ވޯލްޑް ގަވަމަންޓްސް ސަމިޓްގެ ޕްލީނަރީ ސެޝަންގައި ނައިބު ރައީސް ބައިވެރިވެޑައިގަންނަވައިފި

"ވޯލްޑް ގަވަމަންޓްސް ސަމިޓް 2025"ގެ ބައެއްގެ ގޮތުގައި ހިމެނޭ "ދަ ގަވަމަންޓް އެކްސްޕީރިއަންސް އެކްސްޗޭންޖް ފޯރަމް"ގައި ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ބައިވެރިވެވަޑައިގަންނަވައިފިއެވެ.

"ދަ ގަވަމަންޓް އެކްސްޕީރިއަންސް އެކްސްޗޭންޖް ފޯރަމް"ގައި ތަފާތު ސިނާއަތްތަކުގެ ތަޖުރިބާކާރުން އެއްތަނަކަށް ޖަމާވެ، ހަޤީޤީ ދުނިޔޭގެ ތަޖުރިބާތަކާއި، އީޖާދީ ސިޔާސަތުތަކާއި އަގުހުރި ފިލާވަޅުތައް ހިއްސާކުރެއެވެ. އަދި ތަރައްޤީވަމުން އަންނަ ޤައުމުތަކަށް ދިމާވަ ގޮންޖެހުންތަކަށް އިޖާދީ ޙައްލު ހޯދާނެގޮތްތަކަާ ގުޅޭގޮތުން މި މަޝްވަރާކުރެއެވެ. އަދި މިފޯރަމްގައި ކުރެވުނު މަޝްވަރާތަކުގައި ސިނާޢަތްތަކަށް ކުރިމަތިވަމުންދާ އެކި ހުރަސްތައް ނައްތާލުމާއި، އުފެއްދުންތެރި ހައްލުތައް ހޯދުމާއި، ލީޑަރޝިޕް ތަރައްޤީކޮށް ކުރިއެރުވުމާއި ގުޅޭގޮތުން ވަނީ މަޝްވަރާތައް ކުރިއަށްގެންގޮސްފައެވެ.

މި ފޯރަމްގައި މައިގަނޑު ގޮތެއްގައި އިސްކަންދީފައިވަނީ 6 ދާއިރާއަކަށެވެ. އޭގެތެރޭގައި، ހެއު ވެރިކަމާއި ޖަވާބުދާރީކުރުވުމާއި، ކުރިމަގަށާއި ދުނިޔޭގެ އިގުތިޞާދަށް ފައިނޭންސް ކުރުމާއި، މޫސުމަށް އަންނަ ބަދަލުތަކުގެ ގެއްލުން ކުޑަކުރުމާއި ވިލުންތެތި ސިޓީތަކާއި، ކުރިމަގަށްޓަކާ ރަނގަޅު މުޖުތަމަޢެއް ބިނާކުރުމާއި ޤާބިލުކަން އިތުރުކުރުމާއި ދުނިޔޭގެ ތަރައްޤީވަމުން އަންނަ ޞިއްޙީ ބަދަލުތަކާއި ކުރިމަގުގެ އައު އީޖާދީ ޓެކްނޮލޮޖީ ފަދަ ދާއިރާތައް ހިމެނެއެވެ. 

މި މަހުގެ 11 އިން 13 އަށް  ކުރިޔަށްދާ މި ސަމިޓުގެ މޫސުމީ ބަދަލުތަކާއި ބެހޭ ފޯރަމްގައި ރައީސުލްޖުމްހޫރިއްޔާގެ ނައިބު ވާހަކަފުޅު ދެއްކެވުމަށް ވަނީ ހަމަޖެހިފައެވެ.