ހިޔާ ފްލެޓުތަކުގެ އިރުމަތިން ބަންދުކޮށްފައިވާ ސަރަޙައްދަށް އާންމުން ނުވަނުމަށް އަންގައިފި

ހުޅުމާލެ ފޭސް 2ގައި ހިޔާ ފްލެޓްތަކުގެ އިރުމަތި ފަރާތުން ފެންސުޖަހައި ބަންދުކޮށްފައިވާ ސަރަޙައްދަށް އާންމުން ނުވަނުމަށް، ހުޅުމާލެ ޑިވެލޮޕްމެންޓް ކޯޕަރޭޝަން، އެޗްޑީސީއިން އަންގައިފިއެވެ.

މިކަން އެންގުމުގެ ގޮތުން އެ ކުންފުނިންކުރި އިޢުލާނުގައި ބުނީ، ހުޅުމާލެ ފޭސް 2ގެ އިރުމަތި ފަރާތުން ފެންސު ޖަހާފައިވާ ސަރަޙައްދަކީ މިވަގުތު ޗެނަލް 2 ޕްރޮޖެކްޓުގެ މަސައްކަތްތަކެއް ކުރިޔަށްދާ ސަރަޙައްދެއް ކަމަށާއި، މިކަމާ ގުޅިގެން އެ ސަރަޙައްދުގައި ގިނަ އަދަދަކަށް ހެވީ ވެހިކަލް ބޭނުންކުރަމުންދާނެ ކަމަށެވެ. 

އެހެންކަމުން މި މަސައްކަތްތަކާ ގުޅިގެން މި ސަރަޙައްދު ބޭނުން ކުރުމަކީ ރައްކާތެރިކަމެއް ނޫން ކަމަށް އެ ކުންފުނިން ވަނީ ހާމަކޮށްފައެވެ.

އަދި މި ސަރަޙައްދައް ކޮންމެހެން ވަންނަންޖެހޭ ޙާލަތެއް އަތުވެއްޖެނަމަ، ސަރަޙައްދަށް ވަނުމުގެ ކުރިން އެ ކޯޕަރޭޝަންގެ ކަމާގުޅުންހުރި ފަރާތުން ލިޔުމުން ޙުއްދަ ހޯދައި، އެ ލިޔުމުގައި އަންގާފައިވާ ޝަރުތުތަކާ އެއްގޮތަށް ޢަމަލުކުރުމަށް ވަނީ އެދިފައެވެ.