމިޓަކީ ދުނިޔޭގެ އެކި ސަރުކާރުތަކަށް ދިމާވާ ގޮންޖެހުންތަކާ ކުރިމަތިލުމަށް އެހީތެރިވެދޭ މުހިންމު މަންސައެއް ކަމަށެވެ. އަދި މި ސަމިޓަކީ މުސްތަޤްބަލަށް ތައްޔާރުވުމަށާއި، އައު ހައްލުތައް ހޯދުމަށާއި، ބައިނަލްއަޤްވާމީ ގުޅުންތައް ބަދަހިކުރުމަށް އޮތް އެންމެ މުހިންމު މަންސާ ކަމަށް ވެސް އޭނާ ވިދާޅުވިއެވެ.ސަމިޓްގެ އެންމެ ފަހު ދުވަހު މޫސުމަށް އަންނަ ބަދަލުތަކާ ބެހޭ ފޯރަމަކާއި، ދުނިޔޭގެ ސިއްހަތާ ބެހޭ ފޯރަމަކާއި، ސަރުކާރުތަކުގެ ޤާނޫނު ހެދުމާ ބެހޭ ފޯރަމެއް ބޭއްވުމަށް ވަނީ ހަމަޖެހިފައެވެ.

ވޯލްޑް ގަވަމަންޓް ސަމިޓް 2025 ގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނައިބު، އަލްއުސްތާޛު ޙުސައިން މުޙައްމަދު ލަޠީފް ވަނީ މިއަދު ފުރައިވަޑައިގެންފައެވެ.

ވޯލްޑް ގަވަރމަންޓްސް ސަމިޓަކީ ކޮންމެ އަހަރަކު ބާއްވާ ސަމިޓެއް ކަމަށްވާއިރު، މިއަހަރުގެ ސަމިޓަކީ 12 ވަނަ އަހަރީ ސަމިޓެވެ. މި ސަމިޓްގެ ސަބަބުން ދުނިޔޭގެ ސަރުކާރުތަކުގެ މެދުގައި އޮންނަ ގުޅުން އިތުރަށް ބަދަހިވެ، އެކި ދާއިރާތަކުގައި އެއްބާރުލުން އިތުރުވެގެންދާނެއެވެ.