މުސާރަ ނުދެވުމުގެ މައްސަލަ ބޮޑުވެ:އިރާޤުގެ ރައީސް ބޮޑުވަޒީރާއި ދެކޮޅަށް މައްސަލަ ހުށަހަޅައިފި

އިރާޤުގެ ރައީސް އަބްދުލް ލަތީފް ރަޝީދު، އެ ޤައުމުގެ ބޮޑުވަޒީރު މުޙައްމަދު ޝިޔާ އަލް-ސުދާނީއާ ދެކޮޅަށް މައްސަލައެއް ހުށަހަޅައިފިއެވެ. މި މައްސަލަ ހުށަހަޅާފައިވަނީ ކުރްދިސްތާނުގެ އަމިއްލަ ވެރިކަން ހިންގާ ސަރަޙައްދުގެ ސިވިލް ސަރވަންޓުންނަށް މުސާރަ ނުދެވުމާ ގުޅިގެންނެވެ. މިކަމުން އިރާޤުގެ ވެރިކަމުގެ ތެރޭގައި އުފެދިފައިވާ ބައިބައިވުން ފާޅުވެގެން ގޮސްފައިވެއެވެ.

ކުރްދު ނަސްލުގެ ބޭފުޅެއް ކަމަށްވާ ރައީސް ރަޝީދު، ވަޒީރުލްއައުޒަމް ސުދާނީއާއި މާލިއްޔަތު ވަޒީރު ތައިފް ސާމީއާ ދެކޮޅަށް މި މައްސަލަ ހުށަހެޅުއްވީ ފާއިތުވި މަހުއެވެ. ނަމަވެސް މި މައްސަލަ ހުށަހެޅި ކަމުގެ މަޢުލޫމާތު ހާމަކުރެއްވީ ރައީސްގެ ލަފާދޭ ބޭފުޅާ ހަވްރީ ތަވްފީޤް، އިއްޔެއެވެ.

އިރާޤުގެ  ކޯޓަށް ހުށަހަޅާފައިވާ މި މައްސަލައިގައި އެދިފައިވަނީ، ބަޣްދާދާއި އަރްބީލްއާ ދެމެދު ހިނގަމުންދާ މާލީ ޚިލާފުތަކާ ނުލައި، "މެދުނުކެނޑި" މުސާރަ ދިނުމަށް އަމުރެއް ނެރެދިނުމަށެވެ. އަރްބީލްއަކީ ކުރްދިސްތާނު ސަރަޙައްދުގެ ވެރިރަށެވެ.

އިރާޤުގެ ސަރުކާރުގެ ވަޒީފާތަކުގައި ހުރި ނާޤާބިލުކަމާއި ކޮރަޕްޝަނާ ގުޅިގެން، ސުދާނީއާއި ރަޝީދުގެ ދެމެދުގައި ދިގު މުއްދަތެއް ވަންދެން ޚިލާފުތަކެއް ހުރިކަމަށް ތަޙުލީލުކުރާ ފަރާތްތަކުން ބުނެއެވެ. ސަރުކާރުގެ މުވައްޒަފުންނަށް ޖެނުއަރީ މަހުގެ މުސާރަ ދެވިފައިވީ ނަމަވެސް، ޑިސެމްބަރު މަހުގެ މުސާރައަށް އަދިވެސް އިންތިޒާރު ކުރަމުންދެއެވެ.

ތަވްފީޤް ވިދާޅުވި ގޮތުގައި މި މައްސަލަ މިހާރު ހާމަކުރެވުނީ، ކުރްދިސްތާނުގެ ދެވަނައަށް އެންމެ ބޮޑު ސިޓީ އަދި ރައީސްގެ އަމިއްލަ ރަށް ކަމަށްވާ ސުލައިމާނިއްޔާގައި މުސާރަ ނުލިބުމާ ގުޅިގެން މުޒާހަރާތައް ކުރަމުންދާތީއެވެ.

ކުރްދިސްތާނު ސަރަޙައްދުގެ ރައީސް ނެޗިރްވާން ބަރްޒާނީ ފަހަކަށް އައިސް ވަޒީރުލްއައުޒަމް ސުދާނީއަށް ޝުކުރު އަދާކުރައްވާފައިވަނީ މާލީ މައްސަލަތަކުގައި، ޚާއްޞަކޮށް މުސާރައިގެ މައްސަލައިގައި އެއްބާރުލުން ދެއްވާތީއެވެ.

އިއްޔެ، ސުލައިމާނިއްޔާގެ ސަތޭކަ އެތައް ބަޔަކު އަރްބީލްގައި މުޒާހަރާ ކުރަން މަސައްކަތް ކުރުމުން، ފުލުހުން ކަރުނަ ގޭސް ބޭނުންކޮށްގެން އެ ބައި މީހުން ފޮނުވާލިކަމަށް ރިޕޯޓްލިބިފައިވެއެވެ.