ލ. ކަލައިދޫ ފެނުގެ މަޝްރޫޢު ނިމި 228 ގެއަކަށް ފެނުގެ ޚިދުމަތް ފޯރުކޮށްދޭން ފަށައިފި

ލ. ކަލައިދޫގައި ކުރިއަށް ގެންދެވުނު ފެނުގެ މަޝްރޫޢުގެ މަސައްކަތްތައް ނިމި، މިހާރު ވަނީ އޮޕަރޭޓަރާ ހަވާލުކުރެވިފައެވެ. މި މަޝްރޫޢުގެ ދަށުން މުޅި ރަށުގައި ޖުމްލަ 228 ގެދޮރަށް ފެނުގެ ޚިދުމަތް ޤާއިމުކުރެވިފައިވާ ކަމަށް މަޢުލޫމާތު ލިބިފައިވެއެވެ.

މި މަޝްރޫޢުގެ މަސައްކަތްތައް ކުރިއަށް ގެންގޮސްފައިވަނީ އިންޑިއަން އެގްޒިމް ބޭންކުގެ ފައިނޭންސިންގގެ ދަށުން އެސް.އެމް.ސީ. އިންފްރާސްޓްރަކްޗަރސް ޕްރައިވެޓް ލިމިޓެޑްގެ ފަރާތުންނެވެ. މަޝްރޫޢުގެ މަސައްކަތްތައް ނިމި، މިހާރު ވަނީ ޑިފެކްޓްސް ލައަބިލިޓީ ޕީރިއަޑްގެ ދަށުން ޚިދުމަތް ފޯރުކޮށްދޭން ފަށާފައެވެ.

ލ. ކަލައިދޫގައި ފެނުގެ ޚިދުމަތް ޤާއިމުކުރުމުން، އެ ރަށުގެ ރައްޔިތުންނަށް ސާފު ބޯފެން ލިބުމުގެ އިތުރުން ދިރިއުޅުމުގެ ފެންވަރު ރަނގަޅުވެގެންދާނެ ކަމަށް ބެލެވެއެވެ. މި މަޝްރޫޢަކީ ސަރުކާރުން ރާއްޖޭގެ ރަށްރަށުގައި އަސާސީ ޚިދުމަތްތައް ފޯރުކޮށްދިނުމަށް ކުރިއަށްގެންދާ މަސައްކަތްތަކުގެ ތެރެއިން އެއް މަޝްރޫޢެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު  ވިދާޅުވެފައިވަނީ ރާއްޖޭގެ ހުރިހާ ރަށެއްގައިވެސް ސާފު ބޯފެން ލިބޭނެ އިންތިޒާމު ހަމަޖެއްސުމަކީ ސަރުކާރުގެ އަމާޒެއް ކަމަށެވެ. މިފަދަ މަޝްރޫޢުތަކުގެ ސަބަބުން ރަށްރަށުގެ ރައްޔިތުންގެ ދިރިއުޅުމުގެ ފެންވަރު މަތިވެ، ޞިއްޙީ ރައްކާތެރިކަން އިތުރުވެގެންދާނެއެވެ.