ޕޮލިސް ބޯޑަށް ކުރިމަތިލުމަށް އާންމު ރައްޔިތުންނަށް ފުރުސަތު ހުޅުވާލައިފި

ޤާނޫނު ނަންބަރު 34/2020 (ދިވެހި ފުލުހުންގެ ޚިދުމަތުގެ ޤާނޫނު) ގެ 75 ވަނަ މާއްދާގެ(ހ) ގައި ބަޔާންކޮށްފައިވާ ގޮތުގެމަތިން އެކުލެވޭ ޕޮލީސް ބޯޑަށް އެ މާއްދާގެ (ހ) ގެ (3) ވަނަ ނަންބަރުގައި ބަޔާންކޮށްފައިވާ ފަދައިން ޢާންމުކޮށް ހުޅުވާލައިގެން ޢާއްމު ރައްޔިތުންގެ ތެރެއިން ކުރިމަތިލާ ފަރާތްތަކުގެ ތެރެއިން ރައްޔިތުންޖެ މަޖިލިހުން ކަނޑައަޅާ 2 (ގޭއް) މެންބަރުންގެ މަޤާމަށް ކުރިމަތިލުމަށް އެދޭ ފަރާތްތަކަށް އެ ފުރުސަތު މިއަދުން ފެށިގެން ހުޅުވިފައިވާކަމަށް ރައްޔިތުންގެ މަޖިލީހުގެ އިދާރާއިން އިޢުލާނުކޮށްފިއެވެ. 

ޕޮލިސް ބޯޑަށް ޢައްޔަނުކުރެވޭ މެންބަރުންނަކީ، ވަޒީފާ އަދާކުރާ ބަޔަކަށް ވެގެންނުވާނެކަމަށް ދިވެހި ފުލުހުންގެ ޚިދުމަތުގެ ޤާނޫނުގައި ބަޔާންކޮށްފައިވެއެވެ. ހަމައެހެންމެ، ޕޮލިސް ބޯޑަށް އައްޔަނުކުރެވޭ މެންބަރުންގެ ދައުރަކީ 4 އަހަރު ކަމަށްވެސް މި ޤާނޫނުގައި ބަޔާންކޮށްފައިވެއެވެ. 

މި މަޤާމަށް ނަން ހުށައެޅުމަށް ބޭނުންވަނީ، ދިވެހި ރައްޔިތެއްކަން އަންގައިދޭ ކާޑުގެ ކޮޕިއަކާއި، އެ ފަރާތެއްގެ ވަނަވަރާއި ތަޢުލީމީ ސަނަދުތަކުގެ ކޮޕީއާއި، ލިބިފައިވާ މަސައްކަތުގެ ތަޖުރިބާއާއި، ކުށުގެ ރެކޯރޑެވެ. ފޯމުފުރުމުގެ ސުންގަޑިއަކީ 24 ފެބުރުއަރީ 2025 ވާ ހޯމަ ދުވަހުގެ މެންދުރު 12:00 އެވެ.