ޚަބަރު
2025 ވަނަ އަހަރަށް ސްކޫލު ބަދަލުކުރުމުގެ ކަންކަން އަވަސްކުރަން އިލްތިމާސްކޮށްފި

ހިރިޔާ ސްކޫލް ދަރިވަރުން ފޮޓޯ:އިންޓަނެޓް
މިނިސްޓްރީ އޮފް އެޑިޔުކޭޝަނުން ވަނީ 2025 ވަނަ އަހަރުގެ ދިރާސީ އަހަރަށް ދަރިވަރުން އެއްރަށުން އަނެއްރަށަށް ސްކޫލު ބަދަލުކުރުމުގެ ފުރުޞަތު ހުޅުވާލައިފައެެވެ. މި ފުރުޞަތުގެ ދަށުން، ދަރިވަރުން ކިޔަވަމުންދާ ސްކޫލުން އެހެން ރަށެއްގެ ސްކޫލަކަށް ބަދަލުކުރުމަށް އެދޭ ފަރާތްތަކަށް 2025 ވަނަ އަހަރުގެ މާރިޗު މަހުގެ 6 ވަނަ ދުވަހުގެ މެންދުރު 2:00 ގެ ނިޔަލަށް އެކަމަށް އެދި ހުށަހެޅުމުގެ ފުރުޞަތު ދެވިފައިވެއެވެ.
ދަރިވަރުން ބަދަލުކުރުމަށް އެދޭ ފަރާތްތަކުން "ދަރިވަރު ކިޔަވަމުން އަންނަ ސްކޫލުން އެހެން ރަށެއްގެ ސްކޫލަކަށް ބަދަލުކުރުމަށް އެދޭ ފޯމު" ފުރިހަމަކޮށް، މިހާރު ދަރިވަރު ކިޔަވަމުންދާ ސްކޫލަށް ހުށަހަޅަންޖެހޭނެއެވެ. މި ފޯމު މިނިސްޓްރީ އޮފް އެޑިޔުކޭޝަންގެ ވެބްސައިޓުން ޑައުންލޯޑް ކުރެވެން ހުންނާނެކަމަށް މިނިސްޓްރީން މަޢުލޫމާތު ދެއެވެ.
2025 ވަނަ އަހަރުގެ ދިރާސީ އަހަރު ފެށުމަށް ހަމަޖެހިފައިވަނީ ރަމަޟާން މަހުގެ ފަހު ދިހައިގެ ބަންދު ދުވަސްތަކާއި ފިތުރު ޢީދުގެ ބަންދު ދުވަސްތަކަށްފަހުގައެވެ. އެހެންކަމުން، ރަމަޟާން މަހުގެ 15 ވަނަ ދުވަސް (15 މާރިޗު 2025) ގެ ކުރިން ދަރިވަރުން ސްކޫލަށް ވެއްދުމާ ގުޅުންހުރި އެންމެހައި މަސައްކަތްތައް ނިންމުމަށް މިނިސްޓްރީން ވަނީ ރާވާފައެވެ.
މިނިސްޓްރީން އިތުރަށް ފާހަގަކޮށްފައިވާ ގޮތުގައި، މިހާރު ހިނގަމުންދާ 2024 ވަނަ އަހަރުގެ ދިރާސީ އަހަރުގެ ބާކީ އޮތް މުއްދަތުގައި ދަރިވަރުން އެއްރަށުން އަނެއްރަށަށް ބަދަލުކުރުމުގެ މަސައްކަތެއް ކުރިއަށް ނުގެންދެވޭނެއެވެ. ސަބަބަކީ މި ދުވަސްވަރަކީ ދަރިވަރުންގެ އިމްތިޙާނުތަކާއި އެސެސްމަންޓްތައް އަދި ރިޕޯޓު ފޯމުތައް ތައްޔާރުކުރާ މުހިންމު ދުވަސްވަރަކަށް ވާތީއެވެ.