ޚަބަރު
ބައިނަލްއަޤްވާމީ ތިން ޖަމްޢިއްޔާއަކަށް މަންދޫބުން ކަނޑައެޅުމަށް ފޮނުވި ނަންތައް ކޮމެޓީއަށް
ބައިނަލްއަޤްވާމީ ތިން ޖަމްޢިއްޔާއަށް ކަނޑައެޅުމަށް ފޮނުވި ތިން ބޭފުޅުން---
ބައިނަލްއަޤްވާމީ ތިން ޖަމްޢިއްޔާއަކަށް ދާއިމީ މަންދޫބުން ކަނޑައެޅުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ރައްޔިތުންގެ މަޖިލީހަށް ފޮނުއްވި ނަންފުޅުތައް ދިރާސާ ކޮމެޓީއަށް ހުށަހަޅައިފިއެވެ.
މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ ނަންފުޅުތަކެއް ހުށަހެޅުއްވީ އިންޓަރނޭޝަނަލް މެރިޓައިމް އޯގަނައިޒޭޝަން، އައިއެމްއޯއާއި، އިންޓަރނޭޝަނަލް ރިނިއުބަލް އެނަރޖީ އޭޖެންސީ، އައިރީނާ، އަދި ވޯލްޑް ޓްރޭޑް އޯގަނައިޒޭޝަން، ޑަބްލިއުޓީއޯއަށެވެ.
ދިވެހިރާއްޖޭން އައިއެމްއޯއަށް ކަނޑައަޅާ ދާއިމީ މަންދޫބެއްގެ ގޮތުގައި ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވާފައިވަނީ، އިނގިރޭސިވިލާތަށް ދިވެހިރާއްޖޭން ކަނޑައަޅުއްވާފައިހުންނަވާ ސަފީރު ޑރ. އިރުތިޝާމް އާދަމްގެ ނަންފުޅެވެ. އައިރީނާއަށް ކަނޑައަޅާ ދާއިމީ މަންދޫބަކަށް އައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވަނީ އެކުވެރި ޢަރަބި އިމާރާތަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރު މުޙައްމަދު ހުސައިން ޝަރީފު ނަންފުޅެވެ. އަދި ޑަބްލިއުޓީއޯއަށް ކަނޑައަޅާ މަންދޫބަކަށް ރައީސުލްޖުމްހޫރިއްޔާ ފޮނުއްވާފައިވަނީ ޖެނީވާގައި ހުންނަ އެކުވެރި ދައުލަތްތަކުގެ މަރުކަޒުތަކަށް ދިވެހިރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު ޑރ. ސަލްމާ ރަޝީދުގެ ނަންފުޅެވެ.
ދިވެހިރާއްޖޭގެ ފޮރިން ސަރވިސް ޤާނޫނުގައި ބަޔާންކޮށްފައިވާ ގޮތުން، ބޭރުގެ ޤައުމުތަކަށް ކަނޑައަޅާ ސަފީރުންނާއި ބައިނަލްއަޤުވާމީ ޖަމްޢިއްޔާތަކަށް ކަނޑައަޅާ މަންދޫބުން ރައީސުލްޖުމްހޫރިއްޔާ އައްޔަން ކުރައްވާނީ ރައްޔިތުންގެ މަޖިލީހަށް ހުށަހެޅުއްވުމަށްފަހު މަޖިލީހުން ރުހުން ލިބިވަޑައިގަތުމުންނެވެ.
ދާއިމީ މަންދޫބުން ކަނޑައެޅުމުގެ މަރުހަލާތައް ކުރިޔަށްގެންދާ ޖަމްޢިއްޔާތަކުގެ ތެރެއިން އައިއެމްއޯއަކީ ކަނޑު ދަތުރުފަތުރާބެހޭ އދ.ގެ ޖަމުޢިއްޔާއެކެވެ. އަދި އައިރީނާއަކީ އިއާދަކުރަނިވި ހަކަތައިގެ ދާއިރާއިން ގުޅިގެން މަސައްކަތް ކުރުމަށް އެކުލަވާލާފައިވާ ޖަމުޢިއްޔާއެކެވެ. މީގެ އިތުރުން ދެން ހިމެނޭ ޑަބްލިއުޓީއޯއަކީ ޤައުމުތަކުގެ މެދުގައި ހިނގާ ވިޔަފާރީގެ ކަންކަމާ ގުޅޭގޮތުން އެކުލަވާލާފައިވާ ބައިނަލްއަގުވާމީ ޖަމުޢިއްޔާއެކެވެ.
