ޚަބަރު
ހުޅުމާލޭގައި އިމާރާތްކުރާ ދެ މިސްކިތެއް މި އަހަރު ނިމޭނެ
އާރުސީސީއިން އިމާރާތްކުރާ މިސްކިތް، ފޮޓޯ: އާރުސީސީ
ހުޅުމާލޭގައި އަމިއްލަ ފަރާތްތަކަކުން އިމާރާތްކުރަމުންދާ ދެ މިސްކިތެއް މި އަހަރުގެ ތެރޭގައި ނިމޭނެކަމަށް ލަފާކުރެވޭ ކަމުގައި އިސްލާމީ ކަންތައްތަކާ ބެހޭ ވުޒާރާއިން ހާމަކޮށްފިއެވެ.
އެގޮތުން އަޙްމަދު ސަލީމް އަދި ޙަފީޒާ އަޙްމަދުގެ ފަރާތުން އިމާރާތްކުރަމުންދާ މިސްކިތާއި، އެސްޖޭ ކޮންސްޓްރަކްޝަން ޕްރައިވެޓް ލިމިޓެޑުން އިމާރާތްކުރާ މިސްކިތުގެ މަސައްކަތް މި އަހަރު ނިމޭނެކަމަށް އެ ވުޒާރާއިން ވަނީ އަންދާޒާކޮށްފައެވެ.
އަދި މީގެ ތެރެއިން އަޙްމަދު ސަލީމް އަދި ޙަފީޒާ އަޙްމަދުގެ ފަރާތުން އިމާރާތްކުރަމުންދާ މިސްކިތް މި އަހަރުގެ މެއި މަހުގެ ނިޔަލަށް ނިމޭނެކަމަށް ބެލެވޭއިރު، އެސްޖޭ ކޮންސްޓްރަކްޝަން ޕްރައިވެޓް ލިމިޓެޑުން އިމާރާތްކުރާ މިސްކިތް ނިމޭނެކަމަށް އަންދާޒާކޮށްފައިވަނީ ޑިސެންބަރުމަހުގެ ނިޔަލަށެވެ.
މީގެ އިތުރުން، ހުޅުމާލޭގައި އަމިއްލަ ފަރާތްތަކުން އިމާރާތްކުރާ އިތުރު ތިން މިސްކިތެއް 2026 ވަނަ އަހަރުގެ މާރިޗުމަހުގެ ތެރޭގައި ނިމޭނެކަމަށް ބެލެވޭކަމަށް ވެސް އިސްލާމީ ކަންތައްތަކާ ބެހޭ ވުޒާރާއިން ހާމަކޮށްފައިވެއެވެ. އެ މިސްކިތްތަކަކީ ފެޑޯ ޕްރައިވެޓް ލިމިޓެޑުން އިމާރާތްކުރާ މިސްކިތަކާއި، ބެޗް ކޮންސްޓްރަކްޝަނުން އިމާރާތްކުރާ މިސްކިތަކާއި އަދި ސަންފްރޮންޓުންް އިމާރާތްކުރާ މިސްކިތެއް ހިމެނެއެވެ.
ހުޅުމާލެއާއި ރާއްޖޭގެ އެކި ހިސާބުތަކުގައި އިމާރާތްކުރަމުންދާ މިސްކިތްތަކުގެ މަސައްކަތްތައް އަވަސްކުރުމަށްޓަކައި، މިސްކިތްތަކުގެ މަސައްކަތްކުރާ ފަރާތްތަކާއި އިސްލާމީ ކަންތައްތަކާބެހޭ ވުޒާރާއާ ގުޅިގެން ގިނަ މަސައްކަތްތަކެއް ދަނީ ކުރަމުންނެވެ. މިގޮތުން މިސްކިތްތަކުގެ މަސައްކަތް އަވަސްކުރުމަށް އެކި ފަރާތްތަކުން ކުރަމުންދާ މަސައްކަތްތަކަށް އެ ވުޒާރާއިން ވަނީ ޝުކުރު އަދާކުރައްވާފައެވެ.
