އަމާޒަކީ ޤައުމީ ޓީމުން ފުރުސަތު ހޯދައި ޓީމުގެ އެންމެ މޮޅު ކުޅުންތެރިޔާއަށްވުން: އާރާ

އަމާޒަކީ ޤައުމީ ޓީމުން ޖާގަހޯދައި، ޓީމުގެ އެންމެ މޮޅު ކުޅުންތެރިޔާގެ މަޤާމު ޙާސިލްކޮށް، ބައިނަލް އަޤުވާމީ ގިނަ މުބާރާތްތަކެއްގައި ވާދަކޮށް، ގިނަ ކާމިޔާބީތަކެއް ހޯދުންކަން ޓެނިސް ކުޅުންތެރިޔާ އާރާ އާސާލް އާޒިމް ހާމަކޮށްދީފިއެވެ. އާރާ ވަނީ، ޓެނިސް އެސޯސިއޭޝަން އޮފް މޯލްޑިވްސް އިން އިންތިޒާމުކޮށްގެން ބޭއްވި 12 ވަނަ މެރީބްރައުން ޓެނިސް ޗެމްޕިއަންޝިޕުގެ 3 ކެޓެގެރީއަކުން ޗެމްޕިއަންކަން ހޯދާފައެވެ. 

އާރާ މިހެން ބުނެފައި ވަނީ 12 ވަނަ މެރީބްރައުން ޓެނިސް ޗެމްޕިއަންޝިޕަށް ފަހު ޕީ.އެސް.އެމް ނިއުސްއަށް ދިން އިންޓަވިއުއެއްގައެވެ.

ޖުމްލަ 10 ކެޓެގަރީއަކަށް ބަހާލައިގެން މި މުބާރާތް ކުޅެފައިވާއިރު، އާރާ ވަނީ ޖޫނިއަރ އޯޕަންސް ސިންގަލްސް ޗެމްޕިއަންކަމާއި، ވިމެންސް އޯޕަން ސިންގަލްސް ޗެމްޕިއަންކަމުގެ އިތުރުން ވިމެންސް އޯޕަން ޑަބަލްސް ޗެމްޕިއަންކަން ހޯދާފައެވެ. މުބާރާތުގައި އަންހެން ސިންގަލްސް ޗެމްޕިއަންކަން އާރާ ހޯދާފަވަނީ ފައިނަލުގައި ނަބާ ނިޝާން އާއި ވާދަކޮށް 6-3 އަދި 6-3 ގެ ނަތީޖާއަކުންނެވެ.

"މިހާރު ދެން ހަމަ ނެޝަނަލް ޓީމަށް އަރާ އިރާދަކުރެއްވިއްޔާ އިންޓަނޭޝަނަލް މުބާރާތްތައް ގިނައިން ކުޅެގެން އެ މުބާރާތްތަކުން ކާމިޔާބު ހޯދުން މިހާރު ޓާގެޓަކީ. މިއަހަރު ގިނައިން އިންޓަނޭޝަނަލް މުބާރާތްތަކަށް ޓްރެވެލްކޮށް އިންޓަނޭޝަނަލް ޕޮއިންޓްތަކާއި ޗެމްޕިއަންކަން މިއަހަރުގެ ޓާގެޓަކީ" ފައިނަލް މެޗްތަކަށްފަހު އާރާ ބުންޏެވެ.

ރާއްޖޭގެ ޓެނިހުގެ ތާރީހުގައި ބޭއްވި ފުރަތަމަ އޭޝިއަން ޓެނިސް ފެޑެރޭޝަން (އޭޓީއެފް) ގެ މުބާރާތުން އޭނާ ހޯދި ކާމިޔާބީތަކަކީ، އުންމީދީ ޓެނިސް ކުޅުންތެރިޔާ އާރާގެ އެހެނިހެން ކާމިޔާބީތަކުގެ ތެރެއިން ފާހަގަކޮށްލެވޭ ކާމިޔާބީއެކެވެ.