ދުނިޔެ
ކުޑަކުދިން ކުޅޭ ސަރަހައްދަކުން 2 ވަނަ ބޮޑު ހަނގުރާމައިގެ ޒަމާނުގެ ގޮވާ ތަކެތި ފެނިއްޖެ
ޕާކުން ފެނުނު ގޮވާ ތަކެތި ފޮޓޯ:ސީއެންއެން
ނޯތަމްބަރލޭންޑްގެ ވޫލަރގައި ހުރި ކުޑަކުދިންގެ ކުޅޭ ސަރަހައްދެއް ކަމުގައިވާ ސްކޮޓްސް ޕްލޭ ޕާކުން 2 ވަނަ ބޮޑު ހަނގުރާމައިގެ ޒަމާނުގެ ގޮވާ ތަކެތި ފެނިފައިވާ ކަމަށް އެ ރަށުގެ ކައުންސިލުން ބުނެފިއެވެ.
މި ތަކެތި ފެނުނީ އެ ސަރަހައްދު އާބާތުރަ ފިލުވުމުގެ މަސައްކަތް ކުރަމުންދިޔަ ވަގުތު ކަމަށް ކައުންސިލުން ހާމަކޮށްފައިވެއެވެ. އެންމެ ފުރަތަމަ ފެނުނު ދެ ބޮން ނައްތާލީ ބްރިޓިޝް އާމީއިން ކަމަށާއި، އޭގެ ފަހުން އެ ސަރަހައްދު ސާފުކުރުމުގެ މަސައްކަތް ކުރިއަށް ގެންދިޔައީ ބޮމް ޑިސްޕޯސަލް ކުންފުންޏެއް ކަމަށްވާ ބްރިމްސްޓޯން ސައިޓް އިންވެސްޓިގޭޝަން އިންނެވެ.
މި ކުންފުނިން ފުރަތަމަ ދުވަހު 65 ބޮމާއި ދުން އުފައްދާ ކާޓްރިޖް ހޯދާފައިވާ ކަމަށާއި، ދެވަނަ ދުވަހު އިތުރު 90 ބޮން ފެނުނު ކަމަށް ކައުންސިލުން ބުނެފައިވެއެވެ. މިހާތަނަށް ޖުމްލަ 174 ގޮވާ އެއްޗެހި ފެނިފައިވާ ކަމަށް ކައުންސިލުން ހާމަކޮށްފައިވެއެވެ.
މި ސަރަހައްދަކީ 2 ވަނަ ބޮޑު ހަނގުރާމައިގެ ތެރޭގައި ހޯމް ގާޑް ވޮލަންޓިއަރުންނަށް ތަމްރީނު ދިނުމަށް ބޭނުންކުރި ތަނެއް ކަމަށް ލަފާކުރެވޭ ކަމަށް ސިޔާސީ ފަރާތްތަކުން ބުނެފައިވެއެވެ. އަދި ހަނގުރާމަ ނިމުމަށްފަހު މި ތަކެތި ވަޅުލާފައިވާ ކަމަށް ބެލެވެއެވެ.
މި ސަރަހައްދު އަލުން ހުޅުވުމުގެ ކުރިން ހުރިހާ ގޮވާ ތަކެތި ނެގުމަށްފަހު ރައްކާތެރިކަން ކަށަވަރުކުރެވޭނެ ކަމަށް ކައުންސިލުން ބުނެފައިވެއެވެ. އަދި މިފަދަ ހާދިސާތައް އިނގިރޭސިވިލާތުގެ އެހެން ސަރަހައްދުތަކުންވެސް ފެންނަމުންދާ ކަމަށް ކައުންސިލުން ފާހަގަކޮށްފައިވެއެވެ.
