ރާއްޖޭގެ ރަސްމީ ރިޒާވަށް ބޮޑު ކުރިއެރުމެއް: 50 މިލިއަން އެމެރިކާ ޑޮލަރަށްވުރެ އިތުރަށް މާރުކޮށްފި

ފަތުރުވެރިކަމުގެ ސިނާއަތުން ލިބޭ ޑޮލަރު ރާއްޖޭގެ ބޭންކުތަކަށް މާރުކުރަން މަޖުބޫރުވާ ގޮތަށް ހެދި ގާނޫނުގެ ސަބަބުން ޖެނުއަރީ މަހުގެ ނިޔަލަށް 50 މިލިއަން ޑޮލަރަށްވުރެ އިތުރަށް ލިބިއްޖެއެވެ. މި މަޢުލޫމާތު ހާމަކުރައްވާފައިވަނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިންނެވެ.

ބޭރު ފައިސާއާ ބެހޭ ގާނޫނުގެ ދަށުން އެކުލަވާލެވުނު ގަވާއިދުގައިވާ ގޮތުން، ރިސޯޓުތަކުން މާރުކުރަން ޖެހޭނީ ޓޫރިސްޓެއްގެ ބޮލަކަށް 500 ޑޮލަރެވެ. އަދި ގެސްޓްހައުސްތަކުން ބޭންކުތަކަށް މާރުކުރަން ޖެހޭނީ އަންނަ ޓޫރިސްޓުންގެ ބޮލަކަށް 25 ޑޮލަރެވެ. މީގެ އިތުރުން، ވިޔަފާރިތަކަށް ލިބޭ އާމްދަނީގެ 20 ޕަސެންޓް މާރުކުރުމުގެ އިޚްތިޔާރުވެސް ދީފައިވެއެވެ.

އެމްއެމްއޭ އިން ވިދާޅުވިގޮތުގައި މި އަހަރުގެ ޖަނަވަރީ މަސް ނިމުނުއިރު ރާއްޖޭގެ ރަސްމީ ރިޒާވް ހުރީ 708.1 މިލިއަން އެމެރިކާ ޑޮލަރުގައެވެ. މިއީ، 2023 ވަނަ އަހަރުގެ ޑިސެންބަރު މަހުގެ ނިޔަލަށް ރިޒާވްގައި ހުރި މިންވަރާ ބަލާއިރު %5 ގެ އިތުރުވުމެކެވެ. މީގެ މައިގަނޑު ސަބަބަކީ ޖަނަވަރީ މަހު ރިޒާވުން ޚަރަދު ކުރި މިންވަރަށް ވުރެ ލިބިފައިވާ އަދަދު  އިތުރުވުން ކަމަށް އެމްއެމްއޭ އިން ވިދާޅުވިއެވެ.

އަދި، ޖަނަވަރީ މަހުގެ ނިޔަލަށް ޓެކުހާއި ފީގެ ގޮތުގައި ސަރުކާރަށް ލިބިފައިވާ ބޭރުފައިސާގެ މިންވަރު ވަނީ ޑިސެންބަރު މަހާ އަޅާބަލާއިރު %12 އިތުރުވެފައެވެ. މި މުއްދަތުގައި، ރާއްޖޭގެ ރިޒޯޓުތަކުގެ ތެރެއިން %90 ރިޒޯޓުތަކުން މި ގަވާއިދާ އެއްގޮތަށް ބޭންކިން ނިޒާމަށް ބޭރު ފައިސާ މާރުކޮށްފައިވާ ކަމަށްވެސް އެމްއެމްއޭ އިން ވިދާޅުވެފައި ވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ބޭރުފައިސާގެ ޤާނޫނު ރަނގަޅަށް ތަންފީޒުވާނަމަ، މިހާރު ބޭންކު ކާޑުތަކަށް ކަނޑައަޅާފައިވާ ޑޮލަރު ލިމިޓު އަންނަ އަހަރުގެ ދެވަނަ ކުއާޓާގައި 1,400 އަށް މަތިކޮށްދެވޭނެކަމަށް ވިދާޅުވެފައެވެ. މީގެއިތުރުން އަންނަ އަހަރުގެ ފުރަތަމަ ކުއާޓާގައި ބޭރަށް ފުރާ ކޮންމެ ދިވެއްސަކަށް ދޫކުރާ 500 ޑޮލަރު ދެގުނަކުރެވޭނެކަމަށްވެސް އެމަނިކުފާނު ވަނީ ވިދާޅުވެފައެވެ.