ޚަބަރު
ހައިވޭ އެކްސިޑެންޓުގައި ބިދޭސީއަކު މަރުވި މައްސަލައިގައި ދައުވާ ކުރުމަށް ފޮނުވަނީ

ބްރިޖް މަތީގައި ފުލުހެއް ހަރަކާތްތެރިވުން|ފޮޓޯ: އެޓޯލް ޓައިމްސް
މި މަހުގެ އެއްވަނަ ދުވަހު ހުޅުމާލެއިން މާލެއަށް ދަތުރުކުރުމަށް ބޭނުންކުރާ ހައިވޭގައި ހިނގި އެކްސިޑެންޓުގައި ބިދޭސީއަކު މަރުވި މައްސަލައިގެ ތަޙުޤީޤު އަވަހަށް ނިންމުމަށްފަހު ދައުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވުމަށް ތައްޔާރުވަމުން އަންނަކަމަށް ފުލުހުން ހާމަކޮށްފިއެވެ.
މިދިޔަ ހޮނިހިރު ދުވަހު ހިނގި މި ހާދިސާގައި މަރުވެފައިވަނީ ބަންގްލަދޭޝްއަށް ނިސްބަތްވާ، 30 އަހަރުގެ ޖާވިދު ޗައުދަރީ ނަމަކަށް ކިޔާ މީހެކެވެ.
މި މައްސަލައާ ގުޅިގެން އުމުރުން 60 އަހަރުގެ ދިވެހި އަންހެނެއްގެ އެއްގަމު އުޅަނދު ދުއްވުމުގެ ލައިސަންސް ހިފަހައްޓައި، އެ މީހާގެ ސައިކަލު ޓޯވކުރިކަމަށް މިދިޔަ ހަފްތާގައި ފުލުހުން ހާމަކޮށްފައި ވެއެވެ.
އަދި އޭނާގެ ލައިސަންސް ހިފަހައްޓާފައިވާ މުއްދަތު ކޯޓު އަމުރެއްގެ ދަށުން މިހާރު އިތުރުކޮށްފައިވާކަމަށް ވެސް ފުލުހުން ހާމަކުރިއެވެ.
މި ތަޙުޤީޤާ ގުޅިގެން ފުލުހުން އިއްޔެ ނެރުނު ބަޔާނެއްގައި ބުނީ، އެކްސިޑެންޓުގެ ސީސީޓީވީ ފުޓޭޖު ދިރާސާކުރުމުން ޖާވިދު ދުއްވަމުން ދިޔަ ސައިކަލު ކޯނުގައި ޖެހި ވެއްޓުނު ވަގުތު، ފަހަތުން އައި ސައިކަލަކުން އޭނާގެ ބޮލާ ދިމާލުގައި ޖެހޭ މަންޒަރު ފެންނަ ކަމަށެވެ.
އަދި މިހެން ކަންތައް ދިމާވުމުން ފަހަތުން ސައިކަލުގައި އައި މީހާ މަޑުކުރިކަމަށް ވެސް ފުލުހުން ހާމަކޮށްފައިވެއެވެ.
އެ މައްސަލައިގެ ތަހުގީގުގެ ތެރެއިން، އަންހެން މީހާ ސައިކަލު ދުއްވި ދުވެލި ދެނެގަތުމަށް މަސައްކަތް ކުރަމުން އަންނަ ކަމަށާއި، ތަޙުޤީޤު ފުރިހަމަކުރުމަށްފަހު ޕީޖީއަށް ފޮނުވަން ކުރަން ޖެހޭ މަސައްކަތްތައް ކުރަމުން އަންނަ ކަމަށް ފުލުހުން ވަނީ ބުނެފައެވެ.
މި އެކްސިޑެންޓް ހިނގާފައި ވަނީ ފެބްރުއަރީ މަހުގެ 1 ވަނަ ދުވަހު ހެނދުނު 8:19 ހާއިރެވެ. މި ހާދިސާ ހިނގާފައިވަނީ، ހުޅުމާލެ އިން މާލެއަށް އަންނަ ލޭންގެ ސޯލަރ ޕެނަލަތައް ކައިރީގައި މަސައްކަތެއްކުރާކަން އަންގައިދިނުމަށް ބަހައްޓާފައި ހުރި ކޯނެއްގައި ޖެހިގެންކަމަށް ފުލުހުން ވިދާޅުވެއެވެ. އަދި މި އެކްސިޑެންޓުގައި އަނިޔާވެފައިވާ ބިދޭސީމީހާއަށް ހޮސްޕިޓަލުގައި ފަރުވާދެމުން ދަނިކޮށް، އެދުވަހުގެ 09:05 ހާއިރު އޭނާ ވަނީ މަރުވެފައެވެ.