ޚަބަރު
ރައީސުލްޖުމްހޫރިއްޔާ "ޤަޟާޢީ އަހަރު 2025" އިފްތިތާޙުކޮށްދެއްވައިފި

ރައީސުލްޖުމްހޫރިއްޔާ "ޤަޟާޢީ އަހަރު 2025" އިފްތިތާޙުކޮށްދެއްވުން|ފޮޓޯ: ރައީސް އޮފީސް
ހުލާސާ
މި ރަސްމިއްޔާތުގައި މުސްކުޅި ކުރައްވާފައިވާ ފަނޑިޔާރުން ތަކްރީމުކުރެއްވުން ކުރިއަށްދިޔަ
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު "ޤަޟާޢީ އަހަރު 2025" އިފްތިތާޙުކޮށްދެއްވައިފިއެވެ. މި ކަމަށްޓަކައި ޚާއްޞަ ރަސްމިއްޔާތެއް ރޭ ވަނީ އިސްލާމީ މަރުކަޒުގެ ޖަލްސާކުރާ މާލަމުގައި ބާއްވާފައެވެ.
މި ރަސްމިއްޔާތަކީ އައު ޤަޟާޢީ އަހަރަކަށް ކުރިމަތިލާއިރު ފާއިތުވި އަހަރު ކުރެވިފައިވާ މަސައްކަތްތައް ފާހަގަކުރުމަށް ބޭއްވޭ ރަސްމިއްޔާތެކެވެ. މީގެ އިތުރުން، މި ރަސްމިއްޔާތުގައި ފާއިތުވި އަހަރުގެ ތަޖުރިބާގެ އަލީގައި ޝަރުޢީ ގޮތުންނާއި، އިދާރީގޮތުން ޝަރުޢީ ދާއިރާ ހަރުދަނާކުރެއްވުމަށްޓަކައި އައު އަހަރުގެ ލަނޑުދަނޑިތައް ކަނޑައަޅުއްވާނެއެވެ. ހަމަ އެހެންމެ، މި ރަސްމިއްޔާތުގެ ތެރެއިން ޝަރުޢީ ކޯޓުގެ ފަނޑިޔާރުންނާއި، މުވައްޒަފުން އެއް މާހައުލަކުން ބައްދަލުވުމުގެ ފުރުޞަތު ފަހިވެގެންދެއެވެ. މި ރަސްމިއްޔާތުގައި ދިވެހިރާއްޖޭގެ އުއްތަމަ ފަނޑިޔާރު އޮނަރަބަލް އަޙްމަދު މުޢުތަޞިމް އަދުނާން ވަނީ ޤަޟާޢީ ބަޔާން އިއްވަވާފައެވެ.
ޤަޟާޢީ އަހަރު އިފްތިތާޙު ކުރެއްވުމުގެ ރަސްމިއްޔާތުގައި، ޝަރަފުވެރިކަމާއެކު މުސްކުޅި ކުރައްވާފައިވާ ފަނޑިޔާރުން ތަކްރީމުކުރެއްވުން ކުރިއަށްދިޔައެވެ. މި އަހަރު ވެސް ޤަޟާޢީ އަހަރު އިފްތިތާޙުކުރުމާއި ގުޅިގެން ޚާއްޞަ ޙަރަކާތްތަކެއް ކުރިއަށް ގެންދިޔުމަށް ވަނީ ހަމަޖެހިފައެވެ. އެގޮތުން، އިދާރީ ގޮތުން ޝަރުޢީ ދާއިރާގެ ކޯޓުތަކުގެ ހިންގުން ހަރުދަނާކުރުމަށްޓަކައި ކުރެވިދާނެ ކަންތައްތަކާބެހޭ ގޮތުން މަޝްވަރާކޮށް ޚިޔާލު ބަދަލުކުރުމަށްޓަކައި ފަނޑިޔާރުންގެ ޤައުމީ މަހާސިންތާގެ ނަމުގައި މަހާސިންތާއެއް، މި އަހަރުވެސް ބޭއްވުމަށް ވަނީ ހަމަޖެހިފައެވެ. އެހެންކަމުން، މި އަހަރުގެ މަހާސިންތާ ޚާއްޞަކުރައްވާފައިވަނީ އިސްލާމިކް ފައިނޭންސިންގ އަދި ޝަރުޢީ ކޯޓުތަކުގައި ހުރި ޝަރުޢީ އަދި އިދާރީ ކަންކަން އެއްގޮތްކުރުމާ ގުޅޭގޮތުންނެވެ.
ޤަޟާޢީ އަހަރު އިފްތިތާޙުކުރެއްވުމާއި ގުޅިގެން 2021 ވަނަ އަހަރު ފިޔަވާ ފާއިތުވި 8 އަހަރު ވަނީ ޚާއްޞަ ޙަރަކާތްތަކެއް ކުރިއަށް ގެންގޮސްފައެވެ.