ދުނިޔެ
އދ. އިން ހަނގުރާމައިގެ ޤައިދީންގެ ހާލަތާމެދު ކަންބޮޑުވުން ފާޅުކޮށްފި

ހަނގުރާމައިގެ ޤައިދީއެއް ދޫކޮށްލުން ފޮޓޯ:އިންޓަނެޓް
ހުލާސާ
ޣައްޒާގައި ހިނގަމުންދާ ހަނގުރާމައިގެ ތެރެއިން ދޫކޮށްލެވުނު އިސްރާއީލް އަދި ފަލަސްތީނު ޤައިދީންގެ ހާލަތާމެދު އދ. ގެ އިންސާނީ ޙައްޤުތަކާބެހޭ އޮފީހުން ކަންބޮޑުވުން ފާޅުކޮށްފިއެވެ.
އދ. ގެ އިންސާނީ ޙައްޤުތަކާބެހޭ އޮފީހުގެ ތަރުޖަމާނު ތަމީން އަލް-ކީތަން ވިދާޅުވީ، ޣައްޒާގައި ހިނގަމުންދާ ހަނގުރާމަ ހުއްޓުމަކަށް ގެނައުމަށް ވެވުނު އެއްބަސްވުމުގެ ދަށުން ދޫކޮށްލެވުނު ޤައިދީންގެ ފޮޓޯތަކުން ފެންނަ މަންޒަރުތަކުން އެ ފަރާތްތަކުގެ ހާލަތު ވަރަށް ދަށްކޮށް ހުރިކަން ފާހަގަކުރެވޭ ކަމަށެވެ.
މިދިޔަ ހަފްތާ ގައި ބަންދުން ދޫކޮށްލެވުނު ޤައިދީންގެ ފޮޓޯތަކުން ފެންނަނީ އެ މީހުންނާމެދު އަނިޔާވެރި ޢަމަލުތައް ހިންގާފައިވާކަމާއި، ކާންދީފައި ނުވާކަން. މިއީ އެ މީހުން ޣައްޒާގައި ބަންދުކޮށްފައި ތިބި ހާލަތު ދައްކުވައިދޭ ކަމެއް އަލް-ކީތަން
އަދި ހަމާސްއިން ދޫކޮށްލި ބަންދީން އާންމުންގެ ކުރިމަތީގައި ދައްކާފައިވާކަމާއި، އެ މީހުން ދޫކޮށްލުމުގެ ތެރޭގައި މަޖުބޫރުން ބަޔާންތަކެއް ދީފައިވާކަމަށް ބެލެވޭ ކަމަށްވެސް އޭނާ ވިދާޅުވިއެވެ.
އިސްރާއީލުން ދޫކޮށްލި ފަލަސްތީނު ޤައިދީންގެ ހާލަތާ ގުޅޭގޮތުންވެސް އަލް-ކީތަން ކަންބޮޑުވުން ފާޅުކުރެއްވިއެވެ. އެ ޤައިދީން ދޫކޮށްލާފައިވާ ގޮތުންވެސް ކަންބޮޑުވާންޖެހޭ ކަންތައްތަކެއް ހުރި ކަމަށް އޭނާ ވިދާޅުވިއެވެ.
އދ. ގެ ތަރުޖަމާނު ގޮވާލާފައިވަނީ އިސްރާއީލާއި ހަމާސްއިން ބަންދުގައި ތިބި އެންމެންނާމެދު އިންސާނިއްޔަތުކަމާއެކު ޢަމަލުކުރުމަށާއި، އެއްވެސް ބާވަތެއްގެ އަނިޔާވެރި ޢަމަލެއް ނުހިންގުމަށެވެ. އަދި ހަމާސްއިން ޣައްޒާގައި ހިފަހައްޓާފައި ތިބި އެންމެން ދޫކޮށްލުމަށާއި، އިސްރާއީލުން ޤާނޫނާ ޚިލާފަށް ބަންދުކޮށްފައި ތިބި އެންމެން ދޫކޮށްލުމަށްވެސް އޭނާ ގޮވާލެއްވިއެވެ.