މި އަހަރަށް ފަހު ކިއުގައި ޖެހިގެން މަސްކިރުވާކަށް ނުޖެހޭނެ: މަސްވެރިކަމާބެހޭ ވަޒީރު

ކުރިއަށް އޮތް ދެ ދުވަހުގެތެރޭގައި މަސްދޯނިފަހަރުން މިފްކޯއަށް މަސްކިރުވަން އޮތް ކިއު ނައްތާލާނެކަމަށާއި، މިއީ މަސްވެރިން ކިޔޫގައި ޖެހިގެން މަސް ކިރާނެ ފަހުއަހަރުކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ރައްޔިތުންގެ މަޖިލީހުގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވީ، ކޮންމެ އަހަރަކުވެސް މަސްވެރިކަން ރަނގަޅު ދުވަސްވަރު މަސްދޯނިފަހަރު މަސްކިރުވަން ކިއުގައި ޖެހެން ޖެހޭކަމަށެވެ. ހަމައެހެންމެ، ފާއިތުވި ދެ އަހަރުގެ ޖަނަވަރީ އަދި ފެބްރުއަރީ މަހާއި އަޅާބަލާއިރުވެސް މި އަހަރު މަސްވެރިކަން ރަނގަޅުވެފައިވާކަން ވެސް ވަޒީރު ފާހަގަކުރެއްވިއެވެ.

ކިއު ނަންބަރު، މި މަހުގެ ނިޔަލަށް ދޯނިތަކަށް ދޫކޮށްފައިވާކަމަށާއި، ނަމަވެސް ކުރިއަށް އޮތް ދެ ދުވަހުގެ ތެރޭގައި ކިއު ނަންބަރު ދޫކޮށްފައިވާ ދޯނިތަކުން މަސް ކިރާ ނިމޭނެކަމަށް ވަޒީރު ވިދާޅުވިއެވެ. ފާއިތުވި އެއްވެސް ސަރުކާރަކުން ކިއު ނައްތާލަން އެއްވެސް މަސައްކަތެއް ކޮށްފައި ނެތުމަކީ، މަސްވެރިން މަސްކިރުމަށް ކިއުޖެހެން މެދުވެރިވި ސަބަބުކަން ފާހަގަކުރައްވަމުން ވަޒީރު ވިދާޅުވީ، މިއީ މަސްވެރިން މަސް ކިރުވަން ކިއުގައި ޖެހެންޖެހޭނެ ފަހު އަހަރުކަމަށެވެ.

އިރާދަކުރެއްވިއްޔާ މިއީ ކިއުގައި ޖެހޭނެ ފަހު އަހަރު. އަޅުގަނޑުމެންގެ މި ސަރުކާރުގެ ޑިވެލޮޕްމަންޓް ޕްލޭންގައި ނުވަތަ މަސްވެރިކަމުގެ ސިނާއަތުގެ ތަރައްޤީއަށް މިކުރެވޭ މަސައްކަތުން މި ކިއު އަޅުގަނޑުމެން ނައްތާލާނަން. ނައްތާލާފައި އިރާދަކުރެއްވިއްޔާ މަސްވެރިންނަށް އެއްވެސް ދަތިކަމަކާއި ނުލައި ކިތަންމެ މަސްވެރިކަން ރަނގަޅަސް ކިއުގައި ނުޖެހި މަސްވެރިނަން މަސްކިރޭނެ ހާލަތައް މަސްވެރި ސިނާއަތުގެ ހާލަތު އަޅުގަނޑުމެން ގެންނާނަން.

މަސްވެރިކަމާބެހޭ ވަޒީރު އަޙްމަދު ޝިޔާމް ވިދާޅުވިއެވެ.

މިފްކޯގެ މިވަގުތުގެ ކެޕޭސިޓީއަކީ ދުވާލަކު 420 ޓަނެވެ. ނަމަވެސް 450 ޓަނުގެ މަސް ކިރަންޖެހޭ ދުވަސްތައްވެސް މިހާރު އަންނަކަމަށް ވަޒީރު ވިދާޅުވިއެވެ.

މިދިޔަ ސަރުކާރުގައި މިފްކޯއަށް ގަނެފައި ހުރި ޖަޒީރާ ބޯޓުތައް މިހުރީ ވަރަށް އެފިޝިއަންސީ ދަށްކޮށް. ގިނަ ބޯޓުތައް މިހުރީ އޮޕަރޭޝަނުން ބޭރުގައި. ޖަޒީރާ2، ޖަޒީރާ3 ގެ މަރާމާތު އަޅުގަނޑުމެން ފަށްޓައިފިން ސީޒަންއަށް ވާންވާއިރަށް އޮޕަރޭޝަންއަށް ގެނެވޭތޯ. މި 2 ބޯޓު ގެނެވިއްޖެކަމަށްވަންޏާ މާދަމާއާއި އަނެއްދުވަހު މަސައްކަތްކޮށްގެން މި 2 ބޯޓު އޮޕަރޭޝަނަށް ގެނެވޭނެ. އެހެންވެއްޖެ ނަމަ މިހާރު މިއޮތް ކިއުއަށް ވަރަށް ބޮޑު ހައްލެއް ލިބޭނެ.

މަސްވެރިކަމާބެހޭ ވަޒީރު ވިދާޅުވިއެވެ.