ރަމަޟާންމަހު ޒުވާނުންނަށް އަމާޒުކޮށްގެން ހިންގަމުން އައި "މައިންޑްފުލް ރަމަޟާން" ޕްރޮގްރާމްގެ ނަން "ރޯދަ މަހަށް ފަރުވާތެރިވުން" އަށް ބަދަލުކޮށްފި

އިސްލާމީ ކަންތައްތަކާ ބެހޭ މިނިސްޓްރީން ރޯދަ މަހާ ދިމާކޮށް ޒުވާނުންނަށް އަމާޒުކޮށްގެން ހިންގަމުން އައި "މައިންޑްފުލް ރަމަޟާން" ޕްރޮގްރާމްގެ ނަން "ރޯދަ މަހަށް ފަރުވާތެރިވުން" އަށް ބަދަލުކޮށްފިއެވެ. މި މަޢުލޫމާތު ހާމަކުރެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދެވެ.

މި ޕްރޮގްރާމަކީ 3 އަހަރު ކުރިން ފެށިގެން މިނިސްޓްރީގެ ދަޢުވާ ސެކްޝަނުން ކުރިއަށް ގެންދިޔަ ޕްރޮގްރާމެކެވެ. ނަމަވެސް، ޕްރޮގްރާމްގެ ނަމުގައި އިނގިރޭސި ބަހުގެ ލަފްޒެއް ބޭނުންކޮށްފައިވުމާ ގުޅިގެން އިޖްތިމާޢީ މަންސަތަކުގައި ބައެއް ފަރާތްތަކުން ހިތްހަމަނުޖެހުން ފާޅުކޮށްފައިވެއެވެ.

 ޒުވާން ކުދިންތަކަކަށް ކުރެވޭ ކަމަކަށް އިސްތިޢުމާރުވެފައި ތިބި ބައެއްގެ ގޮތުގައި ސިފަކޮށް ރައްދުދީ ހެދުން އެހާ ބަލައި ނުގަނެވޭ. ކަންކަން އިޞްލާޙުކުރަން ހެޔޮ ނަސޭހަތް ދެއްވުން މުހިންމު. އަޅުގަނޑު އޮންނާނެ ދަންނަވާފައި މިކަން ރަނގަޅު ކުރަން

ވަޒީރު ޝަހީމް

ވަޒީރު އިތުރަށް ވިދާޅުވީ، މިހާރު ޤައުމީ ރޫޙު އާލާވެފައިވާ މިންވަރު ބޮޑުކަމުން، ކުރިން މި ނަމާމެދު ނުފެންނަ ނުތަނަވަސްކަން މިހާރު ފެނުނީ ކަމަށެވެ. އަދި މިހާރު ވަނީ ނަން އިޞްލާޙުކޮށް "ރޯދަ މަހަށް ފަރުވާތެރިވުން" އަށް ބަދަލުކޮށްފައި ކަމަށް ވަޒީރު ވިދާޅުވިއެވެ.

މި ބަދަލާއެކު، ކުރިއަށް އޮތް ރޯދަ މަހުގައި މި ޕްރޮގްރާމް ކުރިއަށް ގެންދާނީ އައު ނަމުގައެވެ. މިއީ ދިވެހި ޘަޤާފަތާއި އިސްލާމީ އަޤީދާއާ އެއްގޮތަށް ޕްރޮގްރާމްތައް ރޭވުމަށް ސަރުކާރުން ދެއްވާ އަހައްމިއްޔަތުކަމުގެ ހެއްކެކެވެ.