ކެރީބިއަން ކަނޑަށް ބާރުގަދަ ބިންހެލުމެއް

ބާރުގަދަ 7.6 މެގްނިޓިއުޑުގެ ބިންހެލުމެއް މިދިޔަ ހޮނިހިރު ދުވަހުގެ ހަވީރު ކަރީބިއަން ކަނޑަށް ވަނީ އަރާފައެވެ. ހޮންޑޫރަސް ގެ އުތުރަށް 130 މޭލު، އަދި ކޭމެން އައިލެންޑްސް ގެ ހުޅަނގު ދެކުނުގެ ހިސާބަކަށް އަރައިފައިވާ މި ބިންހެލުމުގެ ސަބަބުން، އެމެރިކާއަށް ސުނާމީއެއް އަރައިފާނެކަން ސަމާލުކަމަށް ގެނެސްދޭ ފަންނީ ސިގްނަލުތަކަށް ސަމާލު އަރައި، ޕުއާރޓެރީކޯ އާއި، ވަރޖިން އައިލެންޑްސް ފަދަ އެތައް ހިސާބުތަކެއްގެ ރާޅުތައް 3 މީޓަރު މައްޗަށް އުފުލިގެން ގޮސްފައިވާކަމަށް ބީބީސީ ނިއުސްއަށް މަޢުލޫމާތު ލިބިފައިވެއެވެ. ނަމަވެސް، މި ބިންހެލުމަށް މަޑުޖެހުމެއް އައިސްފައިވާކަން ޔަޤީންވުމުން މި ސަމާލުތައް މިހާރު ވަނީ ހުއްޓުވާފައެވެ. މިއާއެކު ވެސް، ކޭމެން އައިލެންޑްސްގެ ސަރުކާރުން އެ ރަށުގެ ރައްޔިތުންނަށް، އަތިރިމައްޗާ ދުރުގައިވާ ހިސާބުތަކަށް ވަގުތީ ގޮތުން ބަދަލުވުމަށް އިލްތިމާޒްކޮށްފައިވެއެވެ. 

އެއްވެސް ބިމަކަށް މި ބިންހެލުމުގެ ސަބަބުން ގެއްލުމެއް ލިބިފައިވާކަން ރިކޯރޑުކުރެވިފައި ނެތްނަމަވެސް، އެ ހިސާބުގެ ކަނޑުގެ ލޮނުގަނޑު 11.8 އިންޗިއަށް މި ބިންހެލުމުގެ ފަހުން އުފުލިފައިވާކަން ދިރާސާކުރާ ފަރާތްތަކުން ވަނީ މަޢުލޫމާތު ދެއްވާފައެވެ. 2021 ގައި ހައިޓީ އަށް އެރި 7.2 މެގްނިޓިއުޑުގެ ބިންހެލުމަށްފަހު މިއީ މި ސަރަހައްދަށް އަރާފައިވާ އެންމެ ބޮޑު ބިންހެލުންކަމަށް އިދާރާތަކުން ހާމަކުރެއެވެ. 

ކެރީބިއަން ކަނޑުގެ، ބިންހެލުން އަރާފައިވާ ހިސާބަކީ، ބިމާ ދުރު ހިސާބެއްކަމުން، ގެއްލުމެއް ނުލިބި ބިންހެލުމުގެ އަސަރު އޮބިގެން ގޮސްފައިވާކަމަށް ދިރާސާވެރިން ލަފާކޮށްފައިވެއެވެ. އެމެރިކާގެ ޖިއޮލޮޖިކަލް ސާރވޭއިން ހާމަކުރާގޮތުގައި މި ސަރަހަށްދަށް ބޮޑެތި ބިންހެލުން އެރުމަކީ ނާދިރުކަމެއް ނޫނެވެ. އަދި އެނގިގެންނާއި ނޭނގި ވެސް އެ ސަރަހައްދަށް ގިނަ ބިންހެލުންތަކެއް އަރާފައި ވާނެކަމަށް އެފަރާތްތަކުން ޤަބޫލުކުރެއެވެ. އެމެރިކާގެ ސުނާމީ ވާރނިންގ ސެންޓަރުން ވެސް ކުރިން އިއްވި ސަމާލުތައް މިހާރު ވަނީ ކަށަވަރުކަމާއެކު ބާތިލުކޮށްފައެވެ.