ޚަބަރު
ދެ ބޮންޑެޑް ވެއަރހައުސްއެއްގައި ހުރި ދުންފަތުގެ ބާވަތްތަކެއް ޤަވާޢިދާ ޚިލާފަށް ނެރުނު މައްސަލައެއް ބަލަން ފަށައިފި

ކަސްޓަމްސް މޯލްޑިވްސް/ ފޮޓޯ: ދި އެޑިޝަން
އެކްސޮޓިކް އެންޓާރޕްރައިސެސް ބޮންޑެޑް ވެއާރހައުސްގެ ނަމުގައި ކަސްޓަމްސްގައި ރަޖިސްޓްރީކުރެވިފައިވާ ވެއާރހައުސްއެއް އެ ކުންފުނިން ބެލިއިރު، އެ ބޮންޑެޑް ވެއާރހައުސްގައި ހުންނަންޖެހޭ ކެމަލް ޔެލޯ ބްރޭންޑުގެ 165 ކޭސް ސިނގިރޭޓާއި، އެމެރިކަން ލެޖެންޑް ބްރޭންޑުގެ 110 ކޭސް ސިނގިރޭޓާއި، ރެޑް މެންޗެސްޓާރ ރޯޔަލް ބްރޭންޑުގެ ތިރީސް ކޭސް ސިނގިރޭޓު ޤަވާއިދާ ޚިލާފަށް އެ ބޮންޑެޑް ވެއާރ ހައުސްއިން ނެރެފައިވާކަން ވަނީ ފާހަގަކުރެވިފައެވެ.
ކަސްޓަމްސްގައި ރަޖިސްޓްރީވެފައިވާ އެހެން ބޮންޑެޑް ވެއާރހައުސްއެއްކަމަށްވާ އެސްޖީއެމް ބޮންޑެޑް ވެއާރހައުސް ޗެކުކުރިއިރު، މި ބޮންޑެޑް ވެއާރހައުސްގައި ވެސް ހުންނަންޖެހޭ އެމެރިކަން ލެޖެންޑު ބްރޭންޑުގެ 250 ކޭސް ސިނގިރޭޓާއި، އަފްޒަލް މޮލާސެސް ބްރޭންޑުގެ 130 ކޭސް، ޤަވާއިދާ ޚިލާފަށް ބޭރުކޮށްފައިވާކަން ކަސްޓަމްސްގެ ސަމާލުކަމަށް އައިސްފައިވެއެވެ.
ފުލުހުންގެ ސަމާލުކަމަށް މި ދެ މައްސަލަ ގެންގޮސް، ޙަޤީޤަތް ހޯދުމަށް ގިނަ ތަޙުޤީޤުތަކެއް ދަނީ ކުރެވެމުންނެވެ. ހަމައެހެންމެ، މި ދެ ބޮންޑެޑް ވެއާރހައުސްގެ ރަޖިސްޓްރީ ބާޠިލުކޮށް، އެކްސޮޓިކް އެންޓާރޕްރައިސެސް ބޮންޑެޑް ވެއާރހައުސްއިން، ކަސްޓަމްސަށް ދައްކަންޖެހޭ 47،182،011.86 ރުފިޔާއާއި، އެސްޖީއެމް ބޮންޑެޑް ވެއާރހައުސްއިން ކަސްޓަމްސަށް ދައްކަންޖެހޭ 20،720،412.54 ރުފިޔާ ހޯދާނީ ޝަރީޢަތް މެދުވެރިކޮށް ކަމަށް ނިންމާ މި ދެ މައްސަލަ ވަނީ ބަންޑާރަނައިބުގެ އޮފީހަށް ފޮނުވާފައެވެ.
ބޮންޑަޑް ވެއާހައުސްތަކުގެ ބެލެހެއްޓުންތެރިކަން ޚަރުދަނާކުރުމުގެ ގޮތުންނާއި، މިފަދަ މައްސަލަތައް މެދުވެރިވަމުންދާއިރު، ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި މީހުން ދިރިއުޅޭ އިމާރާތެއްގައި ނުވަތަ އެފަދަ އިމާރާތެއްގެ ބައެއްގައި ބޮންޑަޑް ވެއާރހައުސް ނުހެދޭގޮތަށް ކަސްޓަމްސްގެ ޢާންމު ޤަވާއިދަށް މިހާރު ވަނީ އިސްލާޙު ގެނެސްފައެވެ.