Ads by Exprox

ޚަބަރު

މީރާއަށް ލިބުނު އާމްދަނީ 43 އިންސައްތަ އިތުރުވެއްޖެ

މީރާއަށް ލިބުނު އާމްދަނީ 43 އިންސައްތަ އިތުރުވެއްޖެ

މީރާ އޮފީސް ފޮޓޯ:އެޑިޝަން

އާމިނަތު ޔުމްނާ

އާމިނަތު ޔުމްނާ

11 ފެބްރުއަރީ 2025، 07:05

11 ފެބްރުއަރީ 2025، 07:05

މިދިޔަ ޖެނުއަރީ މަހު މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް 3.34 ބިލިއަން ރުފިޔާ ބަލައިގަނެފައިވާކަމަށް އެ އޮތޯރިޓީން ހާމަކޮށްފިއެވެ. މިއީ އޭގެ ކުރީ މަހާ އަޅާބަލާއިރު 43 އިންސައްތަ އިތުރު އަދަދެކެވެ. އަދި މިއީ ލިބޭނެކަމަށް އަންދާޒާކޮށްފައިވާ އަދަދަށްވުރެ 5 އިންސައްތަ އިތުރު އަދަދެއްކަމަށްވެސް މީރާއިން ބުނެފައިވެއެވެ.

މީރާއިން ބުނިގޮތުގައި، މިދިޔަ އަހަރުގެ ޖެނުއަރީ މަހާ އަޅާބަލާއިރު މިއަހަރުގެ ޖެނުއަރީ މަހު ލިބުނު އާމްދަނީ މަދުވުމުގެ މައިގަނޑު ސަބަބަކީ، ކުންފުނިތަކާއި ފަރުދުން ނޫން އެހެން ފަރާތްތަކުގެ އާމްދަނީން ޓެކްސް ނެގުމުގެ ސުންގަޑި ރަސްމީ ބަންދު ދުވަހަކާ ދިމާވުމުން، ފެބްރުއަރީ މަހުގެ ދެވަނަ ދުވަހުގެ ނިޔަލަށް މުއްދަތު އިތުރުކުރުމެވެ.

އެހެންނަމަވެސް، މި މުއްދަތުގައި ޖީއެސްޓީގެ އާމްދަނީ އިތުރުވެފައިވާކަމަށާއި، 2024 ގެ ޑިސެންބަރު 1 އިން ފެށިގެން އެއަރޕޯޓު ޓެކުހާއި ފީގެ ރޭޓު އިތުރުވުމާ ގުޅިގެން، މިދިޔަ މަހު އެ ޓެކްސްތަކުން ލިބުނު އާމްދަނީ އިތުރުވެފައިވާކަން މީރާއިން ފާހަގަކޮށްފައިވެއެވެ.

މިދިޔަ މަހަށް އަންދާޒާކޮށްފައިވާ އާމްދަނީއަށްވުރެ 5 އިންސައްތަ އިތުރުވެފައިވާ މައިގަނޑު ސަބަބުތަކުގެ ތެރޭގައި ގްރީން ޓެކުހާއި ވަރކް ޕަރމިޓް ފީ، ޓޫރިޒަމް ދާއިރާގެ ޖީއެސްޓީ އަދި ކޯޕަރޭޓް އިންކަމް ޓެކްސްތަކުން އާމްދަނީ އިތުރުވުން ހިމެނެއެވެ. އަދި އަންދާޒާކޮށްފައިވާ އަދަދަށްވުރެ 2 އިންސައްތަ އިތުރަށް ފަތުރުވެރިން ރާއްޖެ އައުމުން ފަތުރުވެރިކަމާ ގުޅުންހުރި އާމްދަނީވެސް އިތުރުވެފައިވާކަމަށް މީރާއިން ބުނެފައިވެއެވެ.

މިދިޔަ މަހު މީރާއަށް ބަލައިގަތް އާމްދަނީގެ އެންމެ ބޮޑު ބައެއް ހިއްސާކުރަނީ ޖީއެސްޓީ ކަމަށް މީރާއިން ބުނެފައިވެއެވެ. އެގޮތުން ޖީއެސްޓީގެ ގޮތުގައި 1.59 ބިލިއަން ރުފިޔާ ލިބުނުއިރު، އެއީ އާމްދަނީގެ 47.7 އިންސައްތައެވެ. މީގެ އިތުރުން، އެއަރޕޯޓް ޑިވެލޮޕްމަންޓް ފީގެ ގޮތުގައި 115.39 މިލިއަން ރުފިޔާއާއި ޓޫރިޒަމް ލޭންޑް ރެންޓްގެ ގޮތުގައި 65.11 މިލިއަން ރުފިޔާ ލިބިފައިވާކަމަށްވެސް މީރާއިން ހާމަކޮށްފައިވެއެވެ.

މިދިޔަ މަހު ބަލައިގަނެފައިވާ އާމްދަނީގެ ތެރޭގައި 125.49 މިލިއަން އެމެރިކާ ޑޮލަރު ހިމެނޭކަމަށްވެސް މީރާއިން ބުނެފައިވެއެވެ.
                    

މި ލިޔުން ކިޔާލުމުން

Ads by MSS