ބީއެމްއެލްގެ ގެދޮރު ލޯނު ސްކީމްތަކަށް ރައްޔިތުންނަށް ލުއިފަސޭހަ ބަދަލުތަކެއް

ބޭންކު އޮފް މޯލްޑިވްސް (ބީއެމްއެލް) އިން ގެދޮރު އެޅުމަށާއި ފްލެޓް ގަތުމަށް ދޫކުރާ ލޯނު ސްކީމްތަކަށް ރައްޔިތުންނަށް ފަސޭހަވާނެ ގިނަ ބަދަލުތަކެއް ގެނެސްފިއެވެ. މި ބަދަލުތަކާ ގުޅޭގޮތުން މިއަދު ބޭއްވި ނޫސްވެރިންގެ ބައްދަލުވުމެއްގައި ބީއެމްއެލްގެ އިސް ވެރިން މި މަޢުލޫމާތު ހާމަކުރެއްވިއެވެ.

ބައްދަލުވުމުގައި ވާހަކަދައްކަވަމުން ބީއެމްއެލްގެ ރީޓެއިލް ބޭންކިން ޑައިރެކްޓަރ ބަދުރުއްދީން ވިދާޅުވީ، މި ބަދަލުތައް ގެނެސްފައިވަނީ ރައްޔިތުންނަށް ގެދޮރުވެރިކަން އިތުރަށް ޔަޤީންކޮށްދިނުމަށާއި ގެދޮރު އިމާރާތްކުރުމުގެ ފުރުޞަތު އިތުރަށް ފަހިކޮށްދިނުމުގެ މަޤުޞަދުގައި ކަމަށެވެ. އަދި މި ބަދަލުތަކާއެކު އަގުހެޔޮކޮށް އަދި މަހުން މަހަށް ދައްކަންޖެހޭ އަދަދު ކުޑަވެ، އިޤުތިޞާދީ ދުވެލި ހަލުވިވެގެންދާނެކަމަށް އޭނާ ފާހަގަކުރެއްވިއެވެ.

ބީއެމްއެލް އިސްލާމިކްގެ މެނޭޖަރ މަރިޔަމް ޝިރާނީ ވިދާޅުވީ، މި ސްކީމްގެ ދަށުން މިހާރު ބިމާއި ޕާކުކުރާނެ ޖާގަ ގަތުމަށްވެސް ލޯނު ދޫކުރާނެ ކަމަށެވެ. އަދި ލޯނު ނަގާއިރު ދައްކަންޖެހޭ ޑައުންޕޭމަންޓަށްވެސް ބަދަލުތަކެއް ގެނެވިފައިވާ ކަމަށް އޭނާ ވިދާޅުވިއެވެ. މިގޮތުން 3 މިލިއަން ރުފިޔާގެ ތަނެއް ގަންނަނަމަ ޑައުންޕޭމަންޓަށް ދައްކަންޖެހޭ އަދަދު 10 އިންސައްތައަށް ކުޑަކުރެވިފައިވާ ކަމަށް ޝިރާނީ ވިދާޅުވިއެވެ.

މީގެ އިތުރުން، ގެދޮރު މަރާމާތުކުރުމަށް ދޫކުރާ ހޯމް ކޮންސްޓްރަކްޝަން ފައިނޭންސިންގގެ ދަށުން ފައިނޭންސް އަނބުރާ ދެއްކުމުގެ މުއްދަތު 15 އަހަރުން 20 އަހަރަށް އިތުރުކޮށް، ފައިނޭންސް ނެގޭ އެންމެ މަތީ އަދަދު 15 މިލިއަން ރުފިޔާއިން 45 މިލިއަން ރުފިޔާއަށް އިތުރުކޮށްފައިވާ ކަމަށްވެސް ޝިރާނީ ވިދާޅުވިއެވެ.

މި ބަދަލުތަކާއެކު، ގިނަ ރައްޔިތުންނަށް ގެދޮރުވެރިވުމުގެ ފުރުޞަތު އިތުރުވެ، ޤައުމުގެ އިޤްތިޞާދަށް ހެޔޮ ބަދަލުތަކެއް އަންނާނެކަމަށް ބީއެމްއެލްއިން އުންމީދުކުރެއެވެ.