ސައިންސް / ދުނިޔެ
އެއަރބަސް އިން ކެބިންގައި ދެ ފަންގިފިލާއަށް ގޮނޑި ހަރުކުރަނީ
އެއަރބަސް އިން ކެބިންގައި ގޮންޑިހަރުކުރުމަށް ނިންމާގޮތް ފޮޓޯ:އިންޓަނެޓް
ދުނިޔޭގެ އެންމެ ބޮޑު މަތިންދާބޯޓު އުފައްދާ ކުންފުނިތަކުގެ ތެރެއިން އެއް ކުންފުންޏެއް ކަމަށްވާ އެއަރބަސް އާއި އޭވިއޭޝަން ސްޓާޓްއަޕް ކުންފުންޏެއް ކަމަށްވާ ޗެއިޒް ލޯންގް ގުޅިގެން މަތިންދާބޯޓުގެ ކެބިންގައި ދެ ފަންގިފިލާގެ މަތީގައި ގޮނޑި ހަރުކުރުމުގެ މަސައްކަތް ފަށައިފިއެވެ.
މި މަޝްރޫޢުގެ ސީއީއޯ އަލެޖެންޑްރޯ ނުނެޒް ވިސެންޓެ ސީއެންއެން ޓްރެވަލްއަށް ދެއްވި މަޢުލޫމާތުގައި ވިދާޅުވީ އެއަރބަސްއިން މި މަޝްރޫޢުގެ ފުރިހަމަ ޤާބިލުކަން ދެނެގަނެފައިވާ ކަމަށެވެ. އަދި މިއީ ކޮލެޖް ދަރިވަރެއްގެ ޕްރޮޖެކްޓަކުން ފެށިގެން އައިސް މިހާރު ޙަޤީޤަތަކަށް ވުމުގެ މަގުމަތީގައިވާ މަޝްރޫޢެއް ކަމަށް އޭނާ ވިދާޅުވިއެވެ.
އެއަރބަސްގެ ފަރާތުން މި މަޢުލޫމާތު ކަށަވަރުކޮށްދެމުން ބުނެފައިވަނީ މިއީ އަދި ވަރަށް ފަށައިގަތުމުގެ މަރުޙަލާގައިވާ މަޝްރޫޢެއް ކަމަށާއި، އިތުރު މަޢުލޫމާތު ހިއްސާކުރަން ވަގުތު ބޭނުންނުވާ ކަމަށެވެ.
މި މަޝްރޫޢުގެ މައިގަނޑު ވިސްނުމަކީ މަތިންދާބޯޓުގެ ކެބިންގެ މަތީ ބައި ނަގާލުމަށްފަހު ދެ ފަންގިފިލާގައި ގޮނޑި ހަރުކުރުމެވެ. މީގެ ސަބަބުން ދަތުރުވެރިންނަށް މަތީ ނުވަތަ ތިރީ ފަންގިފިލާ އިޚްތިޔާރު ކުރެވޭނެއެވެ. ތިރީ ފަންގިފިލާގައި ފައި ދަމާލެވޭ ޖާގަ އިތުރުވާނެ ކަމަށް ނުނެޒް ވިސެންޓެ ވިދާޅުވިއެވެ.
މި ޑިޒައިން ސޯޝަލް މީޑިއާގައި ވަރަށް މަޝްހޫރުވެފައިވާއިރު، ބައެއް ފަރާތްތަކުން މިއާ ދެކޮޅަށް ޚިޔާލު ފާޅުކޮށްފައިވެއެވެ. ނަމަވެސް ނުނެޒް ވިސެންޓެ ވިދާޅުވީ ކޮންމެ އައު އީޖާދެއްގައިވެސް ރަނގަޅު އަދި ނުރަނގަޅު ކޮމެންޓްތައް ލިބޭނެ ކަމަށާއި، މި ޑިޒައިންގެ ފައިދާތައް އޭގެ ގެއްލުންތަކަށްވުރެ މާ ބޮޑު ކަމަށެވެ.
މި މަޝްރޫޢު ތަރައްޤީކުރުމަށް އަދިވެސް ގިނަ ދުވަސްތަކެއް ނަގާނެ ކަމަށް ނުނެޒް ވިސެންޓެ ވިދާޅުވިއެވެ. ނަމަވެސް އެއަރބަސްގެ އެހީތެރިކަމާއެކު މިއީ ޙަޤީޤަތަކަށް ހެދޭނެ އަދި ދަތުރުވެރިންނަށް ވަރަށް ބޮޑަށް ފައިދާކުރާނެ ކަމެއް ކަމަށް އޭނާ ވިދާޅުވިއެވެ.
