ޚަބަރު
އިފުރު ރިސޯޓުން ގެއްލުނު އިންޑިއާ ފަތުރުވެރިޔާ ހޯދުމުގެ މަސައްކަތް ހުއްޓާލައިފި
އިފުރު ރިސޯޓް ފޮޓޯ:އިންޓަނެޓް
ރ. އިފުރު ރިސޯޓުގައި މޫދަށްއެރި އުޅެނިކޮށް ގެއްލުނު އިންޑިއާ ފަތުރުވެރިޔާ އަފްތާބް ޚާން ހޯދުމުގެ މަސައްކަތް ނިމުމަކަށް ގެނެސްފިކަމަށް މޯލްޑިވްސް ޕޮލިސް ސަރވިސްއިން ބުނެފިއެވެ.
ޕޮލިހުން ނެރުނު ބަޔާނުގައި ބުނެފައިވާ ގޮތުގައި، 2025 ވަނަ އަހަރުގެ ޖެނުއަރީ 27 ވަނަ ދުވަހު އިފުރު ރިސޯޓު ކައިރީގައި މޫދުގައި އުޅެނިކޮށް ގެއްލުނު އަފްތާބް ޚާން އާއި އޭނާގެ އެކުވެރިއަކު ވަނީ ގަދަ އޮއެވަރާ ކުރިމަތިލާން ޖެހިފައެވެ. މިކަމުގެ ސަބަބުން އެއްގަމަށް އައުމަށް އުނދަގޫވެފައިވާކަމަށް ބަޔާނުގައި ބުނެފައިވެއެވެ.
މި ހާދިސާ ހިނގުމާ ގުޅިގެން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އާއި ކޯސްޓް ގާޑުން ވަނީ ވަގުތުން އާފްތާބް ހޯދުމުގެ މަސައްކަތް ފަށާފައެވެ. މި މަސައްކަތުގައި އިފުރު އިން ފެށިގެން މާނެންފުށި، ލުނބޮކަނޑޫ އަދި އަރިއަދޫއާ ހަމައަށް ސަރަޙައްދު ބަލާ ފާސްކޮށްފައިވެއެވެ. ނަމަވެސް މިހާތަނަށް އަފްތާބް ޚާން ފެނިފައެއް ނުވެއެވެ.
އޮފިޝަލުން ބުނާ ގޮތުގައި ފެނުއަޑިން ވެސް ހޯދުމުގެ މަސައްކަތް ކުރެވިފައިވެއެވެ. ނަމަވެސް ގިނަ ދުވަސްތަކެއް ވަންދެން މަސައްކަތްކުރުމަށްފަހު، 2025 ވަނަ އަހަރުގެ ފެބްރުއަރީ 1 ވަނަ ދުވަހު ވަނީ ހޯދުމުގެ މަސައްކަތް ހުއްޓާލާފައެވެ.
#MPSPressStatement: 171-A(CA)PS/2025/03 - Updates on Search Efforts for Missing Indian National at Ifuru Island Resort https://t.co/xfs8oTATR8 pic.twitter.com/MM8lQOavrC
— Maldives Police (@PoliceMv) February 10, 2025
މޯލްޑިވްސް ޕޮލިސް ސަރވިސްއިން ވަނީ އަފްތާބް ޚާންގެ އާއިލާއަށް ހަމްދަރުދީ ފާޅުކޮށް، މި ދަތި ވަގުތުގައި އެހީތެރިކަން ފޯރުކޮށްދޭނެކަން އަންގާފައެވެ. އަދި މިފަދަ ހާދިސާތައް ތަކުރާރުވިޔަ ނުދިނުމަށް، މޫދުގައި އުޅޭއިރު ރައްކާތެރިކަމުގެ އުސޫލުތަކަށް ސަމާލުވުމަށް އާންމުންނަށް އިލްތިމާސްކޮށްފައިވެއެވެ.
މީގެ އިތުރުން، މި ހާދިސާއާ ގުޅުންހުރި ފަރާތްތަކުގެ ޒާތީ މައުލޫމާތު ހާމަނުކުރުމަށާއި، ކަށަވަރުނުވާ މައުލޫމާތު ފެތުރުމުން ދުރުހެލިވުމަށް ޕޮލިހުން އެދިފައިވެއެވެ. އަދި މި ހާދިސާއާ ގުޅޭ އެއްވެސް މައުލޫމާތެއް އޮތްނަމަ ފުލުހުންނަށް އެންގުމަށް އެދިފައިވެއެވެ.
