ދިވެހި ދައުލަތަށް ޚިދުމަތް ކުރުމުގެ އިނާމަށް ނަން ހުށައެޅުމުގެ ފުރުސަތު ހުޅުވާލަނީ

ދިވެހި ދައުލަތަށް ޚިދުމަތް ކުރުމުގެ އިނާމަށް ނަން ހުށައެޅުމުގެ ފުރުސަތު ހުލުވާލައްވަން ނިންމަވާފިއެވެ. މި އިނާމަށް ނަން ހުށައެޅުމުގެ ފުރުސަތު ހުޅުވާލައްވާނީ، ޤައުމީ އިނާމާބެހޭ ކޮމެޓީއިން މިމަހުގެ 16 ވާ އާދީއްތަ ދުވަހު އެވެ. 

ރައީސުލްޖުމްހޫރިއްޔާގެ އޮފީހުން ވިދާޅުވީ، އިނާމު ދިނުމުގެ އުޞޫލު ދިވެހި ސަރުކާރުގެ ގެޒެޓުގައި ޝާއިޢުކުރައްވާނެ ކަމަށެވެ. އަދި، މި އިނާމަށް ހުށައެޅުމުގެ ފުރުސަތު ހުޅުވާލައްވާނީ، މިމަހުގެ 16 ވަނަ ދުވަހުން ފެށިގެން އަންނަ މާރިޗު މަހުގެ 18 ވަނަ ދުވަހުގެ ނިޔަލަށް ކަމަށް ރައީސް އޮފީހުން މަޢުލޫމާތުދެއެވެ. މީގެ އިތުރުން، އެ އޮފީހުން ވިދާޅުވީ، ދިވެހި ދައުލަތަށް ޚިދުމަތް ކުރުމުގެ އިނާމަށް ނަން ހުށައެޅޭނީ ހަމައެކަނި ރައީސުލްޖުމްހޫރިއްޔާގެ އޮފީހުގެ "ފޯމު ހުށަހެޅުން" ޕޯޓަލް މެދުވެރިކޮށް ކަމަށެވެ. 

ރައީސް އޮފީހުން ވިދާޅުވީ، މި އިނާމަކީ ދިވެހި ދައުލަތަށް 35 އަހަރަށް ވުރެ ގިނަ ދުވަހު ޚިދުމަތްކޮށްފައިވާ މުވައްޒަފުންނަށް ދެވޭ އިނާމެއް ކަމަށެވެ. ހަމަ އެހެންމެ، މި މުވައްޒަފުންގެ ތެރެއިން މަޤާމުގެ މަސްއޫލިއްޔަތު އަދާކުރުމުގައި ޤާބިލުކަމާއި، އިޚްލާޞްތެރިކަމާއި އެކު ކޮށްފައިވާ ޚިދުމަތްތަކާއި، އެ މުއައްސަސާއެއްގެ ކުރިއެރުމަށް ކޮށްދީފައިވާ ޚިދުމަތްތަކުގެ އަގުވަޒަންކުރުމުގެ ގޮތުން ޤައުމީ ފެންވަރުގައި ދިވެހި ދައުލަތުން ރައީސުލްޖުމްހޫރިއްޔާ ދެއްވާ ޝަރަފުވެރި އިނާމެއް ކަމަށް ރައީސް އޮފީހުން ވިދާޅުވިއެވެ. މީގެ އިތުރުން އެ އޮފީހުން ވިދާޅުވީ، މި އިނާމުގެ ގޮތުގައި ރައީސުލްޖުމްހޫރިއްޔާ ދެއްވާނީ، އައްޑަނައަކާއި، ޝަރަފުގެ ބެޖަކާއި، ހަނދާނީ ލިޔުމެއް ކަމަށެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ، ފާއިތުވެދިޔަ އަހަރުތަކެކޭ އެއްފަދައިން މިއަހަރުވެސް ދިގު މުއްދަތަކަށް ދައުލަތަށް ޚިދުމަތްކުރައްވާފައިވާ ބޭފުޅުންގެ މަޢުލޫމާތު، ޤައުމީ އިނާމާބެހޭ ކޮމިޓީއަށް ރައީސުލްޖުމްހޫރިއްޔާ ވަނީ މިހާރު ފޮނުއްވާފައި ކަމަށެވެ. އެގޮތުން، މިއަހަރު އެމަނިކުފާނު ފޮނުއްވާފައިވަނީ ޖުމްލަ 42 އަހަރަށް ވުރެ ގިނަ ދުވަހު ދައުލަތަށް ޚިދުމަތް ކުރައްވާފައިވާ ބޭފުޅުންގެ މަޢުލޫމާތު ކަމަށް ރައީސް އޮފީހުން ވިދާޅުވިއެވެ.

މިދިޔަ އަހަރު ޤައުމީ އިނާމާބެހޭ ކޮމެޓީއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުށައެޅުއްވީ 43 އަހަރަށްވުރެ ގިނަ ދުވަހު ދިވެހި ދައުލަތަށް ޚިދުމަތްކުރެއްވި ބޭފުޅުންގެ މަޢުލޫމާތެވެ.